ⵉⵎⵄⵛⴰⵕ
ⴰⵎⵓⵙⵙⵓ ⵏⵉⵖ ⵜⵉⵍⴰⵍⵜ ⵏ "ⵉⵎⵄⵛⴰⵕ" ⵉⴳⴰ ⵢⴰⵏ ⵓⵎⵓⵙⵙⵓ ⵉⵙⵎⵓⵏⵏ ⵜⴰⵥⵓⵕⵉ ⴷ ⵜⴷⵍⵙⴰ, ⵜⵜⵡⴰⵙⵙⵏ ⵜⵉⵍⴰⵍⵜ ⴰⴷ ⵜⴰⴷⵍⵙⴰⵏⵜ ⴳ ⵜⵎⵉⵣⴰⵔ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴷ ⵜⴳⵣⵉⵔⵉⵏ ⵜⵉⴽⵏⴰⵔⵉⵢⵉⵏ, ⵜⵉⵎⵉⵣⴰⵔ ⵍⵍⵉⵖ ⵣⴷⵖⵏ ⵉⵎⴰⵣⵉⵖⵏ. ⵉⵟⵟⴰⴼ ⵓⵎⵓⵙⵙⵓ ⴰⴷ ⴰⵎⵣⵔⵓⵢ ⵉⴷⵔⴰⵏ, ⵉⴽⴽⴰⵏ ⵜⴰⵙⵓⵜⵉⵏ ⴼ ⵜⴰⵙⵓⵜⵉⵏ ⵎⵇⵇⴰⵔ ⵏⵉⵜ ⵓⵔ ⵍⵍⵉⵏⵜ ⴽⵉⴳⴰⵏ ⵏ ⵜⵓⴳⴳⴰ ⴼⵍⵍⴰⵙ ⵉⵜⵜⵢⴰⵔⴰⵏ. ⴰⵔ ⵖⵉⵍⴰⴷ, ⵉⵟⵟⴰⴼ ⵓⴽⴰⵏ ⵙⵓⵍ ⵓⵎⵓⵙⵙⵓ ⴰⴷ ⵜⵉⵍⵉⵜ ⵏⵏⵙ ⴳ ⵜⵎⵉⵣⴰⵔ ⵏ ⵍⵎⵖⵔⵉⴱ, ⵙⵍⴰⵡⴰⵏ ⴰⴽⴽⵯ ⴳ ⵜⵙⴳⴳⵉⵡⵉⵏ ⵏ ⵙⵓⵙ ⴷ ⵢⵉⴼⴼⵓⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ. ⵜⴳⴰ ⵜⴼⵓⴳⵍⴰ ⴰⴷ ⵢⴰⵜ ⵜⴼⵓⴳⵍⴰ ⵜⴰⵎⴷⵏⴰⵏⵜ ⵍⵍⵉ ⵙ ⵉⵙⴽⴰⵔ ⵓⵎⴰⴷⴰⵏ, ⵉⵥⴹⴰⵕ ⴽⵓ ⵢⴰⵏ ⴰⴷ ⴳⵉⵙ ⵉⴷⵔⵓ, ⵜⴳ ⵓⵍⴰ ⵙⴳ ⵜⵎⵢⵓⵔⵉⵏ ⵜⵉⴷⵍⵙⴰⵏⵉⵏ ⴷ ⵜⵥⵓⵕⴰⵏⵉⵏ ⵍⵍⵉ ⴷ ⵉⵇⵇⴰⵏ ⵓⴼⵔⴰⴳ ⴷ ⵓⵙⵓⵜⴳ, ⴰⵛⴽⵓ ⵉⴳⴰ ⵓⵎⵓⵙⵙⵓ ⴰⴷ ⵢⴰⵏ ⵡⵓⴷⵎ ⵉⴼⴰⵡⵏ ⵙⴳ ⵓⴷⵎⴰⵡⵏ ⴳⴳⵓⵜⵏⵉⵏ ⵏ ⵡⴰⵢⴷⴰ ⴰⴷⵍⵙⴰⵏ ⴳ ⵜⵎⴰⵣⵉⵔⵜ ⵏⵏⵖ.
ⵜⴳⴰ ⵜⵉⵍⴰⵍⵜ ⴰⴷ ⵜⴰⴷ ⵍⵍⵉ ⴷ ⴱⴰⵀⵔⴰ ⵢⵓⴳⵎⵏ ⵙⴳ ⵡⴰⵢⴷⴰ ⴰⵄⵉⴱⵔⵉ[1] (ⵜⵉⵎⵢⵓⵔⵉⵏ, ⵜⵓⵜⵍⴰⵢⵜ ⴷ ⵓⵎⴰⵡⴰⵍ, ⵜⵉⵎⵍⵙⴰ, ⴰⵙⵡⵉⵏⴳⵎ, ⵉⵡⵔⵉⴽⵏ), ⵖⵎⴽ ⵍⵍⵉ ⵜⵙⵎⵓⵏ ⴽⵉⴳⴰⵏ ⵏ ⵜⵎⵢⵓⵔⵉⵏ ⵜⵉⵎⴰⵣⵉⵖⵉⵏ (ⴰⵥⴰⵡⴰⵏ, ⵉⵎⴰⵙⵙⵏ ⵜⵜⴰⵡⵙⵎⵔⴰⵙⵏⵉⵏ, ⵜⵉⵎⵢⵓⵔⵉⵏ, ⵜⵓⵜⵍⴰⵢⵜ) ⵜⴳ ⵓⵍⴰ ⵜⴰⵎⴰⵜⴰⵔⵜ ⴼ ⵜⵎⵢⵉⴷⵉⵔⵜ ⵉⵍⵍⴰⵏ ⵊⴰⵔ ⵉⵎⴰⵣⵉⵖⵏ ⴷ ⵡⵓⴷⴰⵢⵏ ⴷⴷⵔⵏⵉⵏ ⴳ ⵍⵎⵖⵔⵉⴱ ⵙⵍⴰⵡⴰⵏ ⴰⴽⴽⵯ ⵡⵉⴷⴰ ⵍⵍⴰⵏⵉⵏ ⴳ ⵢⵉⴼⴼⵓⵙ ⵏ ⵜⴳⵍⴷⵉⵜ.
ⴰⵏⴰⵎⴽ
ⵙⵏⴼⵍ
ⴳ ⵜⵙⵏⵉⵍⵙⵜ:
ⵙⵏⴼⵍⴳ ⵜⵙⵏⵉⵍⵙⵜ, ⵉⵎⵄⵛⴰⵕ ⵜⴳⴰ ⵜⴳⵓⵔⵉ ⵙⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴰⵏⴰⵡ ⵏⵏⵙ ⵉⴳⴰ ⵜ ⴰⵎⴰⴳⵓⵜ ⴰⵎⵕⵥⵓ, ⴰⵎⴰⵢ ⵏⵏⵙ ⵉⴳⴰ ⵜ "ⴰⵎⵄⵛⵓⵕ", ⵓⵏⵜⵉ ⵏⵏⵙ ⵉⴳⴰ ⵜ "ⵜⴰⵎⵄⵛⵓⵕⵜ". [2]
ⴳ ⵜⵉⵍⴰⵡⵜ:
ⵙⵏⴼⵍⴳ ⵜⵉⵍⴰⵡⵜ, ⵜⵣⴷⵉ ⵜⴳⵓⵔⵉ ⴰⴷ ⴷ ⵡⴰⵙⵙ ⵏ ⵜⵄⵛⵓⵕⵜ[3] ⵍⵍⵉ ⵉⴳⴰⵏ ⴰⵙⵙ ⵡⵉⵙ ⵎⵔⴰⵡ ⴳ ⵡⴰⵢⵢⵓⵔ ⵏ ⵎⵓⵃⴰⵕⵕⴰⵎ ⴳ ⵓⵙⴳⴳⵯⴰⵙ ⴰⵀⵉⵊⵔⵉ. ⴷⴰ ⵜⴻⵜⵜⵓⵏⵏⴰ ⵜⴳⵓⵔⵉ ⵏ ⵜⵎⵄⵛⵓⵕⵜ ⵉ ⵜⴰⴽⴰⵜ ⵏⵉⵖ ⴷ ⵜⵉⵎⵙⵙⵉ ⵍⵍⵉ ⵏⵙⵙⵔⵖⴰ ⵜⵉⵣⵉ ⵏ ⵓⵙⴼⵓⴳⵍⵓ ⵙ ⵜⵄⵛⵓⵕⵜ. ⵜⴰⴳⵓⵔⵉ ⵏ ⵉⵎⵄⵛⴰⵕ ⵏⵜⵜⴰⵜ ⴷⴰ ⵜⴻⵜⵜⵓⵏⵏⴰ ⵉ ⵜⵔⴰⴱⴱⵓⵜ ⵏ ⵉⵎⵓⵔⴰⵔⵏ ⵍⵍⵉ ⵙⴽⴰⵔⵏⵉⵏ ⵜⴰⴼⵓⴳⵍⴰ ⴰⴷ, ⵎⴽⵍⵍⵉ ⵜⴻⵜⵜⵓⵏⵏⴰ ⵓⵍⴰ ⵉ ⵜⴼⵓⴳⵍⴰ ⴰⴷ ⵏⵉⵜ ⵙ ⵢⵉⵅⴼ ⵏⵏⵙ.
ⵜⴰⴳⵓⵔⵉ ⵏ ⵉⵎⵄⵛⴰⵕ ⴷⴰ ⵜⵜⵓⵙⵎⵔⵉⵙ ⴽⵉⴳⴰⵏ ⴳ ⵢⵉⴼⴼⵓⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵉⵍⵉⵏⵜ ⵓⵍⴰ ⵜⴳⵓⵔⵉⵡⵉⵏ ⵢⴰⴹⵏⵉⵏ ⵍⵍⵉ ⴷⵉⴷⵙ ⵉⵎⵙⴰⵙⴰⵏ ⴳ ⵜⵙⴳⴳⵉⵡⵉⵏ ⵢⴰⴹⵏⵉⵏ ⵏ ⵍⵎⵖⵔⵉⴱ ⴰⵎ: ⵉⵎⵀⴹⴹⵕⵏ, ⵉⵎⵖⴰⵔⵏ ⵏ ⵢⵉⴹ, ⵉⵚⵡⴰⴱⵏ..ⴷ ⵜⴳⵓⵔⵉⵡⵉⵏ ⵢⴰⴹⵏⵉⵏ.
* ⵜⴰⵏⵖⵔⵓⴼⵜ:
ⵙⵏⴼⵍⵙ ⵓⵎⴰⵜⴰ, ⵉⵎⵄⴰⵛⵕ ⴳⴰⵏ ⵜⴰⵔⴰⴱⴱⵓⵜ ⵍⵍⵉ ⵉⵙⴽⴰⵔⵏ ⵜⵓⴳⵜ ⵏ ⵜⵎⵢⵓⵔⵉⵏ ⵜⵉⵇⴱⵓⵔⵉⵏ ⵎⵓⵏⵏⵉⵏ ⴷ ⵜⴰⴹⵚⴰ ⴷ ⵓⵙⵓⵏⴹⵓ ⴷ ⵜⵇⴱⴱⴰⴹⵜ ⴳ ⵡⴰⵢⵢⵓⵔ ⵏ ⵜⵄⵛⵓⵕⵜ. ⵉⴳⴰ ⵓⵎⵓⵙⵙⵓ ⴰⴷ ⵢⴰⵏ ⵡⵓⴷⵎ ⵉⵛⵛⴰⵔⵏ ⵏⴳⵔ ⵡⴰⵢⴷⴰ ⴰⵎⴰⵣⵉⵖ ⴷ ⵡⴰⵢⴷⴰ ⴰⵄⵉⴱⵔⵉ ⵍⵍⵉⵖ ⴰⵔ ⴳⵉⵙ ⵏⵜⵜⴰⴼⴰ ⵜⵓⴳⵜ ⵏ ⵜⵖⴰⵡⵙⵉⵡⵉⵏ ⵣⴷⵉⵏⵉⵏ ⵏⴳⵔ ⵉⵎⴰⵣⵉⵖⵏ ⴷ ⵡⵓⴷⴰⵢⵏ ⴳ ⵎⴰ ⴰⴷ ⵉⵥⵍⵉⵏ ⵙ ⵜⵎⵢⵓⵔⵉⵏ ⴷ ⵉⵙⵎⴰⵡⵏ ⴷ ⵜⵎⵍⵙⴰ ⴷ ⵜⵣⵣⵓⵍⵉⵏ ⴷ ⵓⵎⵣⵔⵓⵢ ⴷ ⵜⵖⴰⵡⵙⵉⵡⵉⵏ ⵢⴰⴹⵏⵉⵏ.
ⵙ ⵓⵎⴰⵜⴰ ⵜⴳⴰ ⵜⴼⴼⵓⴳⵍⴰ ⵏ ⵉⵎⵄⵛⴰⵕ ⵢⴰⵜ ⵜⴼⴼⵓⴳⵍⴰ ⵉⵙⵎⵔⴰⵙⵏ ⵓⴷⵎⴰⵡⵏ ⵏⵉⵖ ⵜⴰⵙⵓⵏⵉ ⴷⴰⵜ ⵏ ⵜⵓⴳⵜ ⵉⵎⵓⵙⵙⵓⵜⵏ ⵉⴷⵍⵙⴰⵏⵏ ⴳ ⵏⵜⵜⴰⴼⴰ ⵜⴰⵜⵉⵇⵏⵉⵜ ⴰⴷ [4] ⴰⵔ ⵉⵜⵜⵉⵍⵉ ⴳ ⵢⵉⴹ, ⴰⵔ ⴳⵉⵙ ⵜⵜⵓⵙⵎⵔⴰⵙⵏ ⴳⴰⵔ ⵉⵡⴰⵍⵉⵡⵏ ⵖ ⵜⴰⵍⵖⴰⵜⵉⵏ ⵉⵜⵜⵓⵔⴰⵔⵏ ⵙ ⵢⵉⵎⵙⵍⵉ ⵉⵄⵡⵡⵊⵏ ⵉⵏⴼⵍⵏ ⵅⴼ ⵜⴱⵔⵉⴷⵜ ⵏ ⵡⴰⵡⴰⵍ ⵖ ⵜⵖⴰⵔⴰⵙⵜ ⵜⴰⵏⵎⵢⵓⵔⵜ.
ⴰⵎⵣⵔⵓⵢ ⴷ ⵡⴰⴽⵓⴷ ⵏ ⵓⵙⴼⵓⴳⵍⵓ
ⵙⵏⴼⵍⴰⵔ ⵜⴻⵜⵜⵉⵍⵉ ⵜⴼⴼⵓⴳⵍⴰ ⵏ ⵉⵎⵄⵛⴰⵕ ⴳ ⵉⵎⴰⵍⴰⵙⵙ ⴰⵎⵣⵡⴰⵔⵓ ⴳ ⵡⴰⵢⵢⵓⵔ ⵏ ⵜⵄⵛⵓⵕⵜ ⴳ ⵓⵙⴳⴳⵯⴰⵙ ⴰⵀⵉⵊⵔⵉ. ⴰⵔ ⵖⵉⵍ ⴰⴷ ⵓⵔⵜⴰ ⵙⵓⵍ ⵏⵓⴼⵉ ⵜⵉⵣⵔⴰⵡⵉⵏ ⵏⵖⴷ ⵜⵉⵖⵓⵔⵉⵡⵉⵏ ⵎⵎⴰⵍⴰⵏⵉⵏ ⵜⵉⵣⵉ ⵍⵍⵉⵖ ⵙⵙⵏⵜⴰⵏ ⵉⵎⴰⵣⵉⵖⵏ ⴰⵔ ⵙⴼⵓⴳⵍⴰⵏ ⵙ ⵉⵎⵄⵛⴰⵕ, ⵎⴽ ⵍⵍⵉ ⵙⴼⵓⴳⵍⴰⵏ ⵙ ⵜⵉⴼⴼⵓⴳⵍⵉⵡⵉⵏ ⵢⴰⴹⵏⵉⵏ (ⴱⵉⵍⵎⴰⵡⵏ ⵏⵉⵖ ⴱⵓⵊⵍⵓⴷ, ⴱⵍⵍⵖⵏⵊⴰ, ⵉⴳⵏⴰⵡⵏ, ⵉⵙⵎⴳⴰⵏ...) ⵎⴰⵛⵛ ⴰⵢⵍⵍⵉ ⵉⵍⵍⴰⵏ ⴳ ⵜⵎⴽⵯⵜⵉⵜ ⵏ ⵉⵎⴰⵣⵉⵖⵏ ⵉⵣⴰⵢⴽⵓⵜⵏ ⵉⴳⴰ ⵜ ⵎⴰⵙ ⵉⴳⴰ ⵓⵙⴼⵓⴳⵍⵓ ⴰⴷ ⵡⴰⴷ ⵉⴳⴰⵏ ⴰⵇⴱⵓⵔ ⵉⴽⴽⴰⵏ ⴽⵉⴳⴰⵏ ⵏ ⵜⴰⵙⵓⵜⵉⵏ ⴷⵔⴰⵏⵉⵏ. ⵉⴼⴰⵡ ⵓⵍⴰ ⵎⴰⵙ ⵥⴹⴰⵕⵏ ⵉⵎⴰⵣⵉⵖⵏ ⴰⴷ ⴼⵔⴳⵏ ⵜⵉⵍⴰⵍ ⵏ ⵉⵎⵄⵛⴰⵕ ⵎⵇⵇⴰⵔ ⴽⵛⵎⵏ ⵉⵙⴳⴷⵏ ⵢⴰⴹⵏⵉⵏ ( ⵜⵓⴷⴰⵢⵜ, ⵜⴰⵎⴰⵙⵉⵃⵉⵜ, ⵍⵉⵙⵍⴰⵎ), ⵓⵔ ⴼⵍⵏ ⴰⵙⴼⵓⴳⵍⵓ ⴰⴷ, ⵎⴰⵛⵛ ⵎⵎⴰⵖⵏ ⵙⵏⴼⵍⵏ ⵜ ⵙ ⵉⵎⵉⴽⴽ ⵃⵎⴰ ⴰⴷ ⵉⵎⵙⴰⵙⴰ ⴷ ⵉⵙⵏⴼⵍⵏ ⵉⵅⴰⵜⴰⵔⵏ ⵍⵍⴰⵏⵉⵏ ⴳ ⵓⵎⵏⴰⴹ ⵍⵍⵉⵖ ⴷⴷⵔⵏ.
ⴳ ⵎⴰⴷ ⵉⵥⵍⵉⵏ ⵙ ⵜⵉⵔⵔⴰ ⵏ ⵓⵎⵣⵔⵓⵢ ⵏ ⵓⵎⵓⵙⵙⵓ ⴰⴷ ⵉⴳⴰⵏ ⴰⴷⵍⵙⴰⵏ ⴷ ⵓⵏⴰⵎⵓⵏ ⴷ ⵡⵉⵏ ⵜⵥⵓⵕⵉ, ⴰⵢⵍⵍⵉ ⴱⴰⵀⵔⴰ ⴼⵍⵍⴰⵙ ⵢⵓⵊⴰⴷⵏ ⵉⴳⴰ ⵜ ⴰⵎⵣⵔⵓⵢ ⴰⵎⵉⵡⴰⵏ ⵍⵍⵉ ⵉⴳⴰⵏ ⵜⵓⴳⴳⵯⴰ ⴷ ⵉⵡⴰⵍⵉⵡⵏ ⵍⵍⵉ ⴼⵍⵍⴰⵙ ⵜⵜⵉⵏⵉⵏ ⵎⵉⴷⴷⵏ ⵜⴰⵙⵓⵜⵉⵏ ⴼ ⵜⴰⵙⵓⵜⵉⵏ. ⴳ ⵓⵎⵏⵉⴷ ⴰⵎⵉⵔⴰⵢ, ⵖⵓⵔⵏⵖ ⵢⴰⵜ ⵜⵓⴳⴳⵯⴰ ⵜⴰⵎⵉⵔⴰⵢⵜ ⵏ ⵓⵏⵖⵎⴰⵙ ⴰⴼⵕⴰⵏⵚⴰⵡⵉ "ⴳⴰⵜⵉⴼⵓⵚⵉ" ⵍⵍⵉ ⵢⵓⵔⴰⵏ ⵢⴰⵏ ⵓⵎⴳⵔⴰⴷ ⴳ ⵉⵙⵏⵓⵎⵍ ⵎⴰⴷ ⵉⵥⵕⴰ ⴼ ⵉⵎⵄⵛⴰⵕ ⵏ ⵜⵣⵏⵉⵜ ⴳ ⵓⵙⴳⴳⵯⴰⵙ ⵏ 1934. [5]
ⴰⴷⴷⴰⴷ ⵏ ⵓⵙⴳⴷ
ⵙⵏⴼⵍ
ⵉⵎⴰⵙⵙⴰⵏⵏ ⵏ ⵓⵙⴳⴷ ⵍⵍⴰⵏⵉⵏ ⴳ ⵜⵙⴳⴰ ⵏ ⵙⵓⵙ ⵥⵕⴰⵏ ⵜⵉⵎⵢⵓⵔⵉⵏ ⴰⴷ ⵎⴰⵛⵛ ⵓⵔ ⵏⵏⵉⵏ ⵉⵙ ⵀⵔⵛⵏⵜ, ⵉⴳⵍⵍⵉⵏ ⵏ ⵎⵓⵃⴰⵎⵎⴰⴷ ⵍⵎⵅⵜⴰⵔ ⵙⵙⵓⵙⵉ ⵓⵔ ⴼⵍⵍⴰⵙⵏⵜ ⵉⵏⵏⵉ ⵡⴰⵍⵓ. ⵉⵏⵏⴰ ⵓⵎⵔⵣⵓ ⵎⵓⵃⴰⵎⵎⴰⴷ ⵎⵓⵙⵜⴰⵡⵉ ⴳ ⵢⴰⵏ ⵓⵎⴳⵔⴰⴷ ⵏⵏⵙ ⴳ ⵓⵟⵟⵓⵏ ⵡⵉⵙ ⵙⵉⵏ ⴳ ⵜⵙⵖⵓⵏⵜ ⵏⵏⵙ "ⵜⴰⵡⵙⵏⴰ" ⵍⵍⵉ ⵏⵉⵜ ⵏⴱⴷⵔ ⴳ ⵉⵖⴱⵓⵍⴰ ⵏ ⵓⵎⴳⵔⴰⴷ [6] ⴰⴷ ⵎⴰⵙ ⵏⵏⴰⵏ ⵉⵎⵣⴷⴰⵖⵏ ⵏ ⵉⴼⵔⴰⵏ ⵎⴰⵙ ⴷ ⴰⵎⴰⵙⵙⴰⵏ ⵙⵉⴷⵉ ⵟⵟⴰⵀⵕ ⵍⵉⴼⵔⴰⵏⵉ ⴰⵔ ⵉⵙⵏⵓⴱⴳ ⵙ ⵉⵎⵄⵛⴰⵕ, ⴰⵔ ⴰⵙⵏ ⵢⴰⴽⴽⴰ ⵜⴰⵔⵔⴰⴳⵉⵏ, ⴰⵔ ⵉⵙⵙⴼⵍⴰⴷ ⵉ ⵉⵡⴰⵍⵉⵡⵏ ⵏⵏⵙⵏ, ⴰⵔ ⵉⵟⵟⵚⵚⴰ, ⵖⵎⴽ ⴰⵏⵏ ⵓⵍⴰ ⵢⵉⵡⵉⵙ ⴰⵎⴰⵙⵙⴰⵏ ⵎⵓⵃⵎⵎⴰⴷ ⵟⵟⴰⵀⵕ ⵍⵉⴼⵔⴰⵏⵉ.
ⵉⴷⵖⴰⵔⵏ ⵏ ⵓⵙⴼⵓⴳⵍⵓ
ⵙⵏⴼⵍ
ⴰⵔ ⵉⵜⵜⵉⵍⵉ ⵓⵙⴼⵓⴳⵍⵓ ⵏ ⵉⵎⵄⵛⴰⵕ ⴳ ⵎⵏⵏⴰⵡ ⵉⴷⵖⴰⵔⵏ ⵣⴷⵉⵏⵉⵏ ⴷ ⴽⵔⴰⵢⴳⴰⵜ ⵜⴰⴼⵔⴽⴰ ⴳ ⵜⴼⵔⴽⵉⵡⵉⵏ ⵣⴷⵉⵏⵉⵏ ⴷ ⵓⵙⴼⵓⴳⵍⵓ ⴰⴷ ⴽⵓ ⴷⴷ ⵢⴰⵜ ⴷ ⵏⵜⵜⴰⵜ, ⴳ ⵓⵙⵓⵊⴷ ⵏⵏⵙ ⵏⵉⵖ ⴰⵙⵎⵏⵉⴷ ⵏⵏⵙ, ⵏⵖⴷ ⴰⵙⵎⴰⴷ ⵏⵏⵙ. ⵙⴳ ⵉⴷⵖⴰⵔⵏ ⵉⴷⵙⵍⴰⵏⵏ ⵣⴷⵉⵏⵉⵏ ⴷ ⵓⵙⴼⵓⴳⵍⵓ ⴰⴷ, ⵏⵥⴹⴰⵕ ⴰⴷ ⵏⴱⴷⵔ: ⵍⵎⵉⵄⴰⵕⵜ ⵏⵉⵖ ⵍⴽⵏⵉⵙⵉⵜ, ⴰⵙⵢⴰⵔⵓⵔ ⵏ ⵓⵙⴰⵢⵙ, ⵜⵉⵙⵡⴰⴽ ⵏ ⵓⵙⵓⵏ, ⵍⵃⵓⵛ, ⵍⴳⵓⵕ. ⵔⴰⴷ ⵏⴼⴽ ⵉⵙⵉⵙⴼⵉⵡⵏ ⴼ ⴽⵔⴰⵢⴳⴰⵜ ⴰⴷⵖⴰⵔ ⴷ ⵜⵡⵡⵓⵔⵉⵡⵉⵏ ⵍⵍⵉ ⴳⵉⵙ ⵜⵜⴰⵡⵙⴽⴰⵔⵏⵉⵏ ⵙ ⵖⵎⴽ ⴰⴷ:
- ⵍⵎⵉⵄⴰⵕⵜ ⵏⵉⵖ ⵍⴽⵏⵉⵙⵜ:
ⵙⵏⴼⵍⴰⴷⵖⴰⵔ ⴰⴷ ⴰⵔ ⵉⵜⵜⴳⴳⴰ ⵢⴰⵜ ⵜⴳⵎⵎⵉ ⵓⵔ ⵉⵜⵜⵓⵣⴷⴰⵖⵏ, ⵉⴳⴷⵍ ⴼ ⴽⵓⵢⴰⵏ ⴰⴷ ⵙⵔⵙ ⵉⴽⵛⵛⵉⵎ ⴰⴱⵍⴰ ⵡⵉⴷⴰ ⵍⵍⴰⵏⵉⵏ ⴳ ⵜⵔⴰⴱⴱⵓⵜ ⵏ ⵉⵎⵄⵛⴰⵕ. ⵜⴰⴳⵓⵔⵉ ⴰⴷ ⵜⴳⴰ ⵜⵉⵏ ⵡⴰⵢⴷⴰ ⴰⴷⵍⵙⴰⵏ ⴰⵄⵉⴱⵔⵉ ⵉⵣⴷⵉⵏ ⴷ ⵓⵙⴳⴷ. ⴰⴷⵖⴰⵔ ⴰⴷ ⴰⵖ ⴰⵔ ⵜⵜⵎⵎⵉⴳⴳⵉⵔⵏ ⵉⵎⵄⵛⴰⵕ, ⴰⵔ ⴳⵉⵙ ⵙⴽⴰⵔⵏ ⵜⵉⵙⵎⵓⵏⴰⵢ ⵏⵏⵙⵏ, ⴰⵔ ⴳⵉⵙ ⴳⴳⴰⵏⵏ, ⴰⵔ ⴳⵉⵙ ⵛⵜⵜⴰⵏ, ⴰⵔ ⴳⵉⵙ ⵙⵙⵔⵓⵙⵏ ⵓⵍⴰ ⴰⵖⴰⵡⴰⵙ ⵏ ⵢⵉⴹ: ⴰⴱⵔⵉⴷ ⵍⵍⵉ ⵔⴰⴷ ⴽⴽⵉⵏ, ⵜⵉⵙⵡⴰⴽ ⴷ ⵉⴱⵔⴷⴰⵏ, ⵜⵉⴳⵯⵎⵎⴰ ⵍⵍⵉ ⵔⴰⴷ ⵔⵣⴼⵏ. ⵜⴳⴰ ⵍⵎⵉⵄⴰⵕⵜ ⵓⵍⴰ ⵍⵅⵣⵉⵏ ⵍⵍⵉⵖ ⴰ ⵙⵎⵎⵓⵏⵏ ⵜⵉⵖⴰⵡⵙⵉⵡⵉⵏ ⵍⵍⵉ ⴰⵙⵏ ⴰⴽⴽⴰⵏ ⵎⵉⴷⴷⵏ ⴰⵎ: ⵙⵙⴽⴽⴰⵕ, ⵜⵓⵎⵥⵉⵏ, ⵉⵔⴷⵏ, ⵉⴷⵔⵉⵎⵏ, ⴰⴳⴳⵓⵔⵏ ....
- ⵍⵃⵓⵛ:
ⵙⵏⴼⵍⵉⴳⴰ ⴰⴷⵖⴰⵔ ⵍⵍⵉⵖ ⴰ ⵙⵙⵓⵊⴰⴷⵏ ⵉⵎⵄⵛⴰⵕ ⵉ ⵉⵎⵓⵙⵙⵓⵜⵏ ⵏⵏⵙⵏ, ⴰⵔ ⴳⵉⵙ ⵙⴽⴰⵔⵏ ⵜⵉⵔⵎⵉⵜⵉⵏ ⴷⴰⵜ ⴰⴷ ⴼⴼⵖⵏ ⵙ ⵓⴱⴰⵔⴰⵣ ⴷⴰⵔ ⵓⴳⴷⵓⴷ.
- ⵍⴳⵓⵕ:
ⵙⵏⴼⵍⴰⴷⵖⴰⵔ ⵉⵣⴷⵉⵏ ⴷ ⵓⵙⴰⵢⵙ. ⴰⴷⵖⴰⵔ ⴰⴷ, ⴰⴷ ⵉⴳⴰⵏ ⴰⵎⵎⴰⵙ ⵍⵍⵉⵖ ⵜⵜⵎⵓⵙⵙⵓⵏ ⵉⵎⵓⵔⴰⵔⵏ ⵏ ⵉⵎⵄⵛⴰⵕ, ⴰⵔ ⵉⵜⵜⵉⵍⵉ ⵎⵏⵉⴷ ⵏ ⵓⵎⵔⴰⵙ ⵖ ⵉⵜⵜⴳⴰⵡⴰⵔ ⵓⴳⴷⵓⴷ ⴳ ⵜⵜⵉⵍⵉⵏ ⴽⵓ ⵜⵉⴷⵓⵍⴰ ⵍⵍⴰⵏⵉⵏ ⴳ ⵡⴰⵎⵓⵏ: ⵉⵡⵜⵎⴰⵏ, ⵜⵉⵡⵜⵎⵉⵏ, ⵉⵔⴳⴰⵣⵏ, ⵜⵉⵎⵖⴰⵔⵉⵏ, ⵉⵏⴱⵖⵓⵔⵏ ⴷ ⵉⵎⵥⵍⴰⴹ. ⵙ ⵖⵎⴽ ⴰⴷ ⴰⵙ ⵉⴳⴰ ⵍⴳⵓⵕ ⴰⴳⵣⵣⵓⵎ ⵏ ⵓⵙⴰⵢⵔⵓⵔ ⵏ ⵓⵙⴰⵢⵙ ⴰⴽⴽⵯ, ⵏⵜⵜⴰⵏ ⴰⴷ ⵉⴳⴰⵏ ⵜⴰⵙⵉⵍⴰ ⵜⴰⵙⵉⵍⴰⵏⵜ ⵏ ⵜⵥⵓⵕⵉ ⴷⴰⵜ ⵏ ⵜⵎⵣⴳⵓⵏⵜ ⵍⵍⵉ ⵙⵎⵏⵉⴷⵏ ⵉⵎⵄⵛⴰⵕ.
- ⴰⵙⴰⵢⵔⵓⵔ ⵏ ⵓⵙⴰⵢⵙ:
ⵙⵏⴼⵍⴰⴷⵖⴰⵔ ⴰⵎⵇⵇⴰⵔⴰⵏ ⵍⵍⵉⵖ ⴰ ⵜⵜⵓⵔⴰⵔⵏ ⵉⵎⵄⵛⴰⵕ, ⴰⵔ ⵉⵜⵜⴳⴰ ⴰⵙⴰⵔⴰⴳ ⵎⵇⵇⵓⵔⵏ ⵉⵍⵍⴰⵏ ⴳ ⵓⵙⵓⵏ, ⴰⵔ ⴳⵉⵙ ⵙⵙⵎⵏⵉⴷⵏ ⵜⵉⵡⵡⵓⵔⵉⵡⵉⵏ ⵏⵏⵙⵏ ⴷⴰⵜ ⵏ ⵓⵎⵣⴳⵓⵏ ⵍⵍⵉ ⵙⵙⵓⵊⴰⴷⵏ,
-ⵜⵉⵙⵡⴰⴽ ⵏ ⵓⵙⵓⵏ:
ⵙⵏⴼⵍⵜⵉⵙⵡⴰⴽ ⵏⵉⵖ ⵉⴱⵔⴷⴰⵏ ⵏ ⵓⵙⵓⵏ ⵖ ⵜⵜⵎⵓⵙⵙⵓⵏ ⵉⵎⵄⵛⴰⵕ, ⴰⵔ ⵣⵣⵔⴰⵢⵏ ⵜⴰⵙⵓⴽⵜ ⵙ ⵜⴰⵢⵢⴰⴹ, ⴰⵔ ⵜⵜⴽⴽⴰⵏ ⵜⵉⴳⵎⵎⵉ ⵙ ⵜⴰⵢⵢⴰⴹ, ⴰⵔ ⵜⵜⵃⵓⵛⵏ ⴳ ⵢⵉⵎⵉ ⵏ ⵜⴳⵯⵎⵎⴰ, ⴰⵔ ⴽⴽⴰⵜⵏ ⵙ ⵉⴳⵊⴷⴰ ⵏⵏⵙⵏ ⴼ ⵉⴳⴳⵉ ⵏ ⵍⵄⴷⵓⴱⴰⵜ, ⴰⵔ ⴰⵙⵏ ⴷ ⴰⴽⴽⴰⵏ ⵉⵎⵣⴷⴰⵖⵏ ⵜⴰⵔⵔⴰⴳⵉⵏ.
ⵉⵡⵔⵉⴽⵏ
ⵙⵏⴼⵍ
ⴷⴰ ⵜⵜⵉⴳⵓⵜⵏ ⵉⵡⵔⵉⴽⵏ ⵜⵜⴰⵡⵙⵏⵉⵏ ⴳ ⵓⵙⴼⵓⴳⵍⵓ ⵏ ⵓⵎⵓⵙⵙⵓ ⵏ ⵉⵎⵄⵛⴰⵕ, ⵉⵥⴹⴰⵕ ⴰⴷ ⵢⵉⵍⵉ ⴳ ⴽⵔⴰⵢⴳⴰⵜ ⵜⴰⵔⴰⴱⴱⵓⵜ ⵏ ⵉⵎⵄⵛⴰⵕ ⵎⴰⴷ ⵉⵣⵔⵉⵏ ⴰⴳⵏⴰⵔ ⴰⵔ ⴽⵕⴰⵎⵔⴰⵡ ⵏ ⵉⵡⴷⴰⵏ ⴳⴰⵏⵉⵏ ⵉⵎⴰⴷⴷⴰⵍⵏ ⵏⵖⴷ ⵉⵎⵓⵔⴰⵔⵏ ⵙⴽⴰⵔⵏⵉⵏ ⵜⵉⵍⴰⵍ ⵥⵍⵉⵏⵉⵏ, ⵏⵥⴹⴰⵕ ⴰⴷ ⵏⴱⴹⵓ ⵉⵡⵔⵉⴽⵏ ⴰⴷ ⵙ ⵖⵎⴽ ⴰⴷ:
*ⵜⴰⵔⴰⴱⴱⵓⵜ ⵏ ⵓⵥⴰⵡⴰⵏ:
ⵙⵏⴼⵍⵜⴰⵔⴰⴱⴱⵓⵜ ⴰⴷ ⵜⵓⵎⴰ ⵉⵡⴷⴰⵏ ⵥⵍⵉⵏⵉⵏ ⵙ ⵉⵎⴰⵙⵙⵏ ⵏ ⵓⵥⴰⵡⴰⵏ, ⵉⵇⵇⴰⵏ ⴷ ⴰⴷ ⵙⵙⵏⵏ ⴰⴷ ⵜⵜⵉⵔⵉⵔⵏ ⴼ ⴽⵓ ⵉⵎⵉⵙⵙ ⵉⵥⵍⵉⵏ ⵙ ⵜⴼⴼⵓⴳⵍⴰ ⴰⴷ ⵉⴳⴰⵏ ⵜⴰⵎⴷⵏⴰⵏⵜ ⴷ ⵜⴰⵇⴱⵓⵔⵜ, ⴳⴳⵓⵜⵏ ⵉⵎⴰⵙⵙⵏ ⵏ ⵓⵥⴰⵡⴰⵏ ⵍⵍⵉ ⴳⵉⵙ ⵜⵜⴰⵡⵙⵎⵔⴰⵙⵏⵉⵏ ⵣⵓⵏⴷ : ⵜⴰⵍⵍⵓⵏⵜ, ⴳⴰⵏⴳⴰ, ⵍⵄⵡⵡⴰⴷ, ⵏⵏⴰⵇⵓⵙ, ⵜⵉⵇⵇⵔⵇⴰⴱⴱⴰⵜⵉⵏ, ⴰⴳⵡⴰⵍ. [7]
* ⵉⴷ ⴱⵓ ⵜⴳⵊⴷⴰ:
ⵙⵏⴼⵍⴳⴰⵏ ⵉⵡⴷⴰⵏ ⵜⵜⴰⵙⵉⵏⵉⵏ ⵉⵄⵎⵎⴰⴷ ⵏ ⵜⴳⵊⴷⴰ ⵏ ⵓⴽⵛⵛⵓⴹ, ⴰⵔ ⵙⵔⵙⵏ ⴽⴽⴰⵜⵏ ⵙ ⵢⴰⵜ ⵜⴽⴽⵍⵉⵜ ⵙ ⵜⵖⴰⵔⴰⵙⵜ ⵉⴳⴰⵏ ⵜⴰⵎⴳⵔⵓⵜ. ⵜⵓⴽⴽⵉⵎⵉⵏ ⴰⴷ ⴼ ⵡⴰⴽⴰⵍ ⴷⴰ ⵜⵜⵎⵓⵏⵏⵜ ⴷ ⵓⵥⴰⵡⴰⵏ ⴷ ⵜⴰⵍⵍⵖⴰⵜⵉⵏ ⵍⵍⵉ ⵜⵙⴽⴰⵔ ⵜⵔⴰⴱⴱⵓⵜ ⵏ ⵓⵥⴰⵡⴰⵏ, ⴳ ⵜⵉⵣⵉ ⴰⴷ ⵏⵉⵜ ⴷⴰ ⵜⵜⴰⵍⵖⵏ ⵉⵎⵄⵛⴰⵕ ⴽⵔⴰ ⵏ ⵜⵓⵔⴰⵔⵉⵏ ⵎⵓⵏⵏⵉⵏ ⴷ ⵓⵎⵓⵙⵙⵓ ⵏ ⵉⵎⵄⵛⴰⵕ.
* ⵜⴰⵔⴰⴱⴱⵓⵜ ⵏ ⵓⵙⵎⴷⵢⴰ:
ⵙⵏⴼⵍⴷⴰ ⵏⵜⵜⴰⴼⴰ ⴳ ⵜⵔⴰⴱⴱⵓⵜ ⴰⴷ ⵜⵓⴳⵜ ⵏ ⵉⵡⵔⵉⴽⵏ ⵍⵍⵉ ⵙⴰⴹⵚⴰⵏⵉⵏ ⴰⴳⴷⵓⴷ ⵉⵃⴰⴹⵕⵏ, ⴷⴰ ⵙⴽⴰⵔⵏ ⵜⵉⵍⴰⵍ ⴳⴰⵏⵉⵏ ⵜⵉⵏ ⵓⵎⵣⴳⵓⵏ ⴰⵎⵣⵡⴰⵔⵓ, ⵙⴳ ⴷⵉⴳⵙⵏ ⴷ ⵏⵜⵜⴰⴼⴰ: ⵍⵃⵣⵣⴰⵏ ⵏⵉⵖ ⵍⵅⴰⵅⴰⵎ ⵏⵉⵖ ⵙⴷⵉ ⵍⵅⴰⵅⴰⵎ ⵍⵍⵉ ⵉⴳⴰⵏ ⴰⵔⴳⵔⴰⴳ ⵏ ⵡⵓⴷⴰⵢⵏ, ⵜⴰⵡⴰⵢⵢⴰ ⵍⵍⵉ ⵉⴳⴰⵏ ⵜⴰⵅⴷⴷⴰⵎⵜ ⵏ ⵜⴳⵯⵎⵎⴰ ⵏⵉⵖ ⵜⴰⵙⴽⴽⵉⵡⵜ, ⵙⵎⵉⵃⴰ ⵏⵉⵖ ⵛⵎⵉⵃⴰ ⵍⵍⵉ ⵉⴳⴰⵏ ⵜⴰⵎⵖⴰⵔⵜ ⵏ ⵡⵓⴷⴰⵢ, ⴰⵏⴹⴰⴼ ⵏⵉⵖ ⴰⴱⵓⵍⵉⵙⵉ.
- ⵍⵃⴰⵊⵊ:
ⵙⵏⴼⵍⴰⵡⵔⵉⴽ ⵉⵙⴽⴰⵔⵏ ⵜⵉⵍⴰⵍ ⵏ ⵓⵏⴹⴹⴰⵎ ⵏⵉⵖ ⴰⵎⴷⵢⴰⵣ ⴷⴰⵔ ⵉⵎⵄⵛⴰⵕ, ⵏⵜⵜⴰⵏ ⴰⴷ ⵉⵙⴽⴰⵔⵏ ⵜⵉⵏⴹⴹⴰⵎⵉⵏ ⴷ ⵜⵎⴷⵢⴰⵣⵉⵏ ⵍⵍⵉ ⵙ ⴰⵔ ⵜⵜⵓⵔⴰⵔⵏ ⵉⵎⵄⵛⴰⵕ. ⵜⵉⵏⴹⴹⴰⵎⵉⵏ ⴰⴷ ⵍⵍⵉ ⵟⵟⴰⴼⵏⵉⵏ ⴰⴷⵖⴰⵔ ⵉⴳⴰⵏ ⴰⵏⴰⵎⵎⴰⵙ ⴳ ⵜⵥⵓⵕⵉ ⴰⴷ ⵉⴳⴰⵏ ⴷⴰⵜ ⵏ ⵓⵎⵣⴳⵓⵏ ⵍⵍⵉ ⵉⵙⵎⵓⵏⵏ ⵛⵉⴳⴰⵏ ⵏ ⵜⵥⵓⵕⵉⵡⵉⵏ: ⴰⵥⴰⵡⴰⵏ, ⴰⴷⵔⴰⵣ, ⴰⵙⵏⴼⵍⵓⵍ, ⴰⵎⵣⴳⵓⵏ. ⵉⵇⵇⴰⵏ ⴷ ⴼ ⵡⴰⵡⵔⵉⴽ ⴰⴷ ⴰⴷ ⵉⵃⵙⵓ ⵎⴰⵕⵕⴰ ⵜⵉⵎⴷⵢⴰⵣⵉⵏ ⵍⵍⵉ ⵙⴳⵓⴷⵉⵏ ⵉⵎⵄⵛⴰⵕ ⵜⴰⵙⵓⵜⵉⵏ ⴼ ⵜⴰⵙⵓⵜⵉⵏ, ⵎⵇⵇⴰⵔ ⵏⵉⵜ ⵓⵎⴰⵏⵜ ⴰⵡⴰⵍ ⵉⵀⵔⵛⵏ, ⵢⵉⵥⴹⵉⵕ ⵓⵍⴰ ⴰⴷ ⵉⵙⵏⴼⵍⴻⵍ ⵜⵉⵎⴷⵢⴰⵣⵉⵏ ⵢⴰⴹⵏⵉⵏ ⴳⴰⵏⵉⵏ ⵜⵉⵎⴰⵢⵏⵓⵜⵉⵏ ⵙ ⵎⴰⴷ ⴷ ⵢⵉⵡⵉ ⵓⵎⵏⴰⴹ ⵏ ⵉⵎⵄⵛⴰⵕ, ⵢⵉⵥⴹⵉⵕ ⵓⵍⴰ ⴰⴷ ⵉⵙⴰⵡⴰⵍ ⵙ ⵜⵖⴰⵔⴰⵙⵜ ⵍⵍⵉ ⵙⴰ ⵙⴰⵡⴰⵍⵏ ⵡⵓⴷⴰⵢⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵟⵟⴼ ⵓⵍⴰ ⴰⴳⵕⴹ ⵉⴷⵓⵙⵏ ⴰⴼⴰⴷ ⴰⴷ ⴰⵙⵏ ⵉⵙⵙⴼⵍⵉⴷ ⵓⴳⴷⵓⴷ ⵎⵇⵇⴰⵔ ⵜ ⵢⴰⴳⴳⵓⴳ.
- ⵍⵃⵣⵣⴰⵏ / ⵍⵃⴰⵅⴰⵎ/ⵙⴷⵉ ⵍⵅⴰⵅⴰⵎ:
ⵙⵏⴼⵍⵍⵃⵣⵣⴰⵏ ⵏⵜⵜⴰⵏ ⴰⴷ ⵉⴳⴰⵏ ⴰⵔⴳⵔⴰⴳ ⵏ ⵡⵓⴷⴰⵢⵏ. ⴰⵡⵔⵉⴽ ⵍⵍⵉ ⵔⴰⴷ ⵢⵓⵔⴰⵔ ⵜⴰⵎⵍⴰⵍⵜ ⴰⴷ, ⴰⵔ ⵉⵍⵙⵙⴰ ⵜⵉⵎⵍⵙⵉⵜ ⵉⴳⴰⵏ ⵜⴰⴱⵔⴽⴰⵏⵜ (ⵜⴰⵙⴳⴳⵯⴰⵏⵜ), ⵉⴳ ⵏⵏ ⵢⴰⵜ ⵜⵛⵉⵛⵉⵜ ⴼ ⵉⴳⴳⵉ ⵏ ⵓⴳⴰⵢⵢⵓ ⵏⵏⵙ, ⵉⵟⵟⴼ ⵓⵍⴰ ⵜⴰⵎⴰⵔⵜ ⵖⵣⵣⵉⴼⵏ, ⴰⵔ ⵉⵜⵜⴰⵙⵉ ⴰⴷⵍⵉⵙ ⴰⵅⴰⵜⴰⵔ ⵏ ⵓⵙⴳⴷ ⵏ ⵡⵓⴷⴰⵢⵏ ⵍⵍⵉ ⵎⵓ ⵉⵙⵎ "ⵜⵜⴰⵡⵕⴰⵜ". ⵍⵃⵣⵣⴰⵏ ⵏⵜⵜⴰⵏ ⴰⴷ ⵉⵜⵜⴳⴳⴰⵏ ⴰⵏⵎⵖⵓⵔ ⵏ ⵜⵔⴰⴱⴱⵓⵜ ⴳ ⵓⵎⵏⵉⴷ ⵉⵥⵍⵉⵏ ⵙ ⵡⵓⵙⵎⴷⵢ ⴰⴷ ⴷⴰⵔ ⵉⵎⵄⵛⴰⵕ. ⴰⵔ ⵜ ⵏⵜⵜⴰⴼⵉ ⴰⵔ ⵉⵙⴰⵡⴰⵍ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵥⵍⵉⵏ ⵙ ⵜⵖⴰⵔⴰⵙⵜ ⵍⵍⵉ ⵙ ⵜⵜ ⵙⴰⵡⴰⵍⴰⵏ ⵡⵓⴷⴰⵢⵏ ( ⵙ ⵓⵎⴷⵢⴰ ⴰⵙⵏⴼⵍ ⵏ "ⵙ" ⵙ "ⵛ" ⴷ ⵓⵙⵎⵔⵙ ⵏ ⵜⴳⵓⵔⵉⵡⵉⵏ ⴰⵎ: ⵣⴷⵉ, ⴱⵓⵀⴱⵓⵀ, ⵍⵎⵣⵖⵓⴱ...). ⵏⵜⵜⴰⵏ ⴰⴷ ⵉⵜⵜⴳⴳⴰⵏ ⴱⴰⴱ ⵏ ⵡⴰⵡⴰⵍ ⴳ ⵜⵔⴰⴱⴱⵓⵜ ⵏ ⵉⵎⵄⵛⴰⵕ, ⵉⵡⴰⵍⵉⵡⵏ ⵏⵏⵙ ⵓⵔ ⴱⴷⴷⴰ ⵖⵓⵙⵏ ⴰⵛⴽⵓ ⴰⵔ ⴳⵉⵙⵏ ⵜⵜⵉⵍⵉⵏ ⴽⵉⴳⴰⵏ ⵏ ⵉⵡⴰⵍⵉⵡⵏ ⵍⵍⵉ ⴱⴰⵀⵔⴰ ⵀⵔⵛⵏⵉⵏ, ⵍⵍⵉ ⵙⴰⴹⵚⴰⵏⵉⵏ ⴰⴳⴷⵓⴷ. ⵏⵜⵜⴰⵏ ⵓⵍⴰ ⴰⴷ ⵢⴰⴽⴽⴰⵏ ⴷⴷⵓⵄⴰ ⴳ ⵜⴳⵉⵔⴰ ⵎⴰⴷ ⵓⵎⵥⵏ ⵉⵎⵄⵛⴰⵕ ⴽⵔⴰ ⵏ ⵜⴰⵔⵔⴰⴳⵜ ⵣⵓⵏ ⴷ ⵉⴷⵔⵉⵎⵏ ⵏⵖⴷ ⵙⵙⴽⴽⴰⵔ. ⵉⵜⵜⵓⵙⵙⴰⵏ ⵍⵃⵣⵣⴰⵏ ⵓⵍⴰ ⵙ ⵜⵎⵔⴰⵔⵓⵜⵉⵏ ⴷ ⵉⵅⴼⴰⵡⴰⵍⵏ ⵏⵏⵙ ⵙⴰⴹⵚⴰⵏⵉⵏ ⴳ ⵓⵏⵢⴰⵍⴽⴰⵎ ⵏⵏⵙ ⴷ ⵓⵍⴳⴳⵓⴷ ⴷ ⵉⵡⴰⵍⵉⵡⵏ ⵍⵍⵉ ⵉⵜⵜⵉⵏⵉ ⵓⴳⴷⵓⴷ. ⵉⵎⵄⵛⴰⵕ ⵏⵜⵜⵏⵉ ⴰⵔ ⵜⵜⵉⵏⵉⵏ ⵙ ⵜⵖⴰⵔⴰⵙⵜ ⵏⵉⵜ ⵍⵍⵉ ⵙ ⵙⴰⵡⴰⵍⴰⵏ ⵓⴷⴰⵢⵏ: ⵍⵃⵣⵣⴰⵏ ⵉⵏⵓ, ⵛⵉⴷⵉ ⵍⵃⵣⵣⴰⵏ, ⵙⴷⵉ ⵍⵅⴰⵅⴰⵎ.
- ⵙⵎⵉⵃⴰ / ⵛⵎⵉⵃⴰ:
ⵙⵏⴼⵍⵜⴰⵎⵖⴰⵔⵜ ⵜⵓⴷⴰⵢⵜ, ⵜⴳⴰ ⵜⴰⵎⵟⵟⵓⴹⵜ ⵏ ⵍⵃⵣⵣⴰⵏ. ⴰⵡⵔⵉⴽ ⵍⵍⵉ ⵔⴰⴷ ⵉⵙⴽⵔ ⵜⵉⵍⴰⵍⵜ ⴰⴷ, ⵉⵇⵇⴰⵏ ⴷ ⴰⴷ ⵢⵉⵥⴹⵉⵕ ⴰⴷ ⵉⵙⴽⵔ ⵣⵓⵏⴷ ⵎⴽ ⵍⵍⵉ ⵙⴽⴰⵔⵏⵜ ⵜⵎⵖⴰⵔⵉⵏ ⵜⵓⴷⴰⵢⵉⵏ ⴳ ⵜⵖⴰⵔⴰⵙⵜ ⵍⵍⵉ ⵙ ⵙⴰⵡⴰⵍⵏⵜ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵜⵉⵎⵍⵙⴰ ⵏⵏⵙⵏⵜ, ⵜⴰⵡⴰⴷⴰ ⵏⵏⵙⵏⵜ...
- ⵜⴰⵡⴰⵢⵢⴰ:
ⵙⵏⴼⵍⵜⴳⴰ ⵜⵜ ⵜⵅⴷⴷⴰⵎⵜ ⵏⵉⵖ ⵜⴰⵎⵙⵡⵓⵔⵉⵜ ⵍⵍⵉ ⵉⵙⴽⴰⵔⵏ ⵜⵉⵡⵡⵓⵔⵉⵡⵉⵏ ⴳ ⵓⴳⵏⵙ ⵏ ⵜⴰⴷⴷⴰⵔⵜ. ⵡⴰⵍⵍⵉ ⵔⴰⴷ ⵉⵙⴽⵔ ⵜⵉⵍⴰⵍⵜ ⴰⴷ ⴳ ⵓⵎⵓⵙⵙⵓ ⵏ ⵉⵎⵄⵛⴰⵕ, ⵉⵇⵇⴰⵏ ⴷ ⴰⴷ ⵉⴽⵍⵓ ⵜⴰⴼⴳⴳⴰ ⵏⵏⵙ ⵙ ⵓⴽⵍⵓ ⴰⴱⵔⴽⴰⵏ, ⵉⵙⵙⵏ ⵓⵍⴰ ⴰⴷ ⵉⵙⴰⵡⴰⵍ ⴰⵡⴰⵍ ⵙ ⵓⴳⵕⴹ ⵉⴱⵙⵓⵙⵏ ⵉⴳⴰⵏ ⵡⵉⵏ ⵜⵎⵖⴰⵔⵉⵏ, ⵉⵍⵙ ⵜⵉⵎⵍⵙⵉⵜ ⴷ ⵢⵓⵙⴰⵏ ⴷ ⵜⵎⵖⴰⵔⵜ ⵉⵙⴽⴰⵔⵏ ⵜⴰⵡⵡⵓⵔⵉ ⴳ ⵓⴳⵏⵙ ⵏ ⵜⴳⵎⵎⵉ.
ⴳ ⵓⵎⵓⵙⵙⵓ ⵏ ⵉⵎⵄⵛⴰⵕ, ⴰⵡⵔⵉⴽ ⴰⴷ ⴰⵔ ⵉⵜⵜⴽⴽⴰ ⴳⵔ ⵓⴳⴷⵓⴷ ⴰⵔ ⵉⵙⵎⵏⵉⴷ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵍⵍⵉ ⵉⴳⴰ ⴳ ⵜⵎⵛⵖⴰⵍⵜ ⵏⵉⵖ ⵖ ⵜⵣⴳⴰⵡⵜ ⵏⵏⵙ ⵢⵉⵔⵉ ⴰⴷ ⵜⵏⵜ ⵉⵣⵣⵏⵣ ⵎⴽ ⵜⴳⴰ ⵜⵎⵢⵓⵔⵜ ⵏ ⵉⵎⵄⵛⴰⵕ. ⴰⵎⵙⴰⵡⴰⵍ ⵏⵏⵙ ⴰⴽⴷ ⵓⴳⴷⵓⴷ ⴳⵉⵙ ⴳⴰⵔ ⵜⵉⴳⵓⵔⵉⵡⵉⵏ ⵀⵔⵛⵏⵉⵏ ⵙⴽⴰⵔⵏⵉⵏ ⵜⴰⴹⵚⴰ.
- ⴰⵏⴹⴰⴼ:
ⵙⵏⴼⵍⴰⵔ ⴰⵙ ⵏⵜⵜⵉⵏⵉ ⵓⵍⴰ ⴰⴱⵓⵍⵉⵙⵉ, ⵏⵜⵜⴰⵏ ⴰⴷ ⵉⵜⵜⵉⵍⵉⵏ ⴼ ⵓⵙⵏⵎⴰⵍⴰ ⵏ ⵓⵎⵓⵙⵙⵓ ⵏ ⵉⵎⵄⵛⴰⵕ ⴷ ⵓⵙⵡⵡⵓⴷⴷⵓ ⵏⵏⵙ ⵉⵥⵉⵍⵏ ⴷ ⵉⵕⵡⴰⵏ, ⵏⵜⵜⴰⵏ ⴰⵏⵏ ⵉⵜⵜⵡⴰⵍⴰⵏ ⴰⵎⵏⵉⴷ ⵏ ⵜⵏⴼⵔⵓⵜ ⴳ ⵓⵎⵓⵙⵙⵓ ⴰⴷ, ⴰⵔ ⵉⵜⵜⴳⴳⴰ ⵜⵜⵎⵉ ⵉⵙⴱⵉⴷⴷ ⵡⴰⵏⵏⴰ ⵉⵔⴰⵏ ⴰⴷ ⵉⵙⴽⵔ ⴽⵔⴰ ⵏ ⵜⴱⴱⴰⵢⴹⴰⵕⵉⵏ ⴷⴰⵜ ⵏ ⵜⵣⵣⵉⴳⵣⵜ ⵏ ⵜⴼⴼⵓⴳⵍⴰ ⴰⴷ.
ⴳ ⵜⴳⴰⵔⵉⵡⵉⵏ ⴰⴷ, ⵍⵍⵉⵖ ⵍⵍⴰⵏ ⵉⵙⵏⴼⵍⵏ ⴳⴳⵓⵜⵏⵉⵏ ⴳ ⵓⵎⵓⵙⵙⵓ ⵏ ⵉⵎⵄⵛⴰⵕ ⴰⵢⵍⵍⵉⵖ ⴰⴽⴽⵯ ⵍⴽⵎⵏ ⴰⴷ ⴳⵉⵏ ⵢⴰⵏ ⵓⴽⵕⵏⴰⴼⴰⵍ ⴰⵅⴰⵜⴰⵔ ⵍⵍⵉ ⵙⵏⵎⴰⵍⴰⵏⵜ ⵜⵎⵙⵎⵓⵏⵉⵏ ⵙ ⵓⵎⵢⴰⵡⴰⵙ ⴷ ⵜⵏⴱⴰⴹⵉⵏ ⵜⵉⴷⵖⴰⵔⴰⵏⵉⵏ, ⵙ ⵓⵎⴷⵢⴰ ⴰⴽⵕⵏⴰⴼⴰⵍ ⵏ ⵜⵖⵔⵎⵜ ⵏ ⵜⵣⵏⵉⵜ ⵉⵜⵜⵉⵍⵉⵏ ⴳ ⴽⵔⴰⵢⴳⴰⵜ ⴰⵙⴳⴳⵯⴰⵙ, [8] ⴷⴰ ⵏⵜⵜⴰⴼⴰ ⵉⵡⵔⵉⴽⵏ ⵉⵎⴰⵢⵏⵓⵜⵏ ⵍⵍⵉ ⵙⵎⵏⵉⴷⵏ ⵉⵎⵄⵛⴰⵕ, ⴰⵔ ⵜⵜⴳⴳⴰⵏ ⴰⵏⵛⴽ ⵏ ⵉⵎⵓⴷⴰⵔ ⴰⵎ: ⴰⴷⵉⵏⵓⵚⵓⵕ, ⵉⵍⴼ, ⴰⵕⴰⵎ, ⵉⴼⵉⵙ, ⵜⴰⴼⵓⵏⴰⵙⵜ, ⵍⴱⴰⵣ, ⴰⵙⵔⴷⵓⵏ, ⴰⵙⵍⵎ, ⵜⴰⵡⵡⵓⴽⵜ, ⴰⴳⴰⵢⵡⴰⵔ, ⴷ ⵡⵉⵢⵢⴰⴹ ⵢⴰⴹⵏⵉⵏ.
ⵜⵉⴼⵔⴽⵉⵡⵉⵏ ⵏ ⵓⵙⴼⵓⴳⵍⵓ ⵏ ⵉⵎⵄⵛⴰⵕ
ⵙⵏⴼⵍ
* ⵜⴰⴼⵔⴽⴰ ⵏ ⵓⵙⵓⵊⴷ:
ⵙⵏⴼⵍⴷⴰⵜ ⵎⴰⴷ ⵓⵔⵜⴰ ⵜⴻⵜⵜⵓⵙⵏⵜⴰ ⵜⴼⴼⵓⴳⵍⴰ ⵏ ⵉⵎⵄⵛⴰⵕ ⴳ ⵓⵣⵎⵣ ⵍⵍⵉⵖ ⵜⵜⵉⵍⵉ ⴳ ⵡⴰⵙⵙ ⵡⵉⵙ ⵜⵥⴰ ⴳ ⵡⴰⵢⵢⵓⵔ ⵏ ⵎⵓⵃⴰⵕⵕⴰⵎ ⴰⵀⵉⵊⵔⵉ, ⴰⵔ ⵜⵜⵎⵓⵏⵏ ⵉⵡⴷⴰⵏ ⵍⵍⵉ ⵔⴰⴷ ⵜⵜ ⵉⵙⴽⵔ ⴳ ⵜⵔⴰⴱⴱⵓⵜ, ⵙⵜⵉⵏ ⴰⴷⵖⴰⵔ ⵍⵍⵉⵖ ⵔⴰⴷ ⵙⵡⵓⵔⵉⵏ. ⵜⴰⵡⵡⵓⵔⵉ ⴰⴷ ⴰⵔ ⵜⵜⵉⵍⵉ ⴽⵉⴳⴰⵏ ⵏ ⵡⵓⵙⵙⴰⵏ ⵏⵉⵖ ⴰⴽⴽⵯ ⵎⵏⵏⴰⵡ ⵉⵎⴰⵍⴰⵙⵙⵏ ⴷⴰⵜ ⵏ ⵜⴼⵓⴳⵍⴰ. ⴳ ⵜⴼⵔⴽⴰ ⴰⴷ ⵜⴰⵎⵣⵡⴰⵔⵓⵜ, ⴰⵔ ⵉⵜⵜⵉⵍⵉ ⵓⵃⵉⵢⵢⵍ ⵏⵉⵖ ⴰⵙⵓⵊⴷ ⵏ ⵎⴰⵕⵕⴰ ⵜⵉⵖⴰⵡⵙⵉⵡⵉⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵎⵓⵔⵙ ⵏ ⵜⴼⴼⵓⴳⵍⴰ ⵏ ⵉⵎⵄⵛⴰⵕ ⴰⵎ: ⴰⵙⵜⴰⵢ ⵏ ⵉⵡⵔⵉⴽⵏ, ⴰⵙⵓⵊⴷ ⵏ ⵉⵎⴰⵙⵙⵏ, ⴰⵙⵓⵊⴷ ⵏ ⵜⵎⵍⵙⴰ, ⴰⵙⵏⴼⵍⵓⵍ ⴷ ⵓⵙⵓⵊⴷ ⵏ ⵜⴰⵍⵍⵖⴰⵜⵉⵏ ⴷ ⵜⵓⵔⴰⵔⵉⵏ, ⴰⴱⵟⵟⵓ ⵏ ⵜⵉⵍⴰⵍ ⴳⵔ ⵉⵡⵔⵉⴽⵏ ( ⵜⴰⵔⴰⴱⴱⵓⵜ ⵏ ⵓⵥⴰⵡⴰⵏ, ⵜⴰⵔⴰⴱⴱⵓⵜ ⵏ ⵉⴷ ⴱⵓ ⵜⴳⵊⴷⴰ, ⵜⴰⵔⴰⴱⴱⵓⵜ ⵏ ⵓⵙⵎⴷⵢⴰ...). ⴳ ⵜⴼⵔⴽⴰ ⴰⴷ, ⴰⵔ ⵜⵜⵉⵍⵉⵏ ⵓⵍⴰ ⵉⵙⴰⵏⵓⵏⵏ ⴷ ⵜⵉⵔⵎⵉⵜⵉⵏ ⵜⵉⵎⵣⵡⵓⵔⴰ ⴼ ⵓⵙⵎⵏⵉⴷ. ⵍⵍⵉⵖ ⵜⴳⴰ ⵜⴼⴼⵓⴳⵍⴰ ⵏ ⵉⵎⵄⵛⴰⵕ ⵜⴰⴷ ⴱⴷⴷⴰ ⵉⵣⴷⵉⵏ ⴷ ⵡⴰⴹⴰⵏ, ⵀⴰⵜⵉ ⴰⵡⴷ ⵉⵙⵓⵊⴷⵏ ⴰⴷ ⴰⵔ ⵜⵜⵉⵍⵉⵏ ⵖⴰⵙ ⵖ ⵢⵉⴹ ⴳ ⵉⴷⵖⴰⵔⵏ ⵓⵔ ⵉⵙⵙⵏ ⵢⴰⵏ.
* ⵜⴰⴼⵔⴽⴰ ⵏ ⵓⵙⵎⵏⵉⴷ:
ⵙⵏⴼⵍⵉⵖ ⵉⵍⴽⵎ ⵡⴰⵙⵙ ⵡⵉⵙ ⵜⵥⴰ ⴳ ⵡⴰⵢⵢⵓⵔ ⵏ ⵎⵓⵃⴰⵕⵕⴰⵎ, ⵙⵎⴷⵏ ⵉⵎⵄⵛⴰⵕ ⵜⴰⵡⵡⵓⵔⵉ ⵏ ⵓⵙⵓⵊⴷ ⴷ ⵓⵃⵉⵢⵢⵍ. ⵜⵍⴽⵎ ⵖⵉⵍⴰⴷ ⵜⵉⵣⵉ ⵏ ⵓⵙⵎⵏⵉⴷ ⵏ ⵓⵙⵏⴼⵍⵓⵍ ⵍⵍⵉ ⵙⵙⵓⵊⴰⴷⵏ. ⵢⵉⵍⵉ ⵓⵙⵏⵜⵉ ⵙ ⵓⵙⵙⵔⵖ ⵏ ⵜⴰⴽⴰⵜ ⵏ ⵜⵎⵄⵛⵓⵕⵜ ⴷⴼⴼⵉⵔ ⵏ ⵜⵥⴰⵍⵍⵉⵜ ⵏ ⵜⵉⵏⵢⵉⴹⵚ. ⴷⴼⴼⵉⵔ ⵎⴰⴷ ⵙⵙⵔⵖⴰⵏ ⴳⴰⵏⴳⴰ ⴷ ⵜⵍⵍⵓⵏⵏⴰ, ⴰⵔ ⵜⵙⵙⵏⵜⵉ ⵜⵔⴰⴱⴱⵓⵜ ⵏ ⵓⵥⴰⵡⴰⵏ ⵉⵡⵉⵣ ⵏⵏⵙ, ⵙ ⵜⵍⵍⴰⵖⴰⵜⵉⵏ ⴳⴰⵏⵉⵏ ⵜⵉⵎⵏⵏⴰⵡⵉⵏ ⴷ ⵓⴷⵔⴰⵣ ⵏ ⵓⵃⵡⴰⵛ ⵙ ⵜⵓⵜⵍⴰⵢⵜ ⵏ ⵉⵎⵄⵛⴰⵕ ⴳ ⵜⵜⵉⵍⵉⵏ ⵉⵄⵓⵕⵉⴹⵏ, ⵉⴷ ⴱⵓ ⵜⴳⵊⴷⴰ ⴰⵡⴷ ⵏⵜⵜⵏⵉ ⴰⵔ ⵜⵜⴰⵡⵙⵏ ⴳ ⵜⴼⵔⴽⴰ ⴰⴷ ⵙ ⵜⵓⴽⴽⵉⵎⵉⵏ ⵍⵍⵉ ⵙⴽⴰⵔⵏ ⴼ ⵉⴳⴳⵉ ⵏ ⵡⴰⴽⴰⵍ. ⵉⵖ ⵉⵙⵎⴷ ⵓⵙⵎⵏⵉⴷ ⵏ ⵓⵥⴰⵡⴰⵏ, ⴰⵔ ⵜⵍⴽⴽⵎ ⵜⵡⴰⵍⴰ ⵏ ⵓⵙⵎⵏⵉⴷ ⵏ ⵓⵎⵣⴳⵓⵏ ⵖ ⴷⵔⵔⵓⵏ ⵎⴰⵕⵕⴰ ⵏ ⵉⵡⵔⵉⴽⵏ ⴽⵓ ⴷⴷ ⵢⴰⵏ ⵙ ⵜⵉⵍⴰⵍⵜ ⵏⵏⵙ: ⵍⵃⵣⵣⴰⵏ, ⵙⵎⵉⵃⴰ, ⵜⴰⵡⴰⵢⵢⴰ, ⴰⵏⴹⴰⴼ. ⴳ ⵜⵉⵣⵉ ⴰⴷ, ⴰⵔ ⵙⵎⵎⵓⵏⵏ ⵉⵎⵄⵛⴰⵕ ⵜⴰⵔⵔⴰⴳⵉⵏ ⵍⵍⵉ ⴰⵙⵏ ⴰⴽⴽⴰⵏ ⵎⵉⴷⴷⵏ, ⴰⵔ ⵜⵏ ⵉⴹⴼⵓⵕ ⵓⴳⴷⵓⴷ ⵉⴳⴳⵓⵜⵏ, ⵉⵖ ⴽⴽⴰⵏ ⵎⴰⴷ ⴽⴽⴰⵏ ⴰⵔ ⵙⴽⴰⵟⵟⴰⵢⵏ ⵜⵉⵍⴰⵍ ⴰⴷ ⵏ ⵓⵎⵣⴳⵓⵏ ⵙ ⵜⴰⵍⵍⵖⴰⵜⵉⵏ ⵍⵍⵉ ⵜⵜⵓⵔⴰⵔⵏ ⴷ ⵜⵃⵡⴰⵛⵉⵏ ⴼⵙⵓⵙⵏⵉⵏ. ⵉⵖ ⵓⵎⵣⵏ ⴽⵔⴰ ⵏ ⵜⴰⵔⵔⴰⴳⵜ, ⴰⵔ ⵢⴰⴽⴽⴰ ⵍⵃⵣⵣⴰⵏ ⴷⴷⵓⵄⴰ ⵙ ⵜⵖⴰⵔⴰⵙⵜ ⵖ ⴱⴷⴷⴰ ⵜⵍⵍⴰ ⵜⴰⴹⵚⴰ. ⵖⵉⴽ ⴰⴷ ⴰⴷ ⵉⴳⴰ ⵓⵙⵉⵏⴰⵔⵢⵓ ⵏ ⵓⵙⵎⵏⵉⴷ ⵏ ⵉⵎⵄⵛⴰⵕ ⴰⵔ ⴽⵉⵖ ⴽⵓⵍⵍⵓ ⴽⴽⴰⵏ ⵜⴰⵎⴰⵣⵉⵔⵜ.
* ⵜⴰⴼⵔⴽⴰ ⵏ ⵓⵙⴼⵓⴳⵍⵓ ⴰⵎⴳⴳⴰⵔⵓ:
ⵙⵏⴼⵍⴳ ⵜⴳⵉⵔⴰ ⵎⴰⴷ ⵙⵎⴷⵏ ⵉⵎⵄⵛⴰⵕ ⵜⴰⵙⵓⵜⵍⵜ ⵏⵏⵙⵏ, ⴽⴽⵉⵏ ⴽⵓⵍⵍⵓ ⴼ ⵜⴳⵯⵎⵎⴰ ⵏ ⵓⵙⵓⵏ ⵏⵉⵖ ⵜⵉⵖⵔⵎⵜ, ⵍⵍⵉ ⵙⵖⵉⵡⵙⵏ ⴰⴷ ⵜⵏⵜ ⴽⴽⵉⵏ ⴳ ⵜⵎⴰⵣⵉⵔⵜ ⴰⴽⴽⵯ, ⴰⵔ ⵜⴻⵜⵜⵉⵍⵉ ⵢⴰⵜ ⵜⴼⵓⴳⵍⴰ ⵜⴰⵎⴳⵔⵓⵜ ⵖ ⴷⵔⵓⵏ ⴽⵓⵍⵍⵓ ⵉⵎⵣⴷⴰⵖⵏ ⵏ ⵓⵙⵓⵏ, ⴰⵔ ⴳⵉⵙ ⵛⵜⵜⴰⵏ ⵜⵉⵔⵎⵜ ⵉⵔⵡⴰⵙⵏ ⵜⵉⵏ ⵍⵎⵄⵕⵓⴼ. ⴷⴼⴼⵉⵔ ⵏⵏⵙ ⴰⵔ ⵉⵜⵜⵉⵍⵉ ⵓⵃⵡⴰⵛ ⴳ ⵜⵜⵃⴰⴹⴰⵕⵏ ⵉⵡⵔⵉⴽⵏ ⵍⵍⵉ ⵙⴽⵔⵏⵉⵏ ⵉⵎⵄⵛⴰⵕ, ⵎⴰⵛⵛ ⵜⵉⴽⴽⵍⵉⵜ ⴰⴷ ⵜⴰⵔ ⵓⴷⵎⴰⵡⵏ ⵏⵉⵖ ⵜⴰⵙⵓⵏⵉ, ⵜⴰⵔ ⵜⵉⵎⵍⵙⵉⵜ ⵏ ⵓⵃⵟⵟⵓ ⵍⵍⵉ ⴰⴷⵍⵍⵉ ⵍⵙⵙⴰⵏ ⴳ ⵡⴰⴹⴰⵏ ⵣⵔⵉⵏⵉⵏ ⵍⵍⴰⵙⵏⵉⵏ, ⵖⵎⴽ ⴰⵏⵏ ⴰⴼ ⵉⵛⵇⵇⴰ ⴼ ⴽⵓ ⵢⴰⵏ ⴰⴷ ⵜⵏ ⵢⴰⴽⵯⵣ, ⵢⴰⴽⵯⵣ ⵓⵍⴰ ⵜⵉⵍⴰⵍⵜ ⵏⵉⵖ ⵜⴰⵙⵎⵉⴳⵍⵜ ⵍⵍⵉ ⵉⵙⴽⵔ ⴽⵓ ⴷⴷ ⵢⴰⵏ ⴳⵉⵙⵏ.
ⵉⵎⴷⵢⴰⵜⵏ ⵏ ⵡⵓⵔⴰⵔⵏ ⵜⵜⵉⵏⵉⵏ ⵉⵎⵄⵛⴰⵕ
ⵙⵏⴼⵍ
ⴰⵎⵄⵛⵓⵕ ⴰⵎⵓⴷⵔ
"ⴱⵉⵙⵎⵉ ⵍⵍⴰⵀ ⴰ ⵉⵎⵉ ⵏⵓ
ⵍⵓⵃ ⵉⵎⵓⵔⵉⴳ
ⴰⴷ ⴰⴽ ⵏⵖⵔ ⴰ ⵕⴱⴱⵉ
ⴳⴰⵖ ⵜⵉⵙⵏⵜ ⵉ ⵡⴰⵡⴰⵍ
ⴰⴷ ⵉⵢⵉ ⵜⵄⴰⵡⵏ ⵜⴰⵙⴰ ⵏⵓ
ⴰ ⵏⵥⵥⴰⴹ ⵉⵎⵓⵔⵉⴳ
ⴰ ⴰⵢⵜ ⵍⵎⴰⴽⴰⵏ
ⵄⵍⴰ ⵕⴱⴱⵉ ⴹⵉⴼⵍⵍⴰⵀ
ⵛⴰⵀⴷⴰⵜ ⴰ ⵎⴰ ⵖⵉⴷ ⵉⵍⵍⴰⵏ
ⵉⵙ ⴽⵓⵍⵍⵓ ⵏⴳⴰ ⵢⴰⵏ
ⵏⴽⴽⵉⵏ ⵓⵔ ⴳⵉⵖ ⵓⴷⴰⵢ
ⵍⵀⴹⵕⵜ ⴰⴼ ⵏⵣⵣⵉⴳⵉⵣ".
- ⵙⴳ ⵡⵓⵔⴰⵔⵏ ⵢⴰⴹⵏⵉⵏ ⵍⵍⵉ ⵙ ⴰⵔ ⵜⵜⵉⵔⵉⵔⵏ ⵉⵎⵄⵛⴰⵕ, ⴷⴰ ⵏⵜⵜⴰⴼⴰ ⵡⵉⴷ ⴳ ⵍⵍⴰⵏ ⵉⵄⵓⵕⵉⴹⵏ ⵏⵉⵖ ⴳⴰⵔ ⵉⵡⴰⵍⵉⵡⵏ ⵀⵔⵛⵏⵉⵏ ⴳⴰⵏⵉⵏ ⴳⴰⵔ ⵍⵍⵉ ⵏⵉⵜ ⵏⵜⵜⴰⴼⴰ ⴳ ⵓⴷⵍⵉⵙ ⵍⵍⵉ ⵢⵓⵔⴰ ⵎⴰⵙⵙ ⴱⵏⵉⴷⵉⵔ, ⴰⵎⴷⵢⴰ[10]:
"ⴰⵔⴳⴰⵣ ⵏ ⵍⴰⵍⵍⴰ ⵕⵃⵎⴰ,
ⵉⴳⵏ ⴷⴰⵔⵙ, ⵉⵅⵅⵉ ⴷⴰⵔⵙ!
ⵓⴼⵉⵖ ⵏⵏ ⵎⴰⴽ ⵖ ⵜⴰⴳⴰⵏⵜ ⵉⵛⵛⴰ ⵜⵜ ⵓⵚⵎⵎⵉⴹ!
ⵏⴽⴽⵉ, ⴽⴰ ⵉⵀⴷⴰ ⵕⴱⴱⵉ, ⴳⵏⵖ ⴼⵍⵍⴰⵙ ⴰⵔ ⴰⵣⴰⵍ!
ⵉ ⵕⴱⴱⵉ, ⴰ ⵅⵜⵉⵏⵏ ⵉⵍⵍⴰⵏ ⵖ ⵓⴼⵍⵍⴰ ⵓⵣⵓⵔ
ⵢⴰⵏ ⵡⴰⵎⵎⴰⵃ ⵉⵥⴳⴳⵯⴰⵖⵏ, ⵉ ⴱⵓ ⴳⴰⵏⴳⴰ!"
- ⵙⴳ ⵡⵓⵔⴰⵔⵏ ⵍⵍⵉ ⵉⵣⵓⵣⵣⵔ ⵓⵎⵔⵣⵓ ⵎⵓⵃⵎⵎⴰⴷ ⴰⵎⵏⵓⵏ ⴳ ⵓⴷⵍⵉⵙ ⵏⵏⵙ ⵍⵍⵉ ⵢⵓⵔⴰ ⴼ ⵉⴼⵔⴰⵏ ⴰⵟⵍⴰⵚ ⴰⵎⵥⵥⵢⴰⵏ, ⴷⴰ ⵏⵜⵜⴰⴼⴰ:
"ⴱⵉⵙⵎⵉ ⵍⵍⴰⵀ ⵕⵕⴰⵃⵎⴰⵏ ⵄⵍⴰ ⴱⴰⴱ ⵍⵍⴰⵀ ⵏⴽⵛⵎ ⴷ
ⵍⵎⴰⴽⴰⵏ ⵙ ⵚⵚⴰⵍⵉⵃⵉⵏ ⴰ ⴳⵉⴽ ⴱⴷⵓⵃ ⴰⵇⵚⵉⴹ
ⵉⵣⵔⵉ ⴷ ⵖ ⵜⴰⵎⴰ ⵏⵙⵙⵏⴽⵔ, ⵏⵖⵉ ⵜ ⵓⴽⴰⵏ, ⵏⵖⵍⵉ ⵜⵜ
ⴰ ⵍⴱⴰⵔⵉ ⵜⵄⴰⵍⴰ ⵍⵎⵓⵊⵓⴷ ⴽⴼ ⴰⵙⵏ ⵍⵉⵊⴰⵕⵜ ⵏⵏⵙⵏ
ⴰ ⵎⵓⵛⵉ ⴷ ⵀⴰⵕⵓⵏ ⴰ ⵍⴰⵡⴱⴰⵣ ⵎⵃⴰⴷⴰⵏⵉⵏ
ⵉⵖ ⵍⵍⴰⵏ ⴼ ⵓⴽⵛⵛⵓⴹ ⴰⵔ ⵙⵏⵅⵉⵍⵉⴼⵏ ⵟⵟⵕⵃ
ⵉⵛⵉⵔⵉ ⵏ ⵜⵔⴱⵉⵜ ⵎⵥⵥⵉⵏ ⵉⵣⵉⵢⵏ ⵉⵍⴰ ⵜⵉⵖⵎⵔⵉⵏ
ⵉⵎⵎⴰ ⵡⵉⵏⵏⵎ ⴰ ⵜⴰⵛⵉⴱⴰⵏⵜ ⵉⵊⵍⵅ ⵓⵚⵓⴹ
ⴰ ⴱⵓⴱⴱⵓ ⴰ ⵉⴳ ⴰⵢⴷⴷⵉⴷ ⴰⵅⵅⵏⴰ ⵢⵓⵙⵉ ⵍⵄⵡⵉⵏ".[11]
ⵏⵥⴹⴰⵕ ⴰⴷ ⵏⵉⵏⵉ ⵎⴰ ⵙ ⴷ ⵎⵇⵇⴰⵔ ⵍⵍⴰⵏⵜ ⴳⴰⵔ ⵜⵉⴳⵓⵔⵉⵡⵉⵏ ⴳⴰⵏⵉⵏ ⵜⵉⵏ ⵉⵄⵓⵕⵉⴹⵏ ⴳ ⵓⵎⴰⵡⴰⵍ ⴷ ⵜⵏⴹⴹⴰⵎⵉⵏ ⴷ ⵜⵎⴷⵢⴰⵣⵉⵏ ⴷ ⵉⵎⵏⵏⵉⵜⵏ ⴰⴽⴽⵯ ⵍⵍⵉ ⵜⵜⵉⵏⵉⵏ ⵉⵎⵄⵛⴰⵕ, ⵀⴰⵜⵉ ⴳⴰⵏ ⵢⴰⵜ ⵜⵖⴰⵡⴰⵙⴰ ⵉⴳⴰⵏ ⵜⴰⵏⵎⵢⵓⵔⵜ ⴰⵛⴽⵓ ⵎⴰⵢⴰⴷ ⵏⵉⵜ ⴰⴼ ⵜⴻⵜⵜⵓⵚⴽⴰ ⵜⴼⵓⴳⵍⴰ ⵏ ⵉⵎⵄⵛⴰⵕ, ⵜⵥⵍⵉ ⵓⵍⴰ ⵙⵔⵙ ⵙⴳ ⴽⵓⵍⵍⵓ ⵜⵉⴼⵓⴳⵍⵉⵡⵉⵏ ⵜⵜⴰⵡⵙⵙⴰⵏⵏⵉⵏ ⴳ ⵢⵉⵥⵥⵍⵎⴹ ⵏ ⵉⴼⵔⵉⵇⵢⴰ. ⵜⴳⴰ ⵜⴰⵏⵎⵢⵓⵔⵜ ⴰⵛⴽⵓ ⵜⵥⵍⵉ ⴷ ⵓⵎⵏⴰⴷ ⵉⵥⵍⵉⵏ ⴳ ⵓⵣⵎⵣ ⴷ ⵉⴷⵖⴰⵔⵏ ⴷ ⵉⵡⵜⵜⴰⵙⵏ ⵏⵏⵙ, ⵜⵣⴷⵉ ⴷ ⵢⵉⴹ, ⴷ ⵎⵉⴷⴷⵏ ⵍⵙⴰⵏⵉⵏ ⵓⴷⵎⴰⵡⵏ ⴷ ⵜⵙⵓⵏⵉ ⵡⴰⵜⵙⵏⵉⵏ ⴰⴷ ⵜⵉⵍⵉ ⵜⵓⵎⵔⵜ ⴷⴰⵔ ⵓⴳⴷⵓⴷ ⵍⵍⵉ ⵜⵏ ⵉⴹⴼⵕⵏ.
ⵎⴰⵏ ⵉⵎⴰⵍ ⴷⴰⵔ ⵉⵎⵄⵛⴰⵕ ?
ⵙⵏⴼⵍ
ⴳ ⵓⵣⵎⵣ ⴰⴷ, ⴳ ⵜⵓⴳⵜ ⵏ ⵜⵎⵉⵣⴰⵔ ⵏ ⵜⵙⴳⴰ ⵏ ⵢⵉⴼⴼⵓⵙ ⵏ ⵍⵎⵖⵔⵉⴱ, ⵍⵍⴰⵏ ⴽⵉⴳⴰⵏ ⵏ ⵉⵙⵏⴼⵍⵏ ⴼ ⵓⵎⵓⵙⵙⵓ ⵏ ⵉⵎⵄⵛⴰⵕ, ⵖⵉⵍⴰⴷ ⵉⵎⵎⵓⵜⵜⵉ ⵉⴳⴰ ⴰⴽⴰⵕⵏⴼⴰⵍ ⴰⵅⴰⵜⴰⵔ ⴰⵎ ⴰⴽⴰⵕⵏⴼⴰⵍ ⵏ ⵉⵎⵄⵛⴰⵕ ⵍⵍⵉ ⵉⵜⵜⵉⵍⵉⵏ ⴳ ⵜⵖⵔⵎⵜ ⵏ ⵜⵣⵏⵉⵜ ⴽⵓ ⴰⵙⴳⴳⵯⴰⵙ, ⵓⵍⴰ ⵡⴰⵍⵍⵉ ⵙⴽⴰⵔⵏ ⵉⵄⵔⵔⵉⵎⵏ ⵏ ⵉⴼⵔⴰⵏ ⴽⵔⴰⵢⴳⴰⵜ ⴰⵙⴳⴳⵯⴰⵙ[12]. ⵜⵓⴳⵜ ⵏ ⵉⵎⵔⵣⵓⵜⵏ ⵙⵜⴰⵡⵀⵎⵎⴰⵏⵉⵏ ⵙ ⵓⵔⵣⵣⵓ ⴳ ⵜⵓⵎⴰⵏⵜ ⴰⴷ ⵉⴳⴰⵏ ⵜⴰⴷⵍⵙⴰⵏⵜ ⴷ ⵜⵏⴰⵎⵓⵏⵜ ⴷ ⵜⵉⵏ ⵜⵥⵓⵕⵉ, ⴰⵔ ⴰⴽⴽⴰⵏ ⵉⵙⵇⵙⵉⵜⵏ ⴼ ⵜⵖⴰⵔⴰⵙⵉⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵎⵖⵔ ⴷ ⵓⵙⵓⵜⴳ ⵏⵏⵙ ⵎⴽⴰⵏⵏ ⵓⵍⴰ ⵅⴼ ⵜⵎⴰⵎⴽⵜ ⵏ ⵜⵡⵉⵙⵉ ⵏⵏⵙⵏⵜ ⴳ ⵜⴳⵎⵉ ⵏ ⵜⵎⵉⵣⴰⵔ ⵍⵍⵉ ⵖ ⵙⵓⵍ ⵜⵍⵍⴰ. ⵙⴳ ⵜⵎⵙⴰⵔⵉⵏ ⵍⵍⵉ ⴼ ⵉⵍⵍⴰ ⵓⵔⵣⵣⵓ, ⵉⴱⴷⵔ ⵓⵙⵍⵎⴰⴷ ⵍⵃⵓⵙⴰⵢⵏ ⴰⵢⵜ ⴱⴰⵃⵙⵉⵏ ⴳ ⵢⴰⵜ ⵜⵉⵏⴰⵡⵜ ⵏⵏⵙ ⵜⴰⵎⵉⵡⴰⵏⵜ ⵍⵍⵉ ⵉⵙⴽⵔ ⴳ ⵜⵖⵔⵎⵜ ⵏ ⵜⵖⵊⵊⵉⵊⵜ ⵜⵓⴳⵜ ⵏ ⵉⵙⵖⵍⴰⴼ ⵍⵍⵉ ⵔⴰⴷ ⵢⴰⵡⵙ ⴳ ⵓⴱⵓⵖⵍⵓ ⴷ ⵓⵙⵎⵖⵔ ⴷ ⵓⵙⵓⵜⴳ ⵏ ⵉⴽⴰⵕⵏⴰⴼⴰⵍⵏ ⵏ ⵡⵓⴷⵎⴰⵡⵏ ⴰⴽⴽⵯ ⴷⴰⵔ ⵉⵎⴰⵣⵉⵖⵏ, ⴷ ⵓⴽⴰⵕⵏⴰⴼⴰⵍ ⵏ ⵉⵎⵄⵛⴰⵕ ⵙ ⵢⴰⵜ ⵜⵖⴰⵔⴰⵙⵜ ⵉⵥⵍⵉⵏ[13].
ⵃⵎⴰ ⴰⴷ ⵉⵥⵉⵍ ⵢⵉⵎⴰⵍ ⵏ ⵜⵓⵎⴰⵏⵜ ⴰⴷ, ⵉⴱⵓⵖⵍⵓ ⴱⴰⵀⵔⴰ, ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵙⵉⵙⵙⵏ ⵏⵏⵙ ⴳ ⵓⵙⴰⵜⵉ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ, ⵉⵇⵇⴰⵏ ⴷ ⴰⴷ ⵜⴻⵜⵜⵓⵣⵎⵎⵉⵎ ⴳ ⵜⵍⴳⴰⵎⵜ ⵏ ⵡⴰⵢⴷⴰ ⴰⴷⵍⵙⴰⵏ ⴰⵔⴽⵎⴰⵎ, ⵉⵇⵇⴰⵏ ⴷ ⵓⵍⴰ ⵓⵙⵙⵔⵇⴱ ⵏ ⵓⵔⵣⵣⵓ ⴼⵍⵍⴰⵙ, ⵙ ⵜⵖⴰⵔⴰⵙⵜ ⵏ ⵜⵣⵔⴰⵡⵉⵏ ⵍⵍⵉ ⵔⴰⴷ ⵙⵓⵍ ⴼⵍⵍⴰⵙ ⵉⵔⵣⵓ ⴳ ⵡⵓⴷⵎⴰⵡⵏ ⴰⴽⴽⵯ ⵍⵍⵉ ⵙⵉⵙ ⵥⵍⵉⵏⵉⵏ.
ⵉⵇⵇⴰⵏ ⴷ ⵓⵍⴰ ⵓⵙⵉⴷⴼ ⵏ ⵓⵎⵓⵙⵙⵓ ⵏ ⵉⵎⵄⵛⴰⵕ ⴳ ⵜⴳⵎⵉ ⵏⵉⵖ ⵜⴰⵏⴼⴰⵍⵉⵜ ⴳ ⵜⵎⵉⵣⴰⵔ ⴳ ⵙⵓⵍ ⵉⵍⵍⴰ, ⵙ ⵓⵙⵉⴷⴼ ⵏ ⵜⴰⵢⵙⵉ ⴰⴷ ⵜⴰⵏⴰⵎⵓⵔⵜ ⵜⴰⵣⴰⵢⴽⵓⵜ ⴳ ⵏⵜⵜⴰⴼⴰ ⴰⵙⵏⴼⵍⵓⵍ ⴷ ⵜⵓⵙⵙⵏⴰ ⴷ ⵜⴷⵍⵙⴰ ⴷ ⵜⵥⵓⵕⵉ, ⴳ ⵉⵙⵏⴼⴰⵔⵏ ⵓⵏⴳⵉⵎⵏ ⴳ ⵉⵙⵡⵉⵔⵏ ⴰⵏⵎⵏⴰⴹ ⴷ ⵓⵎⴰⴹⵍⴰⵏ. ⵙ ⵓⵎⴷⵢⴰ, ⵏⵥⴹⴰⵕ ⴰⴷ ⵏⵙⵙⵉⴳⵓⵜ ⵉⴽⵕⵏⴰⴼⴰⵍⵏ ⵏ ⵉⵎⵄⵛⴰⵕ ⴳ ⵎⴰⴷ ⵉⵥⵍⵉⵏ ⵙ ⵓⵙⵙⵔⵇⴱ ⵏ ⵜⵎⴰⵍⵍⴰⵢⵜ ⴳ ⵓⴷⵎⴰⵡⵏ ⵏⵏⵙ ⴰⴼⴰⵔⴰⵏ ⴷ ⵓⴷⵍⵙⴰⵏ.
ⵢⴰⵜ ⵜⵖⴰⵡⵙⴰ ⵢⴰⴹⵏⵉⵏ, ⵉⴼⴰⵡ ⵉⵙ ⴱⴰⵀⵔⴰ ⵜⵙⵜⴰⵡⵀⵎⵎⴰ ⴰⵡⴷ ⵏⵜⵜⴰⵜ, ⵉⵇⵇⴰⵏ ⴷ ⴰⴷ ⵏⵎⵎⴰⵖ ⵅⴼ ⵓⵏⵜⴰⵎ ⵏ ⵎⴰⵕⵕⴰ ⵎⴰ ⴰⴷ ⵉⵥⵍⵉⵏ ⵙ ⵓⵎⵓⵙⵙⵓ ⴰⴷ ⴳ ⵓⵎⵣⵔⵓⵢ ⵏⵏⵙ ⴷ ⵉⴼⵔⴷⴰⵙ ⵏⵏⵙ ⴷ ⵜⵉⵔⵔⴰ ⵏ ⵓⵙⵏⴼⵍⵓⵍ ⵍⵍⵉ ⴷⵉⴷⵙ ⵉⵜⵜⵎⵓⵏⵏ.
ⵉⵙⴰⵖⵓⵍⵏ
ⵙⵏⴼⵍ- ↑ ADOHANE, Taoufik (2009) "La mascarade d’Iswabn : un rite initiatique judéo-berbère aux confins du burlesque", https://www.academia.edu/20352120/La_mascarade_d_Iswabn_Un_rite_initiatique_jud%C3%A9o_berb%C3%A8re_aux_confins_du_burlesque
- ↑ .بنيدير، جامع (2007)، مهرجان ءيمعشار بتيزنيت، منشورات المعهد الملكي للثقافة الأمازيغية، مطبعة المعارف الجديدة، الرباط
- ↑ أيت باحسين، الحسين (2018)، "كرنفالات ومهرجانات القناع عند الأمازيغ، (بيلماون-بوجلود نموذجا) https://www.ahewar.org/debat/show.art.asp?aid=616459
- ↑ .ابزيكا، محمد (1982)، "الوجه والقناع في ثقافتنا الشعبية"، ضمن أعمال الدورة الأولى لجمعية الجامعة الصيفية بأكادير، مطبعة فضالة، المحمدية
- ↑ GATTEFOSSE, J (1934), "Observations faites à l'occasion de la fête de l'Achoura à Tiznit le 17 avril 1934", Journal de la Société des Africanistes, Tome 4, Fascicule 2. pp. 319-320. https://www.persee.fr/doc/jafr_0037-9166_1934_num_4_2_1583_t1_0319_0000_1
- ↑ مستاوي، محمد (1995)، "إمعشار : رمزية الاحتفال والنقد الاجتماعي"، مجلة تاوسنا، العدد 2، ص.33-35
- ↑ LAKHSASSI, ABDERRAHMANE (1989), "Réflexions sur la mascarade de Achoura, description de la mascarade de Achoura à Tiznit", Signes du présent n° 6, PP.31.39. https://web.archive.org/web/20230608144349/http://www.mondeberbere.com/mascarade-achoura.html
- ↑ وزيد، إبراهيم (2006)، "كرنفال إمعشار في تيزنيت"، جريدة تاويزا، العدد: 109 http://tawiza.byethost10.com/Tawiza109/carnaval.htm?i=1
- ↑ بنيدير جامع، نفسه
- ↑ بنيدير، جامع نفسه
- ↑ أمنون، مولاي محمد (2002)، كشف خبايا وأسرار الجنوب في ظل التسلط الإقطاعي المتستر، إفران الأطلس الصغير، نموذجا، المطبعة الجديدة، الدار البيضاء
- ↑ نموذج لاحتفالات شباب منطقة إفران الأطلس الصغير بإمعشار https://www.youtube.com/watch?v=KK-fTJTp2IM
- ↑ عرض الأستاذ الباحث الحسين ايا باحسين: مهرجانات القناع لدى الأمازيغ، تغجيجت 2013 https://www.youtube.com/watch?v=i_aiMrjzxL4