ⴰⵃⵉⴷⵓⵙ
ⴰⵃⵉⴷⵓⵙ ⵉⴳⴰ ⵢⴰⵏ ⵡⵓⵔⴰⵔ ⵏⵏⴰ ⵙⴽⴰⵔⵏ ⵉⵎⴰⵣⵉⵖⵏ ⵏ ⵡⴰⵟⵍⴰⵙ ⴰⵏⴰⵎⵎⴰⵙ ⴷ ⵓⵙⴰⵎⵎⵔ. ⵉⴳⴰ ⵓⵔⴰⵔ ⵥⴹⴰⵕⵏ ⴰⴷ ⵜ ⵙⴽⵔⵏ ⵉⴼⵔⵅⴰⵏ ⵓⵍⴰ ⵜⵉⴼⵔⵅⵉⵏ, ⴰⵔ ⵜⴻⵜⵜⵎⵣⵉⵔⵉⵢ ⵜⴰⵍⵖⴰ ⵏⵏⵙ ⵣⴳ ⵜⵎⵏⴰⴹⵜ ⴰⵔ ⵜⴰⵢⵢⴰⴹ. ⵣⵉⴽⴽ, ⴰⵔ ⵜⵜⴰⵖⵏ ⵉⵎⴰⵣⵉⵖⵏ ⵏ ⵜⵎⵏⴰⴹⵉⵏ ⴰⴷ ⴰⵃⵉⴷⵓⵙ ⴳ ⴽⵔⴰⵢⴳⴰⵜ ⵜⵉⵣⵉ, ⵍⵓⵎⴰⵕ ⴰⴷ ⴷⴰⵢ ⵣⵔⵉⵏⵜ ⵜⵉⵏⵡⵓⵜⵛⵉ, ⵎⴰⵛⵛ ⵜⵉⴳⵉⵔⴰ ⴰⴷ ⴰⵔ ⵜ ⵙⴽⴰⵔⵏ ⵖⴰⵔ ⴳ ⵜⵎⵖⵔⵉⵡⵉⵏ ⴷ ⵜⴼⵓⴳⵍⵉⵡⵉⵏ. ⵙⴽⵔⵏ ⴽⵔⴰ ⵏ ⵜⵎⵙⵎⵓⵏⵉⵏ ⴽⵔⴰ ⵏ ⵜⵔⵓⴱⴱⴰ ⴳⴰⵏⵉⵏ ⴰⵃⵉⴷⵓⵙ ⴷ ⵜⴰⵣⵣⵓⵍⵜ ⴰⵔ ⵙⵉⵙ ⵜⵜⴽⴽⴰⵏ ⵜⵉⵎⵉⵣⴰⵔ ⴰⴽⴽⵯ ⴰⵔ ⵙⵉⵙ ⴷⵔⵔⵓⵏⵜ ⴳ ⵉⵏⵎⵓⴳⴳⴰⵔⵏ ⴷ ⵉⴳⴷⵓⴷⵏ ⵏ ⵓⵎⴰⴹⴰⵍ.
ⴰⵏⴰⵡⵏ ⵏ ⵓⵃⵉⴷⵓⵙ
ⵙⵏⴼⵍⵜⴰⵥⵓⵕⵉ ⵏ ⵓⵔⴽⴰⴹ ‘’ⵜⴰⵃⵉⴷⵓⵙⵜ ⵏ ⵉⵎⴳⵓⵏⵏ‘’
ⵙⵏⴼⵍⵎⴽ ⵜⴳⴰ ⵍⵊⵓⴽⴰⵏⴷⴰ ,ⵜⵉⴼⵍⵓⵜ ⵏ ⵜⵥⵓⵕⵉ ⵏ ⵉⵖⵎⴰⵏ ⵜⴰⵎⴰⴹⵍⴰⵏⵜ ⵏⵏⴰ ⵉⵄⴷⵍ ⵓⵏⴰⵥⵓⵕ ⴰⵎⴰⴹⵍⴰⵏ “ⴷⴰⴼⵉⵏⵜⵛⵉ” (1503-1505), ⵢⴰⵜ ⵜⵎⴰⵜⴰⵔⵜ ⵜⴰⵎⵇⵔⴰⵏⵜ ⵏ ⵜⵓⵙⵙⵏⴰ ⴷ ⵜⵥⵓⵕⵉ ⵏⵏⴰ ⵉⵜⵜⴰⵡⵉⵏ ⴽⵉⴳⴰⵏ ⵏ ⵎⴷⴷⵏ ⵙ ⵜⵎⴷⵉⵏⵜ ⵏ ⴱⴰⵔⵉⵣ ⴷ ⴰⵔ ⵜⴰⴽⴽⴰ ⵓⴷⴷⵓⵔ ⴰⵅⴰⵜⴰⵔ ⵉ ⵓⵙⴼⵙⵔ ⵏ “ⵍⴰⴱⵓⵔⵙ” ⵉⵙⴳⴳⵯⴰⵙⵙⵏ ⵉⴳⴳⵓⴷⵉⵏ ⴰⵢⴰ. ⵉⵎⴽⵉⵏⵏⴰⵖ ⴰⵢⴷ ⵜⴳⴰ ⴰⵡⴷ ⵜⵃⵉⴷⵓⵙⵜ ⵏ ⵉⵎⴳⵓⵏⵏ ⴳ ⵢⴰⵜ ⵜⵙⴳⴰ ⴰⴹⵏⵉⵏ ⵏ ⵜⵥⵓⵕⵉ, ⵜⴳⴰ ⵢⴰⵏ ⵓⵔⴽⴰⴹ ⵉⴳⴰⵏ ⵜⵉⵙⵉⵜ ⵏ ⵡⴰⵎⵓⵏ, ⵜⴳⴰ ⴰⵙⵉⵙⵙⵏ ⵉ ⵜⵎⴰⵣⵉⵔⵜ ⵏ ⵉⵎⴳⵓⵏⵏ ⵓⵍⴰ ⵜⵉⵏ ⴷⴰⴷⵙ ⵓⵍⴰ ⵜⵉⵏ ⵍⵎⵖⵔⵉⴱ ⴰⴽⵡ ⵙⴳ ⵓⴼⵍⵍⴰ. ⴰⵢⴷⴷⵖ ⵏ ⵜⵥⵓⵕⵉ ⴰ ⵖⴼ ⵏⵔⴰ ⴰⴷ ⵏⵙⵉⵡⵍ ⴳ ⵓⵙⵏⵜⵍ ⴰⴷ ,ⵜⵙⵎⴰⵏ ⵜⵥⵓⵕⵉ ⴷⴷⵖ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵣⵓⵏⴷ, ⴰⵎⴰⵔⴳ ⵏ ⵢⵉⵔⵉⵔ, ⴰⵔⴽⴰⴹ, ⵜⵉⵎⵍⵙⴰ, ⵉⵣⵍⴰⵏ, ⵉⵎⴰⵙⵙⵏ... ⴰⵢⴰ ⴰⴷ ⴷ ⵢⵉⵡⵉⵏ ⴰⵍⵍⵉⴳ ⵜⵉⵡⵢ ⵉⵥⵕⵉ ⴷ ⵜⵙⵙⵓⵙⵎ ⴽⵉⴳⴰⵏ ⵏ ⵉⵎⴰⵍⵍⴰⵢⵏ ⴷ ⵉⵏⴰⵥⵓⵕⵏ ⴷ ⵎⴷⴷⵏ ⴰⴽⴽⵯ ⵙ ⵓⵎⴰⵜⴰ, ⴰⵍⵍⵉⴳ ⴷⴰ ⴷ ⵜⴻⴷⴷⵓⵏ ⵙⴳ ⵜⵉⵎⴰⵣⴰⵔ ⴽⵓⵍⵍ ⵏ ⵓⵎⴰⴹⴰⵍ.
ⴰⵔⴽⴰⴹ ⴷⴷⵖ ⵏ ⵉⵎⴳⵓⵏⵏ ⵉⵙⵙⵓⵙⵎ ⴽⵉⴳⴰⵏ ⵉⵏⴰⵥⵓⵕⵏ ⴳ ⵡⴰⵎⵓⵏ ⵓⵍⴰ ⴳ ⴱⵔⵔⴰ ⵏ ⵜⵎⴰⵣⵉⵔⵜ ⵓⵍⴰ ⵎⴷⴷⵏ ⴽⵓⵍⵍ. ⵉⴳⴰ ⵢⴰⵜ ⵜⵥⵓⵕⵉ ⵉⴼⴽⴰⵏ ⴰⵜⵉⴳ ⵉ ⵜⵎⴰⵣⵉⵔⵜ ⵏ ⵉⵎⴳⵓⵏⵏ ⴷ ⵜⵎⴰⵣⵉⵔⵜ ⵏ ⴷⴰⴷⵙ ⴳ ⵢⴰⵜ ⵜⵙⴳⴰ, ⵉⴳ ⵓⵍⴰ ⵢⴰⵏ ⵡⴰⵏⴰⵡ ⵏ ⵜⵥⵓⵕⵉ ⵉⵜⵜⴰⵙⵉⵏ ⵙ ⴰⴼⵍⵍⴰ ⵜⴰⵎⴰⵍⵍⴰⵢⵜ ⴷ ⵜⴷⵎⵙ ⴳ ⵜⵙⴳⴰ ⵏ “ⴷⵔⴰ ⵜⴰⴼⵉⵍⴰⵍⵜ” ⴷ ⴰⵔ ⵜⴳⴳⴰ ⵓⴷⵎ ⵉⵃⵍⴰⵏ ⴽⵉⴳⴰⵏ ⵉ ⵜⵎⵓⵔⵜ ⵏ ⵍⵎⵖⵔⵉⴱ ⴳ ⵜⵎⵉⵣⴰⵔ ⵏ ⵓⵎⴰⴹⴰⵍ ⴳ ⴼⵕⴰⵏⵚⴰ ⵓⵍⴰ ⵚⴱⴰⵏⵢⴰ ⵓⵍⴰ ⵉⵡⴰⵏⴽⵏ ⵉⵎⵓⵏⵏ...
ⴳ ⵓⵔⵣⵣⵓ ⴰⴷ ⵔⴰⴷ ⵏⵙⵡⵓⵔⵉ ⵖⴼ ⵙⵉⵏ ⵉⵏⴰⵥⵓⵕⵏ ⵉⵜⵜⵉⵔⵉⵔⵏ ⴰⵃⵉⴷⵓⵙ ,ⴳⵉⵏ ⵙⴳ ⵙⵏⴰⵜ ⵜⵙⵓⵜⵉⵡⵉⵏ ⵉⵎⵣⴰⵔⴰⵢⵏ, “ⵎⵓⵍⴰⵢ ⵍⵃⵓ” ⵉⵙⵙⵏⵜⴰⵏ ⴰⵃⵉⴷⵓⵙ ⵙⴳ ⵓⵙⴳⴳⵯⴰⵙ ⵏ 60 ⴰⵔ 2000, ⴷ “ⵢⵓⵙⵙⴼ ⴱⴰⵍⵀⵡⴰ” ⵏⵏⴰ ⵉⴳⴰⵏ ⴰⵙⵍⵡⴰⵢ ⵏ ⵜⵔⴰⴱⴱⵓⵜ ⵏ ⵜⵃⵉⴷⵓⵙⵜ ⵏ ⵉⵎⴳⵓⵏⵏ ⵙⴳ 2000 ⴰⵔ 2023. ⴳ ⵡⴰⴷⴷⴰⴷ ⴰⵎⵣⵡⴰⵔⵓ, ⵔⴰⴷ ⵏⵓⵔⵓ ⵖⴼ ⵜⵥⵓⵕⵉ ⵏ ⵓⵃⵉⴷⵓⵙ ⴷ ⵉⵙⵏⴼⵍⵏ ⵓⵍⴰ ⵓⴷⵎⴰⵡⵏ ⵉⵎⴰⵢⵏⵓⵜⵏ ⵏⵏⵙ, ⴷ ⵉⵎⴰⵙⵙⵏ ⵉⵜⵉⴽⵏⵓⵍⵓⵊⵉⵏ ⵏⵏⴰ ⵢⵉⵡⵙⵏ ⴰⴷ ⵏⵏ ⵢⴰⵡⴹ ⵓⵃⵉⵉⴷⵓⵙ ⵜⵉⵎⵉⵣⴰⵔ ⵏ ⵓⵎⴰⴹⴰⵍ.
ⵜⴰⵥⵓⵕⵉ ⵏ ⵓⵃⵉⴷⵓⵙ ⴳⵔ ⵎⴰⴷ ⵉⵣⵔⵉⵏ ⴷ ⵓⵣⵎⵣ ⴰⴷ: ⴰⵎⴷⵢⴰ “ⵜⴰⵔⴰⴱⴱⵓⵜ ⵜⴰⵃⵉⴷⵓⵙⵜ ⵏ ⵉⵎⴳⵓⵏⵏ” ⵜⴰⵃⵉⴷⵓⵙⵜ ⵏ ⵉⵎⴳⵓⵏⵏ.
ⴰⵃⵉⴷⵓⵙ ⴳⵔ ⵓⵎⵣⵔⵓⵢ ⵉⵃⵍⴰⵏ ⴷ ⵓⵣⵎⵣ ⴰⴷ ⴰⵎⴰⵢⵏⵓ
ⵙⵏⴼⵍⵜⴰⵏⵏⴰⵢⵉⵏ ⵏ ⵓⵎⴷⵢⴰⵣ “ⵎⵓⵍⴰⵢ ⵍⵃⵓ”: «ⴰⵃⵉⴷⵓⵙ ⵜⵉⵏⵎⵍ ⴰⵢⴷ ⵉⴳⴰ!! ⵓⵔ ⴷ ⵍⵀⴹⵕⵜ?» ⴰⵡⴰⵍ ⴷⴷⵖ ⴰⴷ ⵉⵏⵏⴰ ⵓⵎⴷⵢⴰⵣ ⵏⵖ ⴷ ⵍⵄⵔⵉⴼ ⵏ ⵓⵃⵉⴷⵓⵙ ⴷ ⵜⵎⵏⴰⴹⵉⵏ ⵎⵓⵍⴰⵢ ⵍⵃⵓ ⵏⵏⴰ ⵢⵉⵡⴹⵏ 81 ⵏ ⵓⵙⴳⴳⵯⴰⵙ, ⵙ ⵡⴰⵡⴰⵍ ⵏⵏⵙ ⴷ ⵡⵓⵍ ⵏⵏⵙ ⵉⵜⵜⴱⴱⵉⵏ, ⵏⵜⵜⴰ ⵏⵏⴰ ⴷ ⵉⵏⴽⵔⵏ, ⵉⵕⵥⵎ ⴷ ⴰⵍⵍⵏ ⵏⵏⵙ ⵖⴼ ⵓⵃⵉⴷⵓⵙ ⴰⴱⵍⴷⵉⵢ, ⵉⵍⴰⵏ ⵜⵉⵔⵙⴰⵍ ⵓⵍⴰ ⵜⵉⵎⵉⵜⴰⵔ ⵜⵉⵇⴱⵓⵔⵉⵏ ⵏ ⵜⵉⴳⵉ ⵓⵍⴰ ⵉⵙⵉⵜⵜⵉ ⵓⵍⴰ ⵢⵉⵎⴽ ⵏⵏⴰ ⵙ ⵉⵜⵜⵢⵉⵙⴽⵉⵔ. ⵢⵓⵙⵉ ⴰⵏⵣⵡⵓⵎ ⵉ ⵓⵃⵉⴷⵓⵙ ⴰⴷ ⵓⵔ ⵉⴷⴷⵓ, ⴰⴷ ⵓⵔ ⵉⵙⵎⵓⵔ ⵏⵖ ⵉⵍⵙⴰ ⵜⵉⵎⵍⵙⴰ ⴰⴹⵏⵉⵏ ⵏⵏⴰ ⴷⵊⵓⵏ ⵓⵔ ⵉⵍⵙⵉ.
ⵎⵓⵍⴰⵢ ⵍⵃⵓ ⵉⴳⴰ ⵍⵄⵔⵉⴼ ⵏⵏⴰ ⵉⵜⵜⴰⵖⵏ ⴰⵃⵉⴷⵓⵙ ⴳ ⵜⵎⴰⵣⵉⵔⵜ ⵏ ⵡⴰⵙⵉⴼ ⵏ ⴷⴰⴷⵙ ⵓⵍⴰ ⵜⵉⵏ ⵡⴰⵙⵉⴼ ⵏ ⵉⵎⴳⵓⵏⵏ ⵏⵏⴰ ⵉⵡⴰⵍⴰⵏ ⵉ ⵜⵙⴳⴰ ⵏ ⴷⵔⴰ ⵜⴰⴼⵉⵍⴰⵍⵜ. ⴳ ⵓⴹⵔⵉⵙ ⴰⴷ ⵏⴳⵔ ⵉⵥⵕⵉ ⵏⵏⵖ ⵖⴼ ⵜⵉⵔⵎⵜ ⵏ ⵎⵓⵍⴰⵢ ⵍⵃⵓ ⴷ ⵜⵡⵓⵔⵉ ⵏ ⵜⵔⴰⴱⴱⵓⵜ “ⵜⴰⵃⵉⴷⵓⵙⵜ ⵏ ⵉⵎⴳⵓⵏⵏ” ⵏⵏⴰ ⵉⵜⵡⴰⵙⵙⵏⵏ ⵙ ⵡⴰⵙⵙⴰⵖ ⵏ “ⴰⵔⴽⴰⴹ ⵏ ⵉⵎⴳⵓⵏⵏ” ⵏ ⵜⵎⴰⵣⵉⵔⵜ ⵏ ⵜⵖⵕⵎⵜ ⵏ ⵉⵎⴳⵓⵏⵏ (ⴽⵍⵄⴰ ⵎⴳⵓⵏⴰ).
ⵉⵏⵏⴰ ⵓⵎⴰⵔⴰ ⵍⵃⵓ ⴰⵣⵔⴳⵉ: «ⵜⴰⵥⵓⵕⵉ ⴰ ⴷⴰ ⵜⵙⵎⵓⵏⵓ ⴳⵔ ⵓⵎⴰⵔⴳ ⵏ ⵢⵉⵔⵉⵔ ⴷ ⵓⵔⴽⴰⴹ ⴷ ⵉⴽⴽⵯⵍⴰⵏ ⵉⴼⵔⵇⴰⵛⵏ ⵏⵏⴰ ⵉⵜⵜⴰⵡⵉⵏ ⵉⵥⵕⵉ ⵓⵍⴰ ⵜⴰⵡⵏⴳⵉⵎⵜ ⵏ ⵉⵏⴰⵥⵓⵕⵏ ⴷ ⵉⵎⴰⵍⵍⴰⵢⵏ ⴷ ⵎⴷⴷⵏ ⵙ ⵓⵎⴰⵜⴰ ⵏⵏⴰ ⴷ ⵉⵜⵎⵓⴷⴷⵓⵏ ⴰⴷ ⵉⵥⵉⵕⵏ ⵜⵉⵃⵍⵉ ⵏⵏⵙ» ⴰⵣⵔⴳⵉ, 2012.
ⵉⵏⵏⴰ ⵎⵓⵍⴰⵢ ⵍⵃⵓ: “ⴰⵃⵉⴷⵓⵙ ⵢⴰⵖⵓⵍ ⵉⴳⴰ ⵣⵓⵏⴷ ⴽⵔⴰ ⵏ ⵓⵎⵓⴹⵉⵏ ⵓⵔ ⵢⵓⴼⵉⵏ ⴰⵙⴰⴼⴰⵔ, ⴰⵔ ⵉⵙⵎⵓⵎⵎⵓⵢ ⴳ ⵉⴼⵙⵜⵉ, ⴰⵔ ⵉⵜⵜⵎⵜⴰⵜ ⵙ ⵉⴼⵙⵜⵉ, ⵜⴰⴼⵓⵢⵜ ⵍⵍⵉⵖ ⴷ ⵉⵜⵜⴰⵍⵉⵏ ⵖⴼ ⵓⵃⵉⴷⵓⵙ, ⵜⴰⵖⵓⵍ ⵜⵖⵍⵉ, ⵢⵉⵍⵉ ⵏⵜⵜⴰ ⴳ ⵜⵉⵍⵍⴰⵙ, ⴰⵢⴷⵓⴷ ⵏ ⵓⵃⵉⴷⵓⵙ ⴰⵔ ⵉⵜⵜⵙⵎⵓⵔ ⵉⵎⵉⴽⴽ ⵙ ⵉⵎⵉⴽⴽ, ⵡⵉⵏⵏⴰ ⵢⴰⴽⴽⴰⵏ ⴰⵜⵉⴳ ⵉ “ⵍⵎⵄⵏⴰ” ⵉⵄⵛⵛⴰⵇⵏ ⵓⵍⴰ ⵡⵉⵏⵏⴰ ⴰⵙ ⵉⵙⵙⴼⵍⵉⴷⵏ ⴰⵔ ⵜⵙⵎⵓⵔⵏ ⵉⵎⵉⴽⴽ ⵙ ⵉⵎⵉⴽⴽ.
ⵉⵙⴰⵡⵍ ⵃⴰⵙⴰⵏ ⵊⴰⵡⴰⴷ ⵖⴼ ⵓⵙⵏⵜⵍ ⵏ “ⵍⵎⵄⵏⴰ” ⵉⵏⵏⴰ ⴷⴷⴰ ⴳ ⴷⴰ ⵉⴳⴳⴰⵔ ⵓⵎⴷⵢⴰⵣ ⵏⵖ ⴷ ⴰⵎⴰⵔⵉⵔ ⵉⵣⵍⵉ ⵏⵏⵙ ⵏⵖ ⴷ ⵜⴰⵎⴷⵢⴰⵣⵜ, ⵛⵛⵡⴰⵢⵜ ⵏ ⵉⵎⵙⵙⴼⵍⵉⴷⵏ ⴳ ⵉⵔⵎⵙ ⵏ ⵍⵎⵄⵏⴰ, ⴰⵢⴰ ⴰⴷ ⴰⵖ ⵉⵙⵏⵄⴰⵜⵏ ⵉⵙ ⵜⵍⵍⴰ ⵢⴰⵜ ⵜⵣⴷⴰⵢⵜ ⴷ ⵢⴰⵏ ⵓⵎⵚⴰⵡⴰⴹ ⴳⵔ ⵓⵎⴰⵔⵉⵔ ⵏⵖ ⵍⵄⵔⵉⴼ ⴷ ⵓⵢⴷⵓⴷ ⵏⵏⵙ. ⵢⴰⵏ ⵓⵎⵚⵡⴰⴹ ⵉⵜⵜⵓⵚⴽⴰⵏ ⵖⴼ “ⵍⵎⵄⵏⴰ”.
ⵉⵏⵏⴰ ⵃⴰⵙⴰⵏ ⵊⴰⵡⴰⴷ ⵖⴼ ⵍⵎⵄⵏⴰ: “ⴳ ⵜⵎⵢⵓⵔⵉⵏ ⵜⴰⵎⴰⵡⴰⵍⵜ ⵏ ⵉⵛⵍⵃⵉⵢⵏ, ⴰⵡⴰⵍ ⵏ ⵓⵎⴷⵢⴰⵣ ⵉⵟⵟⴼ ⴰⴱⴷⴰ ⵙⵉⵏ ⵡⵓⴷⵎⴰⵡⵏ, ⵉⵡⴰⵍⵉⵡⵏ ⵏⵏⴰ ⵉⵜⵜⵉⵏⵉ, ⴷ ⵍⵎⵄⵏⴰ ⵏⵏⴰ ⵙ ⵉⵔⴰ ⴰⴷ ⵜ ⵔⵎⵙⵏ ⵎⴷⴷⵏ, ⴽⵓ ⵜⴰⴳⵓⵔⵉ ⵜⵖⵉⵢ ⴰⴷ ⵜⴰⵡⵉ ⵙ ⵢⴰⵏ ⵍⵎⵄⵏⴰ “1989: ⵜⴰⵙⵏⴰ 58-168.
ⵍⵄⵔⵉⴼ ⵎⵓⵍⴰⵢ ⵍⵃⵓ ⵉⵏⵏⴰ ⴷⵉⵖ, ⵉⴽⴽⴰ ⵜⵜ ⵏⵏ ⵍⵍⵉⵖ ⵜⴰⵎⵖⵔⴰ ⴰⵔ ⵜⵜⴽⴽⴰ ⵉⵎⴰⵍⴰⵙⵙ, ⵙⴰ ⵏ ⵡⵓⵙⵙⴰⵏ, ⴰⵔ ⵜⵜⴰⵖⵏ ⵎⴷⴷⵏ ⴰⵃⵉⴷⵓⵙ ⵙⴳ ⵓⵖⵍⴰⵢ ⵏ ⵜⴰⴼⵓⵢⵜ ⴰⵔ ⴰⵏⵇⴰⵔ ⵏⵏⵙ, ⴷⵖⵉ ⵍⵍⴰⵏⵜ ⵜⵎⵖⵔⵉⵡⵉⵏ ⵉⵜⵜⴽⴽⴰⵏ ⵖⵉⵔ ⵢⴰⵏ ⵡⴰⵙⵙ, ⵍⵓⵎⴰⵔ ⴳ ⵜⵎⴷⵉⵏⵉⵏ, ⵍⵍⵉⵖ ⵢⵓⴼ ⴷⵖⵉ, ⵍⵍⵉⵖ ⵜⴰⵎⵖⵔⴰ ⵜⵖⵔⴰ ⵉ ⴽⵯⵓ ⵢⵉⵡⵏ, ⵙⵡⴰ ⵡⴰⵏⵏⴰ ⵉⵟⵕⵕⵃⵏ ⵙⵡⴰ ⵡⴰⵏⵏⴰ ⵎⵉ ⵉⴷⵔⵓⵙ ⵍⵃⴰⵍ, ⴳⴰⵏ ⴰⴽⴽⵯ ⵎⴷⴷⵏ ⵢⴰⵏ, ⵡⴰⵏⵏⴰ ⵉⵙⵙⵏⵏ ⴰⴷ ⵉⴱⴱⵉ ⴰⵎⴰⵔⴳ ⴷ ⵉⵣⵍⴰⵏ ⵣⵓⵏ ⴷ ⵉ ⴰⴽⴽⴰⵏ ⵎⴷⴷⵏ ⵓⴷⴷⵓⵔ ⴷ ⵡⴰⵜⵉⴳ ⴰⵎⵇⵔⴰⵏ. ⵍⵍⵉⵖ ⴷⴰ ⵏⵙⵙⴼⵍⵉⴷ ⵉ ⵜⵖⵔⴰⵜⵉⵏ ⴽⴽⴰⵏⵜ ⵉⴳⵏⵏⴰ ⵡⴰⵍⴰ ⴰⴽⴰⵍ, ⴷⵖⵉ ⵓⵔ ⵢⴰⴷ ⵙⵓⵍⵏⵜ ⵜⵖⵔⴰⵜⵉⵏ ⵓⵍⴰ ⵙⵓⵍⵏ ⵉⵃⵉⴷⴰⵙ ⵡⴰⵎⵎ ⵡⵉⵍⵍⵉⵖ.
ⵎⵓⵍⴰⵢ ⵍⵃⵓ ⵉⵏⵏⴰ ⴷⵉⵖ: ⵉⴳⴰ ⵓⵃⵉⴷⵓⵙ ⵣⵓⵏ ⴷ ⵜⵉⵏⵎⵍ, ⴷⴰ ⵉⵙⵙⵍⵎⴰⴷ ⵜⵉⵄⵄⵓⵔⵎⴰ ⵖⴼ ⵓⵙⵡⵉⵏⴳⵎ ⴷ ⵜⵓⵙⵙⵏⴰ ⵏ ⵡⴰⵡⴰⵍ. ⵉⴳⴰ ⵜⴰⵥⵓⵕⵉ ⵉⵟⵟⴼⵏ ⵜⵉⵎⵉⵜⴰⵔ ⵏ ⵢⵉⵔⵉⵔ ⴷ ⵜⵔⵙⴰⵍ ⵉⵚⵃⴰⵏ ⵏ ⵜⵓⵙⵙⵏⴰ. ⵣⵓⵏ ⴷ ⵡⴰⵏⵏⴰ ⵉⵔⴰⵏ ⴰⴷ ⵢⵉⵔⵉⵔ ⴰⵃⵉⴷⵓⵙ ⴳ ⵉⵔⴳⵣⵏ ⵉⴼⵓⴽⴽ ⴰⴷ ⵉⵍⵙ ⵜⴰⵊⵍⵍⴰⴱⵉⵢⵜ ⵜⴰⵎⵍⵍⴰⵍⵜ “ⵍⴼⴰⵍ ⵓⵎⵍⵉⵍ” ⵏⵏⴰ ⵢⴰⵖ ⵉⵙⵏⵄⵜⵏ ⵜⴰⵣⴷⴳⵉ ⴷ ⵏⵏⵉⵢⵜ ⵏ ⵓⵎⴷⵢⴰⵣ. ⵓⵍⴰ ⵜⵉⵡⵜⵎⵉⵏ ⴷⴰ ⵍⵙⵙⴰⵏⵜ ⵜⵉⵛⴹⴰⴹ ⴷ ⵉⵃⴱⵉⵔⵔⴰⵏ, ⴷ ⵜⵙⴱⵏⵉⵢⵜ ⵉ ⵜⵉⵏⵏⴰ ⵢⵉⵡⵍⵏ ,ⵜⵉⵏⵏⴰ ⵉⵍⵙⴰⵏ ⵜⴰⵙⴱⵏⵉⵢⵜ ⴳⵉⵏⵜ ⵜⴰⵥⵓⵍⵜ ⵜⵉⵏⵏⴰⵖ ⵀⴰⵜ ⵉⵡⵍⵏⵜ ⵢⴰⴷ, ⵜⵉⵏⵏⴰ ⵉⵍⵙⴰⵏ ⵉⵃⴱⵉⵔⵔⴰⵏ ⵓⵔ ⴳⵉⵏⵜ ⵜⴰⵥⵓⵍⵜ ⵀⴰⵜ ⵓⵔ ⵜⴰ ⵉⵡⵉⵍⵏⵜ. ⵜⵉⵔⴱⴰⵜⵉⵏ ⵏⵏⴰ ⵉⵏⴽⵔⵏ ⵙ ⴰⵃⵉⴷⵓⵙ ⴰⵔ ⵜⴳⴳⴰⵏⵜ ⵜⴰⵡⵔⴰⵔⵔⴰⵢⵜ, ⴰⵔ ⵜⵜⵔⴰⵔⴰⵏⵜ ⵉⵣⵍⵉ ⵉ ⴰⵢⵜ ⵓⵃⵉⴷⵓⵙ ⴷⴷⴰ ⴳ ⵜ ⴳⵔⵏ.
ⴰⵔⴽⴰⴹ ⵏ ⵜⵃⵉⴷⵓⵙⵜ ⵏ ⵉⵎⴳⵓⵏⵏ ⴰⵔ ⴷⵉⴷⵙ ⵜⵜⵎⵓⵏ ⵜⵉⵢⵜⵉ ⵏ ⵉⴳⴷⵎ ⴷ ⵓⵛⴱⵇⴰ ⵏ ⵉⴼⴰⵙⵙⵏ, ⵜⴰⵡⴰⴷⴰ ⵏ ⵜⵡⵜⵎⵉⵏ ⵓⵍⴰ ⵜⵉⵏ ⵉⵔⴳⵣⵏ ⵜⵎⴰⵏ ⴷ ⵡⴰⵍⵍⵓⵏ, ⵢⴰⵏ ⵓⵔ ⵉⵣⵡⴰⵔ ⵢⴰⵏ , ⵢⴰⵜ ⵓⵔ ⵜⵣⵡⴰⵔ ⵜⴰⵢⴹ, ⴰⵔ ⵜⵜⵉⵔⵉⵔⵏ ⵙ ⵍⵎⵉⵣⴰⵏ, ⵎⴰⵛⴰⵏ ⵎⵓⵍⴰⵢ ⵍⵃⵓ ⴷⴰ ⵉⵥⵕⵕⴰ ⵎⴰⵙ ⴷ ⴰⵏⴰⵡⵏ ⵉⵎⴰⵢⵏⵓⵜⵏ ⵏⵏⴰ ⴷ ⵉⴽⵛⵎⵏ ⵙ ⵜⵎⴰⵣⵉⵔⵜ ⵣⵓⵏ ⴷ ⵜⴰⴳⵔⵓⴱⴱⵉⵜ ⵏⵖ ⴷ ⵉⴷ ⵍⴳⵔⵓⴱ, ⵉⵏⵏⴰ ⴷⴰ ⵏⵇⵇⴰⵏ ⴰⵃⵉⴷⵓⵙ ⴰⵏⵚⵍⵉⵢ , ⵉⵏⵏⴰ ⴰⵏⵛⵜ ⴷⴷⵖ ⵏ ⵉⵎⴰⵙⵙⵏ ⵉⵜⵉⴽⵏⵓⵍⵓⵊⵉⵢⵏ ⴼⴽⴰⵏ ⵉ ⵎⴷⴷⵏ ⴰⵏⵙⵉⵡⵏ ⴳ ⵥⵕⵕⴰⵏ ⴰⵃⵉⴷⵓⵙ ⵙ ⵜⵡⵍⴰⴼⵉⵏ ⴷ ⵉⴷ ⵍⴼⵉⴷⵢⵓ, ⵓⴽⴰⵏ ⴰⵢⴷⴷⵖ ⴽⵓⵍⵍ ⴰⵔ ⴰⵙ ⵉⵜⵜⴽⴽⵙ ⵓⴷⴷⵓⵔ ⵉ ⵓⵃⵉⴷⵓⵙ, ⴰⵔ ⴰⵙ ⵉⴹⴹⴰⵕ ⵡⴰⵜⵉⴳ ⵏⵏⵙ .
ⴰⵢⵏⵏⴰⵖ ⴰⴳ ⴰⴽ ⵉⵏⵏⴰ ⵎⵓⵍⴰⵢ ⵍⵃⵓ: ⵜⵉⵡⴹ ⵜⵉⵣⵉ ⴳ ⵉⵍⴰⵣⵎ ⴰⴷ ⵏⴰⵎⵥ ⴰⴼⵓⵙ ⵉ ⵓⵃⵉⴷⵓⵙ ⴰⴷ ⵓⵔ ⵉⴷⴷⵓ, ⵉⵍⴰⵣⵎ ⴰⴷ ⵏⵙⵎⵓⵜⵜⵔ ⵉⵣⵍⴰⵏ ⵉⵇⴱⵓⵔⵏ ⵏⵏⴰ ⵉⵜⵜⵙⵎⵓⵔⵏ, ⵜⴰⵙⵔⵜⵉⵜ ⵏ ⵜⵓⵙⵙⵏⴰ ⵓⵍⴰ ⵜⴰⵏⴹⴻⴹⵜ ⵢⵉⵡⴹ ⵡⴰⵙⵙ ⴳ ⵉⵍⴰⵣⵎ ⴰⴷ ⵜⵙⴽⵛⵎ ⵜⴰⵥⵓⵕⵉ ⴷⴷⵖ ⵙ ⵜⵉⵏⵎⵍ ⵓⵍⴰ ⵜⴰⵙⴷⴰⵡⵉⵜ ⴰⴼⴰⴷ ⴰⵙ ⵜⵜⴻⵍⵎⴰⴷⵏ ⵉⵏⵍⵎⴰⴷⵏ ⵓⵍⴰ ⵉⵎⵣⵔⴰⵡⵏ ⵎⴽ ⵜⵔⴰ ⵜⵎⴰⵡⴰⵙⵜ ⵏ ⵜⵓⵙⵙⵏⴰ ⵓⵍⴰ ⵜⵉⵏ ⵜⴷⵍⵙⴰ ⴰⴷ ⵜⵉⴷⵉⵔ ⵜⵥⵓⵕⵉ ⵏ ⵜⵎⴰⵣⵉⵖⵜ ⵍⵓⵎⴰⵕ ⵜⴰⵥⵓⵕⵉ ⵜⴰⵇⴱⵓⵔⵜ ⵏⵏⴰ ⵉⵍⵍⴰⵏ ⴳ ⴽⵉⴳⴰⵏ ⵏ ⵜⵙⴳⴳⵯⵉⵏ ⵏ ⵍⵎⵖⵔⵉⴱ.
ⵎⵉⵛⵉⵍ ⴱⵉⵔⵓ ⵉⵙⴰⵡⵍ ⵖⴼ ⵓⴷⵎⴰⵡⵏ ⵉⵎⴰⵢⵏⵓⵜⵏ ⵏ ⵓⵎⴰⵔⴳ ⴷ ⵓⵃⵉⴷⵓⵙ ⴷⴷⴰ ⴳ ⵢⴰⵔⴰ ⵖⴼ ⵓⵏⴰⵥⵓⵕ ⴰⵎⵇⵔⴰⵏ ⵜⴰⵎⵍⵍⴰ ⵏ ⵔⴱⴱⵉ ⵖⵉⴼⵙ “ⵎⵓⵃⵎⵎⴰⴷ ⵔⵡⵉⵛⴰ” ⵏⵏⴰ ⵉⵜⵜⵢⴰⵙⵙⴰⵏⵏ ⵙ ⵢⵉⵔⵉⵔ ⵏⵏⵙ ⵉⵣⴷⴷⵉⴳⵏ ⵖⴼ: «ⵎⴰⵜⵜⴰ ⵣⵣⵎⴰⵏ ⵉⵙⴰⴳⴳⴰⵏ, ⵎⴰⵏⵉ ⵣⵣⵎⴰⵏ ⵉⵖⵓⴷⴰⵏ» ⵜⵉⵣⵍⵉⵜ ⴰⴷ ⵢⵓⵍⵙ ⴰⵙ ⵓⵏⴰⵥⵓⵕ ⵓⵕⵃⵃⵓ ⴷ ⵎⵓⵏⵉⵔ» ⴱⴻⵢⵔⵓⵏ: 2019 ⵜⵉⵣⵍⵉⵜ ⴰⴷ ⵜⵓⵡⵉ ⴷ ⵖⴼ ⵓⴷⵎ ⴰⵎⴰⵢⵏⵓ ⵏ ⵉⵣⵍⴰⵏ ⴷ ⵓⵎⴰⵔⴳ, ⵎⵓⵍⴰⵢ ⵍⵃⵓ ⵉⵏⵏⴳⵍⴰ, ⵉⵇⵏⴹ ⵖⴼ ⵡⴰⴷⴷⴰⴷ ⵏⵏⴰ ⵢⵉⵡⴹ ⵓⵃⵉⴷⵓⵙ, ⴰⵢⵏⵏⴰⵖ ⴰⴳ ⴷⴰ ⵉⴳⴳⴰⵔ ⴰⵖⵓⵢⵢⵉ ⵉ ⵉⵏⴰⵖⵎⴰⵙⵏ ⵓⵍⴰ ⵡⵉⵏⵏⴰ ⵉⵙⵡⵓⵔⵉⵏ ⴳ ⵢⵉⴳⵔ ⵏ ⵜⵓⵙⵙⵏⴰ ⵏ ⵜⵥⵓⵕⵉ ⴰⴷ ⵔⴰⵔⵏ ⵍⴱⴰⵍ ⵙ ⵓⵃⵉⴷⵓⵙ ⵏⵏⴰ ⵉⵜⵜⵙⵎⵓⵔⵏ ,ⴰⵙⵙ ⴹⴰⵕⵜ ⵡⴰⵙⵙ.
«ⴰⴳⵔⴹ ⵏⵖ ⴷ ⴰⵡⴰⵍ ⵉⴳⴰ ⵣⵓⵏ ⴷ ⵉⴼⵉⵍⵓ ⵉⵙⵙⵍⴽⴰⵎⵏ ⵜⴰⴱⵔⴰⵜ ⵉ ⵓⵢⴷⵓⴷ, ⵉⴳ ⴰⵙ ⵉⵃⵍⴰ ⵓⴳⵔⴹ ⵉ ⵍⵄⵔⵉⴼ ⴰⵔ ⵜⵍⴽⴽⵎ ⵜⴱⵔⴰⵜ ⵏⵏⵙ, ⵎⴰⵛⴰⵏ ⴰⵢⴷⵓⴷ ⴰⵔ ⵉⵜⵜⵉⵄⵇⵉⵍ ⵉ ⵉⵣⵍⴰⵏ ⵙ ⵜⵎⴽⵜⵉⵜ ⵏ ⵡⴰⵍⵏⵉ ⵏⵏⵙ...» ⵣⵓⵏⵜⵀⵓⵔ : 1983
ⵥⴰⵏⵟⵓⵔ ⵉⵏⵏⴰ ⴳ ⵜⴳⵓⵔⵉ ⴷⴷⵖ ⵏⵏⵙ ⵎⴰⵙ ⴷ ⴰⴳⵔⴹ ⵏ ⵍⵄⵔⵉⴼ ⵏⵜⵜⴰ ⴰⴷ ⵏⵏ ⵉⵙⵙⵍⴽⴰⵎⵏ ⵍⵎⵄⵏⴰ, ⵢⴰⵏ ⵓⵎⴰⵔⵉⵔ ⵉⵟⵟⴰⴼⵏ ⴰⵎⴳⴳⵔⴹ ⵉⵃⵍⴰⵏ ⴰⵔ ⴰⵙ ⵙⵙⴼⵍⵉⴷⵏ ⵎⴷⴷⵏ ⴽⵉⴳⴰⵏ, ⴰⵔ ⴰⵙ ⵜⵜⵉⵍⵉⵏⵜ ⵜⵖⵔⴰⵜⵉⵏ.
ⵙ ⵓⵣⴳⵣⵍ, ⴰⵎⴷⵢⴰⵣ ⵏⵏⵖ ⵎⵓⵍⴰⵢ ⵍⵃⵓ ⵏⵏⴰ ⵎⵉ ⵖⵓⵔ ⵉⴳⴰ ⵓⵃⵉⴷⵓⵙ ⵣⵓⵏ ⴷ ⵜⵉⵟⵟ ⵏⵏⵙ, ⵉⵔⴰ ⴰⴷ ⴼⵔⴽⵏ ⵎⴷⴷⵏ ⵉ ⵜⵎⴰⴹⵓⵏⵜ ⵢⴰⵖⵏ ⴰⵃⵉⴷⵓⵙ, ⵉⵔⴰ ⴰⴷ ⵉⴽⵛⵎ ⵙ ⵜⵉⵏⵎⵍ ⴰⴼⴰⴷ ⵉⵣⵔⵉ ⵙ ⵓⵍⵎⵎⵓⴷ ⵉ ⵉⵎⵥⵥⴰⵏⵏ, ⵜⴼⴽ ⵜ ⵜⵙⵓⵜⴰ ⵉ ⵜⴰⵢⴹ, ⴰⵢⵏⵏⴰⵖ ⴰⴳ ⵉⵏⵓⵔⵣ ⴽⵉⴳⴰⵏ ⴳ ⵜⵎⴰⵡⴰⵙⵜ ⵏ ⵜⵓⵙⵙⵏⴰ ⴷ ⵜⵎⴰⵡⴰⵙⵜ ⵏ ⵓⵙⵙⵍⵎⴷ ⴰⵎⵏⵣⵓ ⵓⵍⴰ ⵜⵉⵏ ⵜⵙⴷⴰⵡⵉⵜ .
ⵉⵎⴰⵙⵙⵏ ⵉⵜⵉⴽⵏⵓⵍⵓⵊⵉⵢⵏ ⴳⴰⵏ ⵉⴳⵍⴷⴰⵏ ⵉ ⵓⵃⵉⴷⵓⵙ ⴰⵍⵍⵉⴳ ⵢⵉⵡⴹ ⴰⵎⴰⴹⴰⵍ ( ⴰⵎⵙⵢⴰⵔⴰ ⴷ ⵉⵙⵇⵙⵉⵜⵏ ⴷ ⵜⵎⵔⴰⵔⵓⵜⵉⵏ ⴷ ⵓⵏⴰⵥⵓⵕ (ⵢⵓⵙⴼ ⴱⴰⵍⵀⵡⴰ ) ⴰⵙⵍⵡⴰⵢ ⵏ ⵜⵔⴰⴱⴱⵓⵜ ⵜⴰⵃⵉⴷⵓⵙⵜ ⵏ ⵉⵎⴳⵓⵏⵏ.
ⴰⵏⴰⵥⵓⵕ ⵏⵏⵖ ⵡⵉⵙⵙ ⵙⵉⵏ ⵉⴳⴰⵏ ⵢⵓⵙⴼ ⴱⴰⵍⵀⵡⴰ, ⵢⴰⵏ ⵓⵄⵔⵔⵉⵎ ⵏⵏⴰ ⵉⵍⵓⵍⴰⵏ ⴳ ⵓⵙⴳⴳⵯⴰⵙ ⵏ 1981, ⵢⴰⵎⵓ ⴳ ⵜⵙⵓⵜⴰ ⵏ ⴷⵖⵉ, ⵉⴳⴰ ⴰⵙⵍⵡⴰⵢ ⵏ ⵜⴰⵔⴰⴱⴱⵓⵜ ⵏ “ⵜⴰⵃⵉⴷⵓⵙⵜ ⵏ ⵉⵎⴳⵓⵏⵏ’’ ⵏⵏⴰ ⵎⵉ ⵜⵜⵉⵏⵉⵏ ⴰⵡⴷ (ⵜⴰⵔⴰⴱⴱⵓⵜ ⵏ ⵜⵉⵣⵣⵡⵉⵜ ), ⵜⴰⵔⴰⴱⴱⵓⵜ ⴰⴷ ⵜⵜⵢⵓⵙⴽⴰⵔ ⴰⵙⴳⴳⵯⴰⵙ ⵏ 2006.
ⵉⵏⵏⴰ ⵢⵓⵙⴼ ⴱⴰⵍⵀⵡⴰ: ⵜⴰⵥⵓⵕⵉ ⴷⴷⵖ ⵏ ⵓⵕⴽⴰⴹ ⵏ ⵉⵎⴳⵓⵏⵏ ⵜⵍⵍⴰ ⵙⴳ ⵎⴰⴷ ⵉⴱⴷⴰ ⵍⵄⵔⵉⴼ “ⴰⵃⵎⴰⵎ ⴰⵎⵙⴽⴰⵏ” ⴳ ⵓⵙⴳⴳⵯⴰⵙ ⵏ 60 ⴰⵔ ⵜⵜⴰⵖ ⴰⵃⵉⴷⵓⵙ. ⴰⵔ ⵜ ⵉⵙⵙⵍⵎⴰⴷ ⵉ ⵉⵄⵔⵔⵉⵎⵏ ⵏ ⵉⵖⵔⵎ, ⵎⴰⵛⴰⵏ ⴰⵙⵍⵎⴰⴷ ⵏ ⵓⵕⴽⴰⴹ, ⵍⴰⵃⵙⵏ ⵣⵉⵏⵓⵏ ⵉⵏⵏⴰ ⵎⴰⵙⵙⴰ ⵜⴰⵎⵖⴰⵔⵜ ⵏ ⵓⵃⵕⴹⴰⵏ ⵏⵏⴰ ⵎⵉ ⵖⵓⵔ ⵜⵄⵣⵣⴰ ⴽⵉⴳⴰⵏ ⵜⵃⵉⴷⵓⵙⵜ ⴷⴷⵖ ⵏ ⵉⵎⴳⵓⵏⵏ, ⴰⵢⴷ ⴰⵙ ⵉⵣⴰⵢⴷⵏ ⴽⵔⴰ ⵏ ⵉⵎⵓⵙⵙⵓⵜⵏ ⴷ ⴽⵔⴰ ⵏ ⵜⵖⴰⵡⵙⵉⵡⵉⵏ ⴰⴽⴽⵯ ⴳ ⵢⵉⵔⵉⵔ ⵓⵍⴰ ⵉⴽⵯⵍⴰⵏ ⴰⵍⵍⵉⴳ ⵖⵓⵔⵙ ⵉⵍⵍⴰ ⵡⵓⴷⵎ ⴷⴷⵖ ⴰⵎⴰⵢⵏⵓ ⵉⵙⵙⵓⵙⵎⵏ ⴽⵉⴳⴰⵏ ⵏ ⵎⴷⴷⵏ ⴳ ⵓⵎⴰⴹⴰⵍ”
ⵜⴰⵥⵓⵕⵉ ⴷⴷⵖ ⵏ ⵓⵃⵉⴷⵓⵙ ⵜⴳⴰ ⵢⴰⵜ ⴳ ⵜⵖⴰⵡⵙⵉⵡⵉⵏ ⵏⵏⴰ ⴷ ⵉⵜⵜⴰⵡⵉⵏ ⴰⴹⴰⵕ ⵉ ⵎⴷⴷⵏ ⴰⵔⴷ ⵏⵏ ⴽⴽⵉⵏ ⵜⴰⵎⴰⵣⵉⵔⵜ ⵏ ⴷⴰⴷⵙ ⵓⵍⴰ ⵜⵉⵏ ⵉⵎⴳⵓⵏⵏ, ⵓⵍⴰ ⵜⴰⵎⴰⵣⵉⵔⵜ ⵏ ⴷⵔⴰ ⵜⴰⴼⵉⵍⴰⵍⵜ ⵙⴳ ⵓⴼⵍⵍⴰ. ⵢⵓⵙⴼ ⴱⴰⵍⵀⵡⴰ ⵏⵏⴰ ⵉⴳⴰⵏ ⴰⵙⵍⵡⴰⵢ ⵏ ⵜⵔⴰⴱⴱⵓⵜ “ⵜⴰⵃⵉⴷⵓⵜ ⵏ ⵉⵎⴳⵓⵏⵏ” ⵉⵏⵏⴰ: ⵍⵍⴰⵏ ⵉⵎⴰⵔⵉⵔⵏ ⴷ ⵉⴷ ⵍⵄⵔⵉⴼ ⵉⵇⴱⵓⵕⵏ ⵏⵏⴰ ⵉⴽⴽⴰⵏ ⵓⴳⴳⴰⵔ ⵏ 100 ⵏ ⵜⵎⵓⵔⴰ ⵏ ⵓⵎⴰⴹⴰⵍ ⴳ ⵜⵓⴷⵔⵜ ⵏⵏⵙⵏ ⵙⴳ ⵉⵙⴳⴳⵯⴰⵙⵏ ⵏ 60 ⴰⵔ ⴷⵖⵉ , ⵉⵍⵉⴳⵏ ⵏ ⵓⵎⵓⴷⴷⵓ ⵏⵖ ⴷ ⵍⴱⴰⵙⴱⴱⵓⵕ ⵏⵏⵙⵏ ⴷⴰ ⴰⵖ ⵉⵙⵏⵄⴰⵜ ⴰⵢⴰ.
ⴱⴰⵍⵀⵡⴰ ⵢⵓⵍⵖ ⴽⵉⴳⴰⵏ ⵉⵎⴰⵙⵙⵏ ⵉⵜⵉⴽⵏⵓⵍⵓⵊⵉⵢⵏ, ⵉⵏⵏⴰ ⵏⵉⵜⵏⵉ ⴰⴷ ⵏⵏ ⵉⵙⵙⵉⵡⵉⴹⵏ ⵜⴰⵃⵉⴷⵓⵙⵜ ⵏ ⵉⵎⴳⵓⵏⵏ ⵉ ⵓⵎⴰⴹⴰⵍ, ⵍⵓⵎⴰⵕ “ⵢⵓⵜⵢⵓⴱ ⴷ ⵜⵡⵉⵜⵔ, ⴰⵏⵙⵜⴰⴳⵔⴰⵎ, ⴷ ⵉⴷ ⵍⴼⵉⴷⵢⵉ ⴷ ⵜⴷⴰⴱⵓⵜⵉⵏ ⵏ ⵜⵜⵍⴼⴰⵣⴰ ⵣⵓⵏ ⴷ ⵜⵉⵙⵙ ⵜⴰⵎ ⵏⵏⴰ ⵉⴳⴰⵏ ⵜⵉⵏ ⵜⵎⴰⵣⵉⵖⵜ, ⵉⵎⴰⵙⵙⵏ ⴰⴷ ⴽⵓⵍⵍⵓ ⴰⵔ ⵜⵜⴰⵡⵙⵏ ⴰⴷ ⵉⵜⵜⵢⴰⵙⵙⵏ ⵓⵃⵉⴷⵓⵙ ⵢⴰⵡⴹ ⴰⴼⵍⵍⴰ ⵢⴰⵡⴹ ⵜⵉⵎⵉⵣⴰⵔ ⵄⵕⵇⵏⵉⵏ.
ⴳ ⵓⴱⵔⵉⴷ ⴷⴷⵖ ⴰⵜⵉⴽⵏⵓⵍⵓⵊⵉⵢ ⵢⵉⵡⵉ ⴷ ⵎⵉⵛⵉⵍ ⴱⵉⵢⵔⵓ ⴽⵕⴰⴹ ⵉⵣⵎⴰⵣ ⵏⵏⴰ ⵉⵙⵏⴼⴰⵍⵏ ⴰⵔ ⴰⴽⴽⴰⵏ ⵓⴷⵎ ⴰⵎⴰⵢⵏⵓ ⵉ ⵜⵣⵍⵉⵜ ⴷ ⵡⵓⵔⴰⵔ ⴰⵎⴰⵣⵉⵖ ⴳ ⵍⵎⵖⵔⵉⴱ:
- 1980-1995: ⴰⴷⴷⴰⴷ ⴰⵎⵣⵡⴰⵔⵓ, ⵜⵉⵣⵉ ⴷⴷⵖ ⵉⵏⵏⴰ ⵖⵉⴼⵙ ⵎⵉⵛⵉⵍ ⴱⵉⵔⵓ: ⵜⵜⵓⵢⴰⵙⵙⵏ ⵙ ⵜⴰⵙⵙⴼⵉⴼⵜ (ⵍⴽⴰⵚⵉⵟⴰ) ⵏⵏⴰ ⵉⵍⴰⵏ ⵙ ⵡⴰⵜⵉⴳ 8 ⵏ ⵉⴷ ⴷⵔⵀⵎ. ⵣⵓⵏ ⴷ ⵜⴰⵙⵙⴼⵉⴼⵜ ⵏ ⵔⵡⵉⵛⴰ, ⵎⵍⵍⴰⵍ, ⵎⴰⵖⵏⵉ, ⴰⵣⵍⵎⴰⴹ, ⴼⴰⵟⵉⵎⴰ ⵜⴰⴱⴰⵄⵎⵕⴰⵏⵜ, ⵡⴰⵍⵉⴷ ⵎⵉⵎⵓⵏ ⴷ ⵡⵉⵢⵢⴰⴹ ⴳⴳⵓⴷⵉⵏ...
- 1995-2005: ⴰⴷⴷⴰⴷ ⵡⵉⵙⵙ ⵙⵉⵏ ⵜⴼⴼⵖ ⴷ ⵜⴰⵙⵙⴼⵉⴼⵜ ⵏ ⵍⴼⵉⴷⵢⵓ, ⵉⵜⵜⵢⴰⵙⵙⵏ ⵓⵣⵎⵣ ⵏⵏⴰⵖ ⵙ ⵎⵓⵃⴰ ⵓⵍⵃⵓⵙⵉⵏ ⴰⵛⵉⴱⴰⵏ ⴷ ⵉⴷ ⵓⴼⵉⵍⵎ ⵏ ⵜⵙⴳⴰ ⵙⵓⵙ.
- “ⵙⴳ 2005, ⵉⵙⵓⵍ ⵍⴼⵉⴷⵢⵓ ⵎⴰⵛⴰⵏ ⴰⵢⵓⵜⵢⵓⴱ ⵉⵜⵜⵢⵓⵙⵙⵏ ⴷⵉⵖ ⵓⴳⴳⴰⵔ ⴰⵔ ⵥⴰⵔⵙ ⴳⴳⴰⵔⵏ ⵉⵏⴰⵥⵓⵕⵏ ⵜⵉⵣⵍⴰⵜⵉⵏ ⵏⵏⵙⵏ, ⵢⴰⵎⵓ ⴳ ⵎⴰⴷ ⵉⴳⴰⵏ ⴰⵙⵓⵙⵙⵏ ⵉ ⴽⵉⴳⴰⵏ ⵏ ⵉⵏⴰⵥⵓⵕⵏ ⴳ ⵡⴰⵟⵍⴰⵚ ⴰⵏⴰⵎⵎⴰⵙ ⵓⵍⴰ ⴰⵙⴰⵎⵎⵔ” ⴱⵉⵢⵔⵓ: 2019.
ⵉⵎⴽⵉ ⵏⵏⴰ ⵏⵥⵕⴰ ⴳ ⵡⴰⴷⴷⴰⴷⵏ ⴷⴷⵖ ⵏⵏⴰ ⵉⴳⴰ ⵎⵉⵛⵉⵍ ⴱⵉⵢⵔⵓ, ⵏⵔⵎⵙ ⵉⵙ ⴷ ⵉⵎⴰⵙⵙⵏ ⵉⵜⵉⴽⵏⵓⵍⵓⵊⵉⵢⵏ ⴷ ⵡⴰⵏⵙⴰⵜⵏ ⵏ ⵍⴰⵏⵜⵉⵔⵏⵉⵜ ⵣⵓⵏ ⴷ ⵢⵓⵜⵢⵓⴱ ⴷ ⵓⴼⴰⵢⵙⴱⵓⴽ ⴰⵎⵓⵏ ⴳ ⵡⵉⵏⵏⴰ ⵉⴳⴰⵏ ⵉⵢⵍⴷⴰⵏ, ⵙⴱⵓⵖⵍⵓⵏ ⵜⴰⵃⵉⴷⵓⵙⵜ ⵏ ⵉⵎⴳⵓⵏⵏ ⴰⵍⵍⵉⴳ ⵜⵜⵡⴰⵙⵙⵏ, ⴰⵔ ⴰⵙⵏ ⴷ ⵇⵇⴰⵔⵏ ⵎⴷⴷⵏ ⵙⴳ ⵜⵎⵏⴰⴹⵉⵏ ⵏ ⵍⵎⵖⵔⵉⴱ ⵓⵍⴰ ⵜⵉⵎⵉⵣⴰⵔ ⵏ ⴱⵕⵕⴰ ⵏ ⵜⵎⵓⵔⵜ. ⴰⵢⴷⴷⵖ ⴰⴷ ⴷ ⵢⵉⵡⵉⵏ ⴰⵍⵍⵉⴳ ⴷⴰ ⵉⵙⵡⵉⵏⴳⵉⵎ ⴱⴰⵍⵀⵡⴰ ⴷ ⵉⵎⴷⴷⵓⴽⴽⴰⵍ ⵏⵏⵙ ⴳ ⵜⵔⴰⴱⴱⵓⵜ ⴰⴷ ⵣⵎⵎⴻⵎⵏ ⵜⴰⵥⵓⵕⵉ ⴷⴷⵖ ⴳ ⵢⵓⵏⵉⵙⴽⵓ ⴰⵛⴽⵓ ⵜⴰⵎⵓ ⴳ ⵓⵢⴷⴷⴰ ⴰⴷⵍⵙⴰⵏ ⴰⵏⴰⴼⴳⴰⵏ ⴰⵇⴱⵓⵔ.
ⴰⵄⵔⵔⵉⵎ ⴷⴷⵖ ⴱⴰⵍⵀⵡⴰ ⵢⵓⵙⵉ ⵙⵙⵄⵔ ⵉ ⵓⵃⵉⴷⵓⵙ , ⴰⵔ ⵉⵙⵡⵓⵔⵉ ⴽⵉⴳⴰⵏ , ⴷ ⴰⵔ ⵉⵜⵜⴰⵡⵙ ⵙ ⵉⵎⴰⵙⵙⵏ ⵉⵜⵉⴽⵏⵓⵍⵓⵊⵉⵢⵏ, ⵉⵙⵙⴽⵔ ⵏⵜⵜⴰ ⴷ ⵉⵎⴷⴷⵓⴽⴽⴰⵏ ⵏⵏⵙ ⵜⴰⴷⴰⴱⵓⵜ ⵏⵏⵙⵏ ⴳ ⵢⵓⵜⵢⵓⴱ, ⴰⵔ ⴰⵙⵏ ⴷ ⵜⵙⴽⵛⴰⵎ ⵉⴷⵔⵉⵎⵏ, ⴰⵔ ⵏⵏ ⵙⵙⵍⴽⴰⵎⵏ ⵜⵉⵣⵍⴰⵜⵉⵏ ⵏⵏⵙⵏ ⵉ ⵓⵢⴷⵓⴷ ⵏⵏⵙⵏ ⴳ ⵜⵎⵓⵔⵜ ⵏ ⵍⵎⵖⵔⵉⴱ ⵓⵍⴰ ⴱⵕⵕⴰ ⵏⵏⵙ. ⴰⵔ ⵜⵜⴰⵍⵙⵏ ⵉ ⵉⵣⵍⴰⵏ ⵉⵇⴱⵓⵔⵏ ⵓⵍⴰ ⵉⵎⴰⵢⵏⵓⵜⵏ .
ⴰⵢⴰ ⴰⵔ ⴰⵙⵏ ⵉⵜⵜⵣⴰⵢⴰⴷ ⴳ ⵓⵢⴷⵓⴷ ⵏⵏⴰ ⵜⵏ ⵉⵟⴼⴰⵔⵏ ⵙⴳ ⵢⵓⵜⵢⵓⴱ, ⴰⵔ ⵜⵣⴰⵢⴰⴷⵏ ⴰⵡⴷ ⵏⵉⵜⵏⵉ ⵉⵎⴰⵙⵙⵏ ⵢⴰⴹⵏ ⵏ ⵓⵥⴰⵡⴰⵏ ⵉ ⵜⵥⵓⵕⵉ ⵏⵏⵙⵏ ⵣⵓⵏ ⴷ ⵜⴰⵍⴳⵉⵜⴰⵔⵜ, ⴷ ⵉⴷ ⴷⵊⴰⵎⴱⵉ, ⴰⵔ ⵕⵥⵥⵎⵏ ⵜⵉⴼⵍⵓⵜ ⵖⴼ ⵉⵎⴰⵙⵙⵏ ⵉⵎⴰⵢⵏⵓⵜⵏ ⵏ ⵓⵥⴰⵡⴰⵏ ⴰⴼⴰⴷ ⴰⴷ ⴽⵛⵎⵏ ⵙ ⵡⵓⵍ ⵉ ⵎⴷⴷⵏ ⴳ ⵓⵎⴰⴷⴰⵍ ⴽⵓⵍⵍ.