ⴱⴰⴱⴰ ⵄⵍⵉ
ⴱⴰⴱⴰ ⵄⵍⵉ ⵉⴳⴰ ⵢⴰⵏ ⵓⵙⴷⴷⵉ ⴰⵛⵍⵃⵉ, ⴰⵔ ⵣⵔⴰⵢⵏ ⵜⵙⴷⴷⵉⵢⵉⵏ ⵏⵏⵙ ⵖ ⵜⴱⴰⴷⵓⵜ ⵜⴰⵎⴰⵣⵉⵖⵜ ⵣⵖ ⵜⵓⴷⴷⵎⴰ ⵏ ⵡⴰⵢⵢⵓⵔ ⵏ ⵡⵓⵥⵓⵎ ⵏ ⵓⵙⴳⴳⵯⴰⵙ ⵏ 2021 ⴽⵔⴰⵢⴳⴰⵜ ⴰⵙⵙ ⴷⴼⴼⵉⵔ ⵜⴳⵎⴳⵉⵎⵜ[1]. ⴳ ⵢⴰⵏ ⵓⵙⵓⵏ ⴰⵎⵙⴷⵔⴰⵔ ⵖ ⵍⵍⴰⵏ ⵉⵎⵓⵖⵍⵉⵜⵏ ⴼⵓⵍⴽⵉⵏⵉⵏ ⴽⵉⴳⴰⵏ, ⵖ ⵜⵍⵍⴰ ⴽⵉⴳⴰⵏ ⵏ ⵜⵣⴳⵣⵓⵜ ⴷ ⵡⴰⵎⴰⵏ, ⵖ ⵢⴰⵏ ⵓⴹⵡⴰⵕ ⵖ ⵉⵊⵓⴽⴰⴽ ⵖ ⵜⵙⴳⴰ ⵏ ⵍⵃⴰⵡⵣ ⴷⴰⵔ ⵉⴷⵔⴰⵔⵏ ⵏ ⴷⵔⵏ ⵖ ⵡⵓⵍ ⵏ ⵜⵎⴰⵣⵉⵔⵜ ⵏ ⵉⵛⵍⵃⵉⵢⵏ, ⵉⴱⴷⴷⴰ ⵓⵎⵙⵙⵓⴼⵖ ⵎⵚⵟⴰⴼⴰ ⴰⵛⴰⵡⵓⵔ ⴼ ⵓⵙⴷⴷⵉ ⵏ ⴱⴰⴱⴰ ⵄⵍⵉ ⵏⵏⴰ ⵎⵉ ⵉⵙⴽⵔ ⵃⵎⴰⴷ ⵏⵜⴰⵎⴰ ⴰⵙⵉⵏⴰⵔⵢⵓ ⵢⵓⵔⴰⵔ ⴳⵉⵙ ⵜⵉⵍⴰⵍⵜ ⵜⴰⴷⵙⵍⴰⵏⵜ. ⴰⵙⴷⴷⵉ ⴰⴷ ⵉⵙⵎⴰⵏ ⵢⴰⵜ ⵜⵔⴰⴱⴱⵓⵜ ⵏ ⵉⵙⴳⴱⴰⵔⵏ ⵙⵓⴳⵔⵏⵉⵏ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⵏ ⵜⵎⵏⴰⴹⵜ ⵏ ⵓⵏⵥⵓⵍ ⵣⵓⵏ ⴷ ⵣⴰⵀⵢⴰ ⵣⴰⵀⵉⵔⵉ, ⵍⵃⵓⵙⵉⵏ ⴱⴰⵔⴹⵡⴰⵣ, ⵄⴱⴷⵍⵟⵉⴼ ⵄⴰⵟⵉⴼ, ⴼⴰⵟⵉⵎⴰ ⵙⵓⵙⵉ, ⵏⵓⵕⴰ ⵍⵡⴰⵍⵜⵉⵜⵉ ⴷ ⵡⵉⵢⵢⴰⴹ, ⴰⵢⵏⵏⴰ ⵜ ⵢⵓⵊⵊⴰⵏ ⴰⴷ ⵢⵉⵍⵉ ⵢⴰⵏ ⵡⴰⵜⵉⴳ ⵉⵎⵇⵇⵓⵔⵏ ⵉⴼⴽ ⴰⵙ ⴰⴷⴷⵓⵔ ⴷⴰⵔ ⵓⴳⴷⵓⴷ[2].
ⴱⴰⴱⴰ ⵄⵍⵉ | |
---|---|
ⴰⵏⴰⵡ | ⵓⵙⴷⴷⵉ |
ⵜⴰⵎⴰⵣⵉⵔⵜ | ⵍⵎⵖⵔⵉⴱ |
ⴰⵙⴰⵔⵓ | ⵜⴰⵎⴰⵣⵉⵖⵜ TV |
ⵜⴰⵙⴷⵉⵢⵜ | |
ⵙⵉⵥⵓⵏ | 4 |
ⵜⴰⵙⴷⵉⵢⵜ | 120 |
ⵜⵓⵙⴷⴰⴷⵉⵏ | 30 ⵏ ⵜⵓⵙⴷⴰⵜⵉⵏ |
ⴰⵙⵓⴼⵖ | |
ⴰⵙⵡⵉⵏⴳⵎ | ⵡⴰⵔⴷⴰ ⴱⵔⵓⴷ |
ⴰⵙⵓⴼⵖ | ⵎⵚⵟⴰⴼⴰ ⴰⵛⴰⵡⵓⵔ |
ⴰⴼⴰⵔⵙ | ⵍⵄⴰⵔⴱⵉ ⴰⵍⵜⵉⵜ |
ⴰⵥⴰⵡⴰⵏ | ⵄⵍⵉ ⵛⵓⵀⴰⴷ |
ⵜⴰⵏⴱⴰⵟ ⵏ ⵓⴼⴰⵔⵙ | ⵡⴰⵔⴷⴰ ⴱⵔⵓⴷ |
ⵜⴰⵥⵕⵉⴳⵜ |
14 ⵉⴱⵔⵉⵔ 2021 - ⵖⵉⵍⴰ |
ⴰⵎⵓⵔⵙ ⵙⵏⴼⵍ
ⵉⵙⵙⵉⴷⵜ ⵢⴰⵏ ⵓⵎⵓⵔⵙ ⵡⴰⵔ ⴰⵏⴰⵡ ⵖ ⵓⵎⵣⵔⵓⵢ ⵏ ⵓⴷⵔⴰⵎⴰ ⴰⵎⵙⵍⵎⴰⵣⵉⵖ ⵙ ⵡⵓⵟⵟⵓⵏ ⵉⵎⵇⵇⵓⵔⵏ ⵏ ⵉⵏⴹⴼⴰⵔⵏ ⵢⴰ ⵖ ⵜⵜⵉⵍⵉⴼⵉⵣⵢⵓⵏ ⵜⴰⵎⴰⵣⵉⵖⵜ (ⵜⵉⴼⵉ8) ⵢⴰ ⵖ ⵜⴱⴰⴷⵓⵜ ⵏ ⵡⴰⵔⴷⴰ ⴼⵓⵙⵉⵓⵏ ⵖ ⵢⵓⵜⵢⵓⴱ.
ⴰⵙⴷⴷⵉ ⴰⴷ, ⵉⵙⵙⵏⴽⴷ ⵜⴰⵏⴼⵓⵙⵜ ⵉⵜⵜⵡⴰⵙⵙⵏⵏ ⴽⵉⴳⴰⵏ ⵏ ⵄⵍⵉ ⴱⴰⴱⴰ ⵖ ⵢⴰⵏ ⵡⴰⵍⴱⵓⴹ ⴰⴽⵓⵎⵉⴷⵉ ⴰⵎⴰⵣⵉⵖ ⵙ ⵜⵖⴰⵔⴰⵙⵜ ⵏ ⵉⵙⵓⵔⴰ ⵏⵏⴰ ⵜⵙⵙⵓⴼⵖ ⴱⵓⴱⴽⴷⵉ ⵣⵓⵏ ⴷ «ⵃⴷⵉⴷⴷⴰⵏ » ⴷ «ⵕⵎⵎⴰⵏⴰ ⵓ ⴱⵔⵟⴰⵍ ». ⵣⵖ ⵎⴰⴷ ⴱⴷⴰⵏⵜ ⵜⵅⵔⵙⵉⵏ ⵏⵏⵙ ⵜⵉⵎⵣⵡⵓⵔⴰ, ⵉⵙⴽⵔ ⵓⵙⴷⴷⵉ ⴰⴷ ⵢⴰⵏ ⵓⵎⵙⴳⴷⴰⵍ ⴰⵅⴰⵜⴰⵔ, ⴰⵢⵏⵏⴰ ⵢⵓⵊⵊⴰⵏ ⴽⵉⴳⴰⵏ ⵏ ⵜⴱⴰⴷⵓⵜⵉⵏ ⵏ ⵓⵙⵏⵖⵎⵙ ⴰⴷ ⴼⵍⵍⴰⵙ ⵙⴰⵡⵍⵏⵜ ⴰⵍⵍⵉⵖ ⴼⵍⵍⴰⵙ ⵜⵙⴰⵡⵍ ⵓⵍⴰ ⵜⴱⴰⴷⵓⵜ ⵏ ⵓⵜⵉⵍⵉⴼⵉⵣⵢⵓⵏ ⴰⵍ-ⵃⵓⵔⵔⴰ.
ⴽⵉⴳⴰⵏ ⵏ ⵎⴷⴷⵏ ⵏⵏⴰ ⵓⵔ ⵉⵥⴹⴰⵔⵏ ⴰⴷ ⴹⴼⵔⵏ ⴰⵙⴷⴷⵉ ⵖ ⵓⵜⵉⵍⵉⴼⵉⵣⵢⵓⵏ, ⴹⴼⵔⵏ-ⵜ ⵖ ⵢⵓⵜⵢⵓⴱ ⵖ ⵜⴱⴰⴷⵓⵜ ⵏ ⵡⴰⵔⴷⴰ ⴼⵉⵙⵉⵓⵏ, ⴰⵔ ⵉⵍⴽⴽⵎ ⵡⵓⵟⵟⵓⵏ ⵏ ⵉⵎⴰⵏⵏⴰⵢⵏ ⵖ ⵜⴱⴰⴷⵓⵜ ⴰⴷ ⴰⵜⵜⴰⵢⵏ ⵏ ⵓⵣⴳⵏ ⵏ ⵓⵎⵍⵢⵓⵏ ⵉ ⵡⴰⵙⵙ, ⵜⴳ ⵜⵅⵔⵙⵜ ⵜⴰⵎⴳⴳⴰⵔⵓⵜ ⵜⴰⵎⵣⵡⴰⵔⵓⵜ ⵖ ⵜⵏⴷⴰⵏⵛ ⵏ ⵓⵎⵔⵔⵓⴽ ⵖ ⵢⵓⵜⵢⵓⴱ ⴰⵢⵏⵏⴰ ⵉⴳⴰⵏ ⴰⵏⵥⴰ ⵉⵎⵇⵇⵓⵔⵏ ⵏ ⵡⵉⵙ ⵉⵎⵓⵔⵙ ⴽⵉⴳⴰⵏ.
ⴰⵣⴰⵖⴰⵏ ⵙⵏⴼⵍ
ⵎⵇⵇⴰⵔ ⵜⴰⴽⵓⴱⴱⵔⵜ ⵏⵖ ⴷ ⴰⵙⵎⵓⵔⵙ ⵏ ⵓⵎⵓⵙⵍⵙⴰⵍ ⴰⴷ ⴷⴰⵔ ⵓⴳⴷⵓⴷ, ⵍⵍⴰⵏ ⵜⵓⴳⵜ ⵏ ⵉⵏⴰⵥⵓⵔⵏ ⵏⵏⴰ ⵓⵔ ⵉⵙⵙⵓⵙⵎ ⵎⴰⵢⴰⴷ ⴷ ⴰⵔ ⵜⵜⵉⵏⵉⵏ ⵎⴰⵙ ⵢⵓⵙⵉ ⵖ ⴰⵎⵎⴰⵙ ⵏⵏⵙ ⴽⵉⴳⴰⵏ ⴷ ⵉⵣⴳⴳⴰⵍⵏ ⴷ ⵜⵖⴰⵡⵙⵉⵡⵉⵏ ⵍⵍⵉ ⵙ ⵉⵅⵚⵚⴰ ⵏⴽⴽⵏⵉ ⵣⵓⵏ ⴷ ⵉⵙⵓⵙⵉⵢⵏ ⴰⴷ ⵉⴳ ⵣⵖ ⵍⵎⴼⵕⵓⴹ ⴰⴷ ⵜⵏ ⵏⵣⵔⵉ ⵖⵉⵍⴰⴷ. ⴰⵔ ⵜⵜⵉⵏⵉⵏ ⵎⴰⵙ ⴷ ⵣⵓⵏ ⴷ ⵍⴰⴼⵍⴰⵎ ⵍⵍⵉ ⵏ ⴼⵛⴷ, ⵓⵔ ⵉⵍⵍⵉ ⵃⵜⵜⴰ ⴽⵔⴰⵏ ⵓⵙⴱⵓⵖⵍⵓ ⵏ ⵓⵙⵡⵉⵏⴳⵎ ⴷⴰⵔ ⵉⴷ ⴱⵓⵙⵙⵉⵏⴰⵔⵢⵓ ⵏ ⵍⴰⴼⵍⴰⵎ ⴰⴷ ⵏ ⵜⵛⵍⵃⵉⵢⵜ ⵣⵖ ⵖ-ⴰⴽⵓⴷ-ⴰⵏⵏ ⴰⵔ ⵖⴰⵙⵙⴰ, ⴷⴰ ⵏⵥⵕⵕⴰ ⵎⴰⵙ ⵓⵔ ⵉⵥⴹⴰⵕ ⴰⵎⵙⵙⵓⴼⵖ ⵏ ⵍⴼⵉⵍⵎ ⴰⵎⴰⵣⵉⵖ ⴰⵛⵍⵃⵉⵢ ⴰⴷ ⵉⴼⴼⵖ ⵣⵖ ⵜⴰⵏⵏⴰⵢⵜ ⴰⵏⵏ ⵏ ⵜⴰⵎⴰⵣⵉⵔⵜ ⴷ ⵉⵖⵢⴰⵍ ⴷ ⵓⵎⵖⴰⵔ. ⵏⵏⴰⵎⴰⵟⵢⴰ ⴰⴷ ⴰⵔ ⵜⵏⵇⵇⴰ ⵓⴼⵉⵍⵎ ⴰⵛⵍⵃⵉⵢ ⴷ ⴰⵔ ⴱⴷⴷⴰ ⵜⵃⵚⴰⵔ ⵜⴰⵎⴰⴳⵉⵜ ⵜⴰⵛⵍⵃⵉⵜ ⵖ ⵜⴰⵎⴰⵣⵉⵔⵜ ⵏ ⵜⴰⵇⵔⵎⴰⵎⴰⵛⵜ ⴷ ⵎⴰⵢⴰⴷ ⵓⵔ ⵉⴳⵉ ⴼ ⵚⵚⴰⵍⵉⵃ ⵏ ⵓⴼⵉⵍⵎ ⴰⵛⵍⵃⵉⵢ ⵙⵖ ⵖⵉⴷ ⵙ ⵍⴳⴷⴷⴰⵎ. ⴰⵔ ⵜⵜⵉⵏⵉⵏ ⵓⵍⴰ ⵎⴰⵙ ⴷ ⵜⴰⵖⴰⵔⴰⵙⵜ ⵏⵏⴰ ⵙ ⵙⴰⵡⴰⵍⵏ ⵉⵎⵓⵎⵜⵉⵍⵉⵏ ⵖ ⴰⵎⵎⴰⵙ ⵏ ⵓⴼⵉⵍⵎ ⴷ ⵍⵉⵅⵔⴰⵊ ⴰⵔ ⵉⵙⵅⵛⵏ ⵍⵅⵉⵔ ⴰⴷ, ⴰⵔ ⵏⵜⵜⴰⴼⴰ ⵎⴰⵙ ⵓⵔ ⵉⵎⴽⵏ ⴰⴷ ⵉⵣⵔⵉ ⴽⵔⴰⵏ ⵍⵎⴰⵛⵀⴰⴷ ⴱⵍⴰ ⴰⴷ ⵜⵥⵉⵏ ⴰⵢⵜ ⵓⴹⵡⴰⵔ ⴷ ⵉⵏⴳⵔ-ⴰⵜⵙⵏ ⵙⵓⵍ ⵙ ⵡⴰⵡⴰⵍ ⵉⵅⵛⵏⵏ, ⴷ ⴰⵔ ⴽⵓⵍⵍⵓ ⵜⵏⵓⵛⵛⵓⴳⵏ ⵜⴰⴼⴳⴳⴰ ⵏⵏⵙⵏ ⴷ ⵓⴷⵎ ⵏⵏⴷⵏ ⵉⵖ ⵔⴰⵏ ⴰⴷ ⵙⴰⵡⵍⵏ. ⵜⴰⵎⴰⵎⴽⵜ ⴰⴷ ⵏ ⵜⵜⵎⵜⵉⵍ ⴰⵔ ⵜⴰⵊⵊⴰ ⵢⴰⵜ ⵜⴰⵡⵍⴰⴼⵜ ⵉⵅⵛⵏⵏ ⴼ ⵓⴼⴳⴰⵏ ⴰⵛⵍⵃⵉⵢ ⴰⵛⴽⵓ ⴽⵓⴷⵏⵏⴰ ⵏⵙⵙⴼⵖ ⴽⵔⴰⵏ ⵍⴼⵉⵍⵎ ⵉⵇⵇⴰⵏⴷ ⴰⴷ ⵏⴰⵊⵊ ⵖ ⵉⵅⴼⴰⵡⵏ ⵏⵏⵖ ⵎⴰⵙ ⴷ ⵍⴼⵉⵍⵎ ⵔⴰⴷ ⵉⵖⵓⵎⵓ ⵓⵍⴰ ⵉ ⵜⴰⵔⵡⴰ ⵏⵏⵖ ⴷ ⵡⴰⵔⵔⴰⵡⵏ ⵏⵏⵖ ⴷ ⵎⴰⵢⴰⴷ ⴰⵔ ⴰⵙⵏ ⵢⴰⴽⴽⴰ ⵢⴰⵜ ⵜⵡⵍⴰⴼⵜ ⵉⵣⴳⴳⵍⵜ ⴼ ⵉⵇⴱⵓⵔⵏ ⵏⵏⵙⵏ.
ⵉⵙⴷⴷⵉⵜⵏ ⵙⵏⴼⵍ
ⵙⵉⵥⵓⵏ | ⵉⵙⴷⴷⵉⵜⵏ | ⴰⵙⴰⴽⵓⴷ | |
---|---|---|---|
ⵜⵓⴷⴷⵎⴰ | ⵜⵉⴳⵉⵔⴰ | ||
1 | 30 | 14 ⵉⴱⵔⵉⵔ 2021 | 13 ⵎⴰⵢⵢⵓ 2021 |
2 | 30 | 3 ⵉⴱⵔⵉⵔ 2022 | 2 ⵎⴰⵢⵢⵓ 2022 |
3 | 30 | 23 ⵎⴰⵕⵚ 2023 | 21 ⵉⴱⵔⵉⵔ 2023 |
4 | 30 | 12 ⵎⴰⵕⵚ 2024 | 11 ⵉⴱⵔⵉⵔ 2024 |
ⴰⴼⵍⵍⴰ ⵏ ⵡⴰⵡⴰⵍ ⵙⵏⴼⵍ
ⵜⴰⵡⵓⵔⵉ ⴰⴷ ⵜⴳⴰ ⵜⴰⵢⴰⴼⵓⵜ ⵏ ⴽⵉⴳⴰⵏ ⵏ ⵉⵙⴳⴳⵯⴰⵙⵏ ⵏ ⵓⵙⵡⵓⵔⵉ ⵖ ⵢⵉⴳⵔ ⵏ ⵙⵙⵉⵏⵉⵎⴰ ⵉⵙⴰⵡⴰⵍⵏ ⵙ ⵜⴰⵛⵍⵃⵉⵜ ⵖ ⵜⵎⴰⵣⵉⵔⵜ ⵏ ⵙⵓⵙ ⵏⵏⴰ ⵉⴱⴷⴰⵏ ⵖ 1991 ⴷ ⵓⵎⵙⵙⵓⴼⵖ ⴰⵃⵎⴷ ⴱⴰⴷⴷⵓⵊ ⵙ ⵓⵙⴰⵔⵓ ⵏⵏⵙ «ⵜⴰⵎⵖⴰⵔⵜ ⵏ ⵡⵓⵔⵖ» ⵏⵏⴰ ⴷ-ⵜⵙⵙⵓⴼⵖ ⵡⴰⵔⴷⴰ ⴼⵉⵙⵉⵓⵏ. ⵜⴰⵎⴳⴳⴰⵔⵓⵜ ⴰⴷ ⵜⵙⵙⵓⴼⵖ-ⴷ ⵡⴰⵀⵍⵉ ⵏ ⵉⵙⵓⵔⴰ ⵢⴰⴹⵏ ⵙ ⵜⵎⴰⵣⵉⵖⵜ ⵏⵏⴰ ⵜⵜⵡⴰⵙⵙⵏⵏⵉⵏ ⵖ ⵓⵎⵔⵔⵓⴽ ⵙ ⵜⵉⵎⵎⴰⴷ ⵏⵏⵙ ⵣⵓⵏ ⴷ «ⴱⵓ ⵜⴼⵓⵏⴰⵙⵜ», «ⵎⵓⴽⵉⵔ », «ⵃⵎⵎⵓ ⵓⵏⴰⵎⵉⵔ », «ⵔⴰⵏ ⴽⵓⵍⵍⵓ ⴷⴷⵓⵏⵉⵜ», «ⵜⵉⵢⵜⵉ ⵏ ⵡⵓⴹⴰⵏ», «ⵖⴰⵙⵙⴰ ⴷⴷⵓⵏⵉⵜ ⴰⵣⴽⴽⴰ ⵍⵉⵅⵔⵜ »...ⴰⵜⴳ.
ⵉⵙⵓⵔⴰ ⴰⴷ, ⴷ ⵡⵉⵢⵢⴰⴹ ⵥⴹⴰⵔⵏ ⴰⴷ ⵙⵔⵙⵏ ⵜⴰⵙⵉⵍⴰ ⵉ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⵖ ⵜⵎⵏⴰⴹⵜ ⵏ ⵓⵏⵥⵓⵍ ⵏ ⵓⵎⵔⵔⵓⴽ ⵜⵖⵏⵓ-ⴷ ⵢⴰⵏ ⵎⵏⵏⴰⵡ ⵏ ⵢⵉⵜⵔⴰⵏ ⵣⵓⵏ ⴷ ⵉⴳⵍⵍⵉⵏ ⵏ «ⵃⵎⴰⴷ ⴱⴰⴷⴷⵓⵊ», «ⵎⵓⵃⵎⵎⴰⴷ ⴰⴱⴰⵄⵎⵔⴰⵏ », «ⵍⴱⵓⵔⴽⴰ ⵍⵃⵓⵙⴰⵢⵏ», « ⵎⴱⴰⵔⴷⴽ ⵍⵄⵟⵟⴰⵛ », «ⴱⵓⵔⴷⵡⴰⵣ », «ⵄⴰⵟⵉⴼ », « ⴼ. ⴱⵓⵛⴰⵏ»,... ⴰⵜⴳ.
ⵉⵙⵓⵍ ⵓⴷⵔⴰⵎⴰ ⴰⵎⴰⵣⵉⵖ ⴷⴰ ⵉⵜⵜⵏⴰⵍⴰ ⴽⵉⴳⴰⵏ ⵏ ⵉⵎⵓⴽⵔⵉⵙⵏ ⵏⵏⴰ ⵓⵔ ⵜ-ⵉⵜⵜⴰⵊⵊⴰⵏ ⴰⴷ ⵉⴱⵓⵖⵍⵓ ⵓⴳⴳⴰⵔ.
ⵥⵕ ⵓⴳⴳⴰⵔ ⵙⵏⴼⵍ
ⵉⵙⴰⵖⵓⵍⵏ ⵙⵏⴼⵍ
- ↑ Agadir24.info - مسلسل “بابا علي” أيقونة أمازيغية تحقق مشاهدات عالية على قناة تامزيغت
- ↑ Assabah.ma - “بابا علي” يتفوق في “تامزيغت”