ⵜⴰⵥⵕⵡⴰⵍⵜ
ⵜⴰⵥⵕⵡⴰⵍⵜ (ⵙ ⵜⴰⵄⵔⴰⴱⵜ: تزروالت, ⵙ ⵜⴰⴼⵔⴰⵏⵙⵉⵙⵜ: Tazeroualt) ⵜⴳⴰ ⵢⴰⵏ ⵓⴷⵖⴰⵔ ⴰⵎⵣⵔⴰⵢ ⵉⵍⵍⴰⵏ ⵖ ⵙⵓⵙ ⵖ ⵉⴼⴼⵓⵙ ⵏ ⵍⵎⵖⵔⵉⴱ, ⵍⵍⵉ ⵜⵏ ⵉⴽⴽⴰⵏ ⵖ ⵎⴰⴷ ⵉⵣⵔⵉⵏ ⵜⴰⵎⴰⵣⵉⵔⵜ ⵜⴰⵙⵉⵎⴰⵏⵜ ⵖ ⵜⴰⵙⵓⵜ ⵜⵉⵙ ⵙⴰ ⴷ ⵎⵔⴰⵡ. ⵜⴻⵜⵜⵓⵢⵏⴱⴰⴹ ⵣⵖ ⵜⵎⴰⵥⵓⵏⵜ ⵏⵏⵙ ⵉⵍⵉⵖ ⵖ ⵉⴷⵔⴰⵔⵏ ⵏ ⵡⴰⵟⵍⴰⵙ ⵎⵥⵥⵉⵢⵏ.[1] ⵖ ⵜⵉⵣⵉ ⵍⵍⵉⵖ ⴰⴽⴽ ⵜⵎⵇⵇⵓⵔ ⵜⴳⵍⴷⵉⵜ ⵏ ⵜⴰⵥⵕⵡⴰⵍⵜ, ⵜⵖⵯⵉ ⵣⵖ ⴰⴳⴰⵔⵓ ⴰⵟⵍⴰⵏⵜⵉ ⴰⵔ ⵜⵙⴳⴰ ⵏ ⵜⵓⵡⴰⵜ ⵍⵍⵉ ⵉⵍⵍⴰⵏ ⵖⵉⵍ ⴰⴷ ⵖ ⵉⴳⴳⵉ ⵡⴰⴽⴰⵍ ⴰⴷⵣⴰⵢⵔⵉ, ⵜⵏⴱⴹ ⵢⴰⵜ ⵜⵙⴳⴰ ⴱⴰⵀⵔⴰ ⵉⵎⵇⵇⵓⵔⵏ ⵖ ⵜⵏⵣⵔⵓⴼⵜ.
| ⵜⴰⵥⵕⵡⴰⵍⵜ | |
|---|---|
| Tazeroualt (ⴼⵕ) | |
 | |
 | |
| ⵜⴰⵎⵙⵙⵓⴳⵓⵔⵜ | |
| ⵜⴰⵎⴰⵣⵉⵔⵜ |
 ⵍⵎⵖⵔⵉⴱ |
| ⵜⴰⵎⵏⴱⴰⴹⵜ | ⵙⵓⵙ ⵎⴰⵙⵙⵜ |
| ⵜⴰⵊⵓⵎⵎⴰ | ⵜⴰⵎⴰⵣⵉⵖⵜ |
| ⵜⴰⵔⴰⵖⵔⴼⵜ | |
| ⵉⵎⵣⴷⴰⵖ | 4 196 ⵏ ⵉⵎⵣⴷⵉⵖ (2004) |
| ⵜⴰⵡⵊⵉⵡⵉⵏ | 809 ⵏ ⵜⵡⵊⵉⵡⵉⵏ |
| ⵜⴰⵔⴰⴽⴰⵍⵜ | |
 | |
| 29.5, -9.5 | |
ⴰⵎⵏⴰⴹ ⴰⵎⵣⵔⴰⵢ
ⵙⵏⴼⵍ
ⵉⴳⴰ ⵃⵎⴰⴷ ⵓ ⵎⵓⵙⴰ ⴰⵔⴳⴰⵣ ⵍⵍⵉ ⴷ ⴰⴽⴽ ⵉⵣⵡⴰⵔⵏ ⵉⵙ ⵉⴱⴷⴰ ⵙⵙⵓⵍⴰⵍⴰ ⵏ ⵜⵥⵕⵡⴰⵍⵜ, ⵉⴽⴽⴰ ⵜⵜ ⵉⵏⵏ ⵉⴳⴰ ⵢⴰⵏ ⵓⴳⵯⵔⵔⴰⵎ ⵓ ⵜⵎⴰⵣⵉⵔⵜ ⵏ ⵙⵓⵙ ⵍⵍⵉ ⵉⵍⵓⵍⵏ ⵖ ⵜⵓⵥⵥⵓⵎⵜ ⵏ ⵜⴰⵙⵓⵜ ⵜⵉⵙ ⵙⵎⵎⵓⵙⵜ ⴷ ⵎⵔⴰⵡⵜ, ⵉⵙⵜⴰⵇⵔⵔⴰ ⴹⴼⴼⵉⵔ ⵎⴰⵢⴰ ⵖ ⵜⵙⴳⴰ ⵏ ⵜⴰⵥⵔⵡⴰⵍⵜ, ⵖⵉⵏⵏ ⴰ ⵖ ⴷ ⵉⵙⵏⵓⵍⴼⴰ ⵣⵣⴰⵡⵉⵜ ⵢⴰⵡⵉ ⴷ ⵜⵉⵎⴰⴹ ⵏ ⵉⵎⴹⴼⴰⵔⵏ, ⵏⵏⴰ ⴷ ⴷⴰⵔⵙ ⵉⵜⵜⴰⵛⴽⴰⵏ ⴼⴰⴷ ⴰⴷ ⵍⵎⴷⵏ ⵜⵉⵖⴰⵡⵙⵉⵡⵉⵏ ⵉⵣⴷⵉⵏ ⴷ ⵓⵙⴳⴷ ⵏⵏⵙⵏ.[2] ⵉⵟⵟⴼ ⵖ ⴰⴽⵓⴷ ⴰⵏⵏ ⵃⵎⴰⴷ ⵓ ⵎⵓⵙⴰ ⵜⴰⵣⴷⴰⵢⵜ ⵉⴼⵓⵍⴽⵉⵏ ⴷ ⵉⵚⵓⵍⵟⴰⵏⵉⵏⵏ ⵉⵙⴰⵄⴷⵉⵢⵏ ⵍⵍⵉ ⵜⵜ ⵉⵏⵏ ⵉⴽⴽⴰⵏ ⵖ ⵜⵏⴱⴰⴹⵜ. ⴰⴷⵖⴰⵔ ⵏⵏⵙ ⴷ ⴰⵜⵉⴳ ⵏⵏⵙ ⵖ ⵓⵙⴳⴷ ⵜⵓⵊⵊⴰ-ⵜⵜ ⴰⴷ ⵢⴰⵔⵉ ⴼ ⵍⵎⴰⴽⴰⵏⵜ ⵏⵏⵙ. ⵍⵍⵉⵖ ⵉⵎⵎⵓⵜ, ⴰⴷⵖⴰⵔ ⵍⵍⵉ ⵖ ⵉⵜⵜⵓⵢⵎⴹⴰⵍ ⵓⵔⴳⴰⵣ ⴰⴷ ⵉⴳⴰ ⵣⵓⵏ ⴷ ⵍⵃⵊⵊ.
ⴰⵎⵣⵔⵓⵢ
ⵙⵏⴼⵍ
ⵖ ⵓⵙⴳⴳⵯⴰⵙ ⵏ 1603, ⵖ ⵊⵊⵡⴰⵢⵀ ⵏ ⵜⵥⴰⵍⵍⵉⵜ ⵏ ⵜⵓⴽⵣⵉⵏ, ⵔⴰⴷ ⵉⵎⵎⵜ ⵓⵚⵓⵍⵟⴰⵏ ⴰⵙⴰⵄⴷⵉⵢ ⴰⵃⵎⴰⴷ ⴰⵍⵎⴰⵏⵙⵓⵔ, ⵍⵍⵉ ⵜⵜ ⵉⵏⵏ ⵉⴽⴽⴰⵏ ⵉⴳⴰ ⵢⴰⵏ ⵖ ⵉⴳⵍⴷⴰⵏ ⵍⵍⵉ ⴱⴰⵀⵔⴰ ⵉⵙⵜⴰⵡⵀⵎⵎⴰⵏ ⵖ ⵉⵙⴰⵄⴷⵉⵢⵏ, ⴼⴽⴰⵏ ⴰⵙ ⴰⴽⴽⵯ ⵢⵉⵙⵎ ⵏ ⵎⴰⵏⵚⵓⵔ ⴷⴰⵀⴱⵉ ⴰⵛⴽⵓ ⵖ ⵓⵣⵎⵣ ⵏⵏⵙ ⵉⴳⴳⵓⴷⴰ ⵡⵓⵔⵖ. ⴽⴽⴰⵏ ⵜⵜ ⵉⵏⵏ ⵙⵏⴰⵜ ⵜⵇⵚⵉⵚⵉⵏ ⴼ ⵎⴰⴷ ⵉⵊⵔⴰⵏ ⴰⵢⵍⵍⵉⵖ ⵉⵎⵎⵓⵜ, ⵜⴰ ⵉⵣⵡⴰⵔⵏ ⴰⵔ ⵜⵜⵉⵏⵉ ⵎⴰⵙ ⴷ ⵢⵓⴹⵏ ⵙ ⵜⵎⴰⴹⵓⵏⵜ ⵏ ⵜⴰⵙⵔⴽⴰ (ⴷⴰ ⴰⵙ ⵏⵜⵜⵉⵏⵉ ⵓⵍⴰ ⵟⵟⴰⵄⵓⵏ) ⵏⵜⵜⴰⵜ ⴰⴷ ⵉⴳⴰⵏ ⵙⵙⴱⴰⴱ ⵍⵍⵉⵖ ⵉⵎⵎⵓⵜ, ⵜⵉⵙⵙ ⵙⵏⴰⵜ ⴰⵔ ⵜⵜⵉⵏⵉ ⵎⴰⵙ ⵜⵎⵖⴰⵔⵜ ⵏⵏⵙ ⵄⵉⵛⴰ ⴷ ⵢⵉⵡⵉⵙ ⵎⵓⵍⴰⵢ ⵣⵉⴷⴰⵏ ⴰⴷ ⴰⵙ ⵉⴳⴰⵏ ⵙⵙⵎ ⴼⴰⴷ ⴰⴷ ⵜ ⵏⵖⵉⵏ. ⵉⵍⵎⵎⴰ, ⴷⴼⴼⵉⵔ ⵜⵎⵜⵜⴰⵏⵜ ⵏⵏⵙ ⵉⴱⴷⴰ ⵓⵔⴳⴳⴰⵢ ⴳⵔ ⵜⴰⵔⵡⴰ ⵏ ⴰⵃⵎⴰⴷ ⴰⵍⵎⴰⵏⵙⵓⵔ ⴼ ⵜⵏⴱⴰⴹⵜ, ⵉⵜⵜⵢⵓⴱⴹⴰ ⵍⵎⵖⵔⵉⴱ ⵙ:
- ⴰⵡⴰⵏⴰⴽ ⵏ ⴼⴰⵙ, ⵉⵏⴱⴹ ⵜ ⵉⵡⵉⵙ ⵍⵎⴰⵎⵓⵏ,
- ⴰⵡⴰⵏⴰⴽ ⵏ ⵎⵔⵔⴰⴽⵛ, ⵉⵏⴱⴹ ⵜ ⵉⵡⵉⵙ ⵣⵉⴷⴰⵏ.
ⴷ ⵜⵙⴳⵉⵡⵉⵏ ⵢⴰⴹⵏⵉ ⵔⴰⴷ ⴳⵉⵙⵏ ⵏⴱⴹⵏ ⵣⵣⴰⵡⴰⵢⴰ ⴷ ⵉⵎⵖⴰⵔⵏ ⵏ ⵜⵇⴱⵉⵍⵉⵏ. ⴹⴰⵕⵜ ⵖⴰⵢⴰⴷ ⴽⵓⵍⵍⵓ, ⵔⴰⴷ ⴱⴰⵢⵏⵜ ⴽⵉⴳⴰⵏ ⵏ ⵜⴳⵍⴷⵉⵡⵉⵏ, ⵜⵉⵍⵍⵉ ⴰⴽⴽ ⴳⵉⵙⵏⵜ ⵉⵙⵜⴰⵡⵀⵎⴰⵏⵏ ⴳⴰⵏ ⵜⵏⵜ:
- ⴰⵡⴰⵏⴰⴽ ⵏ ⵛⵛⴱⴰⵏⵉⵢⵉⵏ, ⵉⵏⴱⴹ ⵜ ⵍⵃⴰⵊⵊ ⴽⵔⵔⵓⵎ ⵛⵛⴱⴰⵏⵉ,
- ⴰⵡⴰⵏⴰⴽ ⵏ ⵍⵄⵢⵢⴰⵛⵉ, ⵉⵏⴱⴹ ⵜ ⵎⵓⵃⴰⵎⵎⴰⴷ ⵍⵃⴰⵊⵊ ⴷⴷⵢⴰⵜⵉ,
- ⴰⵡⴰⵏⴰⴽ ⵏ ⵜⴰⴼⵉⵍⴰⵍⵜ, ⵉⵏⴱⴹ ⵜ ⵎⵓⵃⴰⵎⵎⴰⴷ ⴱⵏ ⵛⵛⵔⵉⴼ ⵍⵄⴰⵍⴰⵡⵉ.
- ⵖ ⵜⵎⴰⵣⵉⵔⵜ ⵏ ⵙⵓⵙ ⵔⴰⴷ ⵢⵉⵍⵉ ⴰⴱⵓ ⵃⴰⵙⵙⵓⵏ ⵙⵎⵍⴰⵍⵉ, ⴰⴳⵍⴷⵓⵏ ⵡⵉⵙⵙ ⴽⵕⴰⴹ ⵏ ⵡⴰⵡⴰⵏⴰⴽ ⵏ ⵉⵍⵉⵖ, ⵍⵍⵉ ⵔⴰⴷ ⵜⴳ ⵉⵍⵎⵎⴰ ⵜⴰⴳⵍⴷⵉⵜ ⵏ ⵜⴰⵥⵔⵡⴰⵍⵜ
ⵖ ⵜⴰⵙⵓⵜ ⵜⵉⵙⵙ ⵙⴰ ⴷ ⵎⵔⴰⵡ ⵎⵉⵍⴰⴷⵢⴰ, ⵖⵎⴽ ⵍⵍⵉ ⵉⵏⵏⴰ ⵎⵓⵅⵜⴰⵔ ⴰⵙⵓⵙⵉ ⵖ ⵓⴷⵍⵉⵙ ⵏ "ⵉⵍⵉⵖ ⵇⴰⴷⵉⵎⴰⵏ ⵡⴰ ⵃⴰⴷⵉⵜⴰⵏ" , ⵉⵙⵓⵙⵉⵢⵏ ⵕⵎⵉⵏ ⵣⵖ ⵜⵜⵀⵎⵉⵛ ⴷ ⵟⵟⵓⵖⵢⴰⵏ ⵍⵍⵉ ⵜⵜ ⵉⵏⵏ ⴽⴽⴰⵏ ⵉⵙⴰⵄⴷⵉⵢⵏ ⴰⵔ ⵜ ⵙⴽⴰⵔⵏ ⵖ ⵜⵎⴰⵣⵉⵔⵜ. ⵎⵇⵇⴰⵔ ⵜⵜ ⵉⵏⵏ ⵉⴽⴽⴰ ⴷⴰⵔ ⵜⵇⴱⵉⵍⵉⵏ ⵏ ⵙⵓⵙ ⵢⴰⵏ ⴹⴹⴰⵡⵔ ⴱⴰⵀⵔⴰ ⵉⵙⵜⴰⵡⵀⵎⴰⵏ ⵖ ⵡⴰⵇⵇⵍⴰⵢ ⵏ ⵉⵙⴰⵄⴷⵉⵢⵏ ⵙ ⵜⵏⴱⴰⴹⵜ ⴷ ⵓⴱⵏⵏⵓ ⵏ ⵜⴳⵍⴷⵉⵜ ⵏⵏⵙⵏ, ⵏⵏⵉⴳ ⵏ ⵖⴰⵢⴰⴷ, ⵍⵎⵖⵔⵉⴱ ⵖ ⴰⴽⵓⴷ ⴰⵏⵏ ⵢⵓⵜ ⵜ ⵍⵊⴰⴼⴰⴼ ⵓⵔ ⵍⵍⵉⵏ ⵡⴰⵎⴰⵏ ⵉⵙⴳⴳⵯⴰⵙⵏ, ⵜⵓⵛⴽⴰ ⴷ ⵓⵍⴰ ⵜⵎⴰⴹⵓⵏⵜ ⵏ ⵜⴰⵙⵔⴽⴰ ⵏⵖ ⵟⵟⴰⵄⵓⵏ ⵓⵍⴰ ⵏⵜⵜⴰⵜ, ⵓⵔ ⵓⴼⴰⵏ ⵜⵉⵇⴱⵉⵍⵉⵏ ⵎⴰ ⵜⵏⵜ ⵉⵜⵜⴰⵡⵙⵏ ⴱⴰⵛ ⴰⴷ ⴼⴼⵖⵏ ⵣⵖ ⵜⵎⵓⴽⵔⵉⵙⵜ ⴰⴷ ⴰⵛⴽⵓ ⵖ ⵓⵣⵎⵣ ⴰⵏⵏ ⵜⵔⵡⵉ ⵜⴳⵍⴷⵉⵜ ⵏ ⵉⵙⴰⵄⴷⵉⵢⵏ ⵎⵍⵉⵃ ⵓⵔ ⵜⵙⴰⵍⴰ ⵉ ⵣⵓⵏ ⴷ ⵜⵖⴰⵡⵙⵉⵡⵉⵏ ⴰⴷ, ⵓⵔ ⴼⵍⵍⴰⵙⵏ ⵜⵄⴰⵇⵇⵍ. ⵖ ⵉⴼⴼⵓⵙ ⴰⴽⴽⵯ ⵏ ⵍⵎⵖⵔⵉⴱ, ⴽⵓⵍⵛⵉ ⵖⵉⵍ ⴰⴷ ⵙⵙⵏ ⵜⵙⴳⴰ ⵏ ⵉⵍⵉⵖ ⵏⵖ ⵜⴰⵥⵔⵡⴰⵍⵜ ⵙ ⵢⵉⵙⵎ ⵏ ⵣⵣⴰⵡⵉⵜ ⵏ ⵙⵉⴷⵉ ⵃⵎⴰⴷ ⵓ ⵎⵓⵙⴰ, ⴰⵔ ⴳⵉⵙ ⵉⵜⵜⵉⵍⵉ ⵢⴰⵏ ⵓⵏⵎⵓⴳⴳⴰⵔ ⴰⵙⴳⴷⴰⵏ ⵉⵎⵇⵇⵓⵔⵏ ⴽⵔⴰⵢⴳⴰⵜ ⵓⵙⴳⴳⵯⴰⵙ ⵖ ⵜⵉⴳⵉⵔⴰ ⵏ ⵡⴰⵢⵢⵓⵔ ⵡⵉⵙⵙ ⵜⴰⵎ. ⵔⴰⴷ ⵏⵓⵔⵔⵉ ⵉⵎⵉⴽⴽ ⵙ ⵜⵖⵯⵕⴹⵉⵏ ⵙ ⵓⵣⵎⵣ ⵏ ⴰⵃⵎⴰⴷ ⴰⵍⵎⴰⵏⵙⵓⵔ ⵙ ⵢⴰⵏ ⵉⵎⵊⵔⵉ ⵏⵥⴹⴰⵔ ⴰⴷ ⵏⵉⵏⵉ ⵎⴰⵙ ⵜⵜ ⵉⵏⵏ ⵉⴽⴽⴰ ⵉⴳⴰ ⵣⵓⵏ ⴷ ⵢⴰⵜ ⵛⵛⴰⵔⴰⵔⴰ ⵉⵎⵥⵥⵉⵢⵏ ⴷ ⵢⵉⵡⵉⵏ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵢⴰⴹⵏⵉⵏ ⴼⴰⴷ ⴰⴷ ⵜⴱⴰⵢⵏ ⵜⴰⴳⵍⴷⵉⵜ ⵏ ⵜⴰⵥⵔⵡⴰⵍⵜ.
ⵖⵎⴽ ⵍⵍⵉ ⵙ ⵢⴰⴷ ⵉⵜⵜⵓⵙⵙⴰⵏ, ⵉⴽⴽⴰ ⵜⵜ ⵉⵏⵏ ⴷⴰⵔ ⵙⵉⴷⵉ ⵃⵎⴰⴷ ⵓ ⵎⵓⵙⴰ ⵙⵎⵎⵓⵙ ⵏ ⵉⴼⵔⵅⴰⵏ, ⴳⵔ ⵙⵎⵎⵓⵙ ⴰⴷ ⵏ ⵉⴼⵔⵅⴰⵏ ⵉⴽⴽⴰ ⵜⵜ ⵉⵏⵏ ⵢⴰⵏ ⵉⵙⵎ ⴰⵙ ⵄⵍⵉ, ⵡⴰⴷ ⵉⴳⴳⵯⵔⴰⵏ ⵙⵔⵙⵏ ⵜ ⵖ ⵍⵃⴱⵙ ⵙ ⵍⴰⵎⵔ ⵏ ⵓⵚⵓⵍⵟⴰⵏ ⴰⵃⵎⴰⴷ ⴰⵍⵎⴰⵏⵙⵓⵔ ⴰⴷⴰⵀⴱⵉ ⵖ ⵜⵔⵓⴷⴰⵏⵜ, ⵓⵔ ⴷ ⴰⵛⴽⵓ ⵉⵙⴽⵔ ⴽⵔⴰ, ⵉⵙ ⴽⴰ ⵉⵙⴰⵡⵍ ⴼ ⵜⵎⵎⴰⵔⴰ ⴷ ⴹⴹⵓⵔⵓⴼ ⵉⵛⵇⵇⴰⵏ ⵏⵏⴰ ⵙ ⵜⵜ ⵉⵏⵏ ⴽⴽⴰⵏ ⵜⵇⴱⵉⵍⵉⵏ ⵏ ⵙⵓⵙ ⴰⵔ ⵜⵏⵜ ⵜⵜⴷⴷⵔⵏ ⵙ ⵙⵙⴱⴰⴱ ⵏ ⵍⵊⴰⴼⴰⴼ ⴷ ⵜⵎⵓⴹⴰⵏ ⴷ ⵍⴰⵥ, ⵎⴰⵛ ⵓⵔ ⵜⵜ ⵉⵔⵃⵎ ⴰⵍⵎⴰⵏⵙⵓⵔ ⴰⴷⴰⵀⴱⵉ ⴷ ⵉⵜⵜⵢⴰⵎⴰⵥ ⵖ ⵜⵔⵓⴷⴰⵏⵜ ⴰⵢⵍⵍⵉⵖ ⵉⵎⵎⵜ. ⵉⴽⴽⴰ ⵜⵜ ⵉⵏⵏ ⵄⵍⵉ ⴱⵏ ⵃⵎⴷ ⵓ ⵎⵓⵙⴰ ⵉⵜⵜⵓⵙⵙⴰⵏ ⴷⴰⵔ ⵎⵉⴷⴷⵏ ⵙ ⵜⵜⴰⴷⴰⵢⵢⵓⵏ ⵏⵏⵙ, ⵉⴽⴽⴰ ⵜⵜ ⵉⵏⵏ ⵉⴳⴰ ⴰⵔⴳⴰⵣ ⵉⵄⴷⵍⵏ, ⴷⴷⵏⴱ ⵏⵏⵙ ⵉⴳⴰ ⵜⵜ ⵎⴰⵙ ⵢⵓⵙⵉ ⵙⵙⵉⵄⵔ ⵏ ⵜⵎⴰⵣⵉⵔⵜ ⵏⵏⵙ ⵉⵙⴰⵡⵍ ⴼ ⵜⵎⵓⴽⵔⵉⵙⵉⵏ ⵏⵏⵙ, ⵉⵙⴰⵡⵍ ⵓⵍⴰ ⴼ ⵎⵉⴷⴷⵏ ⵏⵏⵙ ⵍⵍⵉ ⵉⵜⵜⵎⵜⵜⴰⵜⵏ ⵙ ⵍⴰⵥ ⴷ ⵜⵎⴰⴹⵓⵏⵜ. ⵉⵎⵊⵔⵉ ⴰⴷ ⵔⴰⴷ ⵉⴱⴰⴷⵍ ⴰⴳⵓⴷⵉ ⵏ ⵜⵖⴰⵡⵙⵉⵡⵉⵏ ⵖ ⵜⴰⵏⵏⴰⵢⵜ ⵏ ⵉⵙⵓⵙⵉⵢⵏ ⵙ ⵎⴰⴷ ⵉⵣⴷⵉⵏ ⴷ ⵜⴳⵍⴷⵉⵜ ⵏ ⵉⵙⴰⵄⴷⵉⵢⵏ, ⵜⵍⵍⴰ ⵢⴰⵜ ⵜⵎⵊⵔⵉⵜ ⵉⵜⵜⵓⵙⵙⴰⵏ ⵢⴰⴹⵏ ⴰⵔ ⵜⵜⵉⵏⵉⵏ ⵎⴰⵙ ⵜⴷⴷⴰ ⵢⴰⵜ ⵜⵎⵖⴰⵔⵜ ⴰⴷ ⵜⵛⴽⵉ ⵙ ⵢⴰⵏ ⵍⵇⴰⵢⴷ ⴷⴰⵔ ⴰⵍⵎⴰⵏⵙⵓⵔ ⴰⴷⴰⵀⴱⵉ, ⵍⵍⵉⵖ ⴷⴰⵔⵙ ⵜⴽⵛⵎ ⵜⵥⵔⴰ ⵎⴰⴷ ⵜⵜ ⵉⵏⵏ ⵉⴽⴽⴰ ⴰⵔ ⵜⵜ ⵉⵙⴽⴰⵔ ⴰⵛⴽⵓ ⵉⴽⴽⴰ ⵜⵜ ⵉⵏⵏ ⵉⵛⵇⵇⴰ ⴱⴰⵀⵔⴰ, ⴰⵔ ⵉⵜⵜⵏⴱⴰⴹ ⵙ ⵢⴰⵜ ⵜⵖⴰⵔⴰⵙⵜ ⵉⵛⵇⵇⴰⵏ, ⵙⵍⵉⵖ ⵜⵏⵏⴰ " ⴽⴽⵉⵖ ⵜⵜ ⵉⵏⵏ ⴰⵔ ⵜⵄⵊⵊⴰⴱⵖ ⵉ ⵡⴰⵎⴰⵏ ⵎⴰⵏⴽⴰ ⵙ ⵜⵏ ⵉⴽⴽⴰ ⵔⴰⵏⵇⴰⵏ ⴼⵉ ⴰⵍⵊⴰⴷⴰⵡⵉⵍⵉ ... ⴰⵢⵍⵍⵉⵖ ⵥⵔⵉⵖ ⵓⵖⴱⴰⵍⵓ ⵏⵏⵙ, ⵙⵙⵏⵖ ⵉⵣⴷ ⴰⵎⴰⵏ ⴰⴷ ⵜⵏ ⵉⴽⴽⴰⵏ ⵉⵔⴽⵯⵉ ⵣⵖ ⵡⴰⵥⵓⵔ ⵏⵏⵙ " , ⵣⵄⵎⴰ ⵚⵚⵓⵍⵟⴰ ⴰⵏⵏ ⵉⵛⵇⵇⴰⵏ ⵍⵍⵉ ⵜⵜ ⵉⵏⵏ ⴽⴽⴰⵏ ⵍⵇⵇⵉⵢⴰⴷ ⵏ ⴰⵍⵎⴰⵏⵙⵓⵔ ⴰⴷⴰⵀⴱⵉ ⴰⵔ ⵙⵉⵙ ⵙⵡⵓⵔⵔⵉⵏ ⴷ ⵎⵉⴷⴷⵏ ⵜⴽⴽⴰ ⴷ ⵣⵖ ⴷⴰⵔⵙ ⴰⵛⴽⵓ ⵏⵜⵜⴰⵏ ⴰⴷ ⴰⵙⵏ ⵜ ⵉⵎⵍⴰⵏ. ⵉⵙⵓⵙⵉⵢⵏ ⵔⴰⴷ ⴳⵉⵙⵏ ⵉⵖⴰⵎⴰ ⵍⵃⴰⵍ ⴰⵛⴽⵓ ⵖ ⵜⵣⵡⵉⵔⵉ ⵏⵜⵜⵏⵉ ⴰⴷ ⵉⴱⴷⴷⵏ ⴷ ⵉⵙⴰⵄⴷⵉⵢⵏ ⵍⵍⵉⵖ ⴱⵃⵔⴰ ⴱⴷⴰⵏ ⴰⵢⵍⵍⵉⵖ ⵍⴽⵎⵏ ⵙ ⵜⵏⴱⴰⴹⵜ, ⴰⵡⵙⵏ ⴰⵙⵏ ⴱⴰⵛ ⴰⴷ ⵥⵥⵓⵏ ⴼ ⵉⴱⵔⵜⵇⵇⵉⵣⵏ ⵍⵍⵉ ⴷ ⵉⵜⵜⵀⵊⴰⵎⵏ ⵣⵖ ⵜⵙⴳⴰ ⵏ ⵢⵉⵍⵍ, ⵎⵉⵛⵛ ⴱⵄⴷ ⵎⴰⵢⴰⴷ ⴽⵓⵍⵍⵓ ⵜ ⵏⴽⵔⵏ ⵜⵏ, ⵎⵇⵇⴰⵔ ⵜⴰⵥ ⴱⴰⵀⵔⴰ ⵜⵎⴰⵥⵓⵏⵜ ⵏⵏⵙⵏ ⵎⵔⵔⴰⴽⵛ ⵉ ⵙⵓⵙ. ⵔⴰⴷ ⵉⵎⵎⵜ ⴰⵍⵎⴰⵏⵙⵓⵔ ⴰⴷⴰⵀⴱⵉ ⵉⵍⵎⵎⴰ ⵔⴰⴷ ⵜⵛⵜⵜⴻⵜ ⵜⴳⵍⴷⵉⵜ ⵏ ⵉⵙⴰⵄⴷⵉⵢⵏ, ⵖⵉⴷ ⵔⴰⴷ ⵉⵏⴽⵔ ⴱⵔⴰⵀⵉⵎ ⵢⴰⵏ ⵖ ⵜⴰⵔⵡⴰ ⵎⵥⵥⵉⵢⵏ ⵏ ⵙⵉⴷⵉ ⵃⵎⴰⴷ ⵓ ⵎⵓⵙⴰ ⴰⴷ ⵉⵙⴽⵔ ⵜⴰⴳⵔⴰⵡⵍⴰ ⵖ ⵜⵎⴰⵣⵉⵔⵜ ⵏ ⵙⵓⵙ, ⵔⴰⴷ ⵜ ⴱⴰⵢⵄⵏ ⵜⵉⵇⴱⵉⵍⵉⵏ ⵜⵉⵙⵓⵙⵉⵢⵉⵏ, ⵏⵏⴰⵏ ⵎⴰⵙ ⴷⴰ ⵜⵜⵉⴳⵓⵜⵏ ⵉⵎⴹⴼⴰⵔⵏ ⵏⵏⵙ ⵙ ⵜⵎⵍⵉⴼⴰⵜ ⴰⵙⵙ ⴼ ⵡⴰⵙⵙ. ⵔⴰⴷ ⵍⴽⵎⵏ ⵉⵏⵖⵎⵉⵙⵏ ⴰⴷ ⵎⵓⵍⴰⵢ ⵣⵉⴷⴰⵏ ⵍⵍⵉ ⵔⴰⴷ ⵢⴰⵣⵏ 3000 ⴰⵊⵓⵏⴷⵉ ⴱⴰⵛ ⴰⴷ ⵎⵎⴰⵖⵏ ⴷ ⵜⴳⵔⴰⵡⵍⴰ ⵏ ⴱⵔⴰⵀⵉⵎ ⴱⵏ ⵎⵓⵃⴰⵎⵎⴰⴷ ⵖ ⵙⵓⵙ, ⵎⴰⵛⵛ ⵉⵊⵓⵏⴷⵉⵢⵏ ⴰⴷ ⵔⵡⵍⵏ ⴰⵛⴽⵓ ⵓⵔ ⴰⵙⵏ ⴼⴽⴰⵏ ⵜⵉⵖⵔⴰⴹ, ⵓⵔ ⴰⵙⵏ ⵜⵍⴽⵎ ⵜⵉⵔⵎⵜ ⵎⴰⴷ ⵛⵜⵜⴰⵏ. ⵉⵙⵙⵏ ⵖ ⴰⴽⵓⴷ ⴰⵏⵏ ⵎⵓⵍⴰⵢ ⵣⵉⴷⴰⵏ ⵎⴰⵙ ⵚⴰⴼⵉ ⵜⴼⵜⴰ ⴰⵙ ⵓⵍⴰ ⵏⵜⵜⴰⵜ, ⵣⵓⵏ ⴷ ⵓⴽⴰⵏ ⵜⵙⴳⵉⵡⵉⵏ ⵢⴰⴹⵏⵉⵏ ⴷ ⵔⴰⴷ ⵢⵉⵔⵉ ⴰⴷ ⵢⴰⵙⵉ ⵓⵔⵖ ⴷ ⵍⵎⵓⵊⴰⵡⵀⴰⵔⴰⵜ ⵏⵏⵙ ⵍⵍⵉ ⵜⵏ ⵉⴽⴽⴰⵏ ⵉⵚⵓⵍⵟⴰⵏⵉⵢⵏ ⴰⵔ ⵜⵏ ⵜⵃⴹⵓⵏ ⵖ ⵣⵣⴰⵡⴰⵢⴰ, ⴰⵛⴽⵓ ⵜⴽⴽⴰ ⵜⵜ ⵉⵏⵏ ⴰⴽⵜⴰⵔ ⴰⵎⴰⵏⴰⵏ, ⵎⴰⵛⵛ ⵔⴰⵜⵜ ⵉⵚⴱⵇ ⴱⵔⴰⵀⵉⵎ ⴱⵏ ⵎⵓⵃⴰⵎⵎⴰⴷ ⴷ ⵔⴰⴷ ⵢⴰⵙⵉ ⵜⵜⴰⵔⴰⵡⴰⵜ ⴰⴷ ⵍⵍⵉⵖ ⵔⴰⴷ ⵉⵀⵊⵎ ⴼ ⵣⵣⴰⵡⴰⵢⴰ ⵢ'ⴰⴷ ⵙⵍⴰⵡⴰⵏ ⴰⴽⴽ ⵖ ⵎⵔⵔⴰⴽⵛ, ⵔⴰⴷ ⵉⵎⵎⵜ ⴰⵎⵖⴰⵔ ⵏ ⵜⴳⵔⴰⵡⵍⴰ ⵜⴰⵙⵓⵙⵉⵢⵜ ⴱⵔⴰⵀⵉⵎ ⴱⵏ ⵎⵓⵃⴰⵎⵎⴰⴷ ⵢⴰⵏ ⵖ ⵜⴰⵔⵡⴰ ⵏ ⵙⵉⴷⵉ ⵃⵎⴰⴷ ⵓ ⵎⵓⵙⴰ ⴷ ⵔⴰⴷ ⵉⴼⵍ ⵜⵏⴱⴰⴹⵜ ⵉ ⵍⵃⵙⵏ ⴱⵏ ⵄⵍⵉ, ⵉⵡⵉⵙ ⵏ ⵅⴰⵍⵉⵙ ⵏⵉⵜ, ⵎⵏ ⴱⵄⴷ ⵎⵏⵏⵓ ⵔⴰⴷ ⵢⴰⵛⴽ ⴰⴳⵍⴷⵓⵏ ⵍⵍⵉ ⴰⴽⴽ ⵉⵜⵜⵓⵙⵙⴰⵏ ⵏ ⵜⴳⵍⴷⵉⵜ ⵏ ⵜⴰⵥⵔⵡⴰⵍⵜ ⵍⵍⵉ ⵜ ⵉⴳⴰⵏ ⵄⵍⵉ ⴱⵏ ⵎⵓⵃⴰⵎⵎⴰⴷ ⴱⵓⴷⵎⵉⵄⴰ, ⵉⵜⵜⵓⴼⴽⴰ ⵢ'ⴰⵙ ⵢⵉⵙⵎ ⴰⴷ ⴰⵛⴽⵓ ⵜⴽⴽⴰ ⵜⵜ ⵉⵏⵏ ⴷⴰⵔⵙ ⵢⴰⵜ ⵜⵉⵟⵟ ⴰⵔ ⵜⵎⵟⵟⵉ ⴱⵣⵣⴰⴼ. ⵄⵍⵉ ⴱⵏ ⵎⵓⵃⴰⵎⵎⴰⴷ ⴱⵓⴷⵎⵉⵄⴰ ⵍⵍⵉ ⵉⴳⴰⵏ ⴰⴱⵓ ⵃⴰⵙⵙⵓⵏ ⴰⵙⵎⵍⴰⵍ ⵅⴽⵍⵍⵉ ⵙ ⵉⵜⵜⵓⵙⵙⴰⵏ ⵖ ⵓⵎⵣⵔⵓⵢ, ⵓⵔ ⵜⵓⵛⴽⵉ ⵍⵎⵓⴱⴰⵢⴰⵄⴰ ⵏⵏⵙ ⵙ ⵢⴰⵜ ⵜⵖⴰⵔⴰⵙⵜ ⵉⵔⵅⴰⵏ ⴰⵛⴽⵓ ⴽⴽⴰⵏ ⵜⵜ ⵉⵏⵏ ⵜⴰⵔⵡⴰ ⵏ ⵙⵉⴷⵉ ⵃⵎⴰⴷ ⵓ ⵎⵓⵙⴰ ⵎⵎⴰⵖⵏ ⴷ ⵉⵏⴳⵔ-ⴰⵜⵙⵏ ⴼ ⵎⴰⵏⵡⴰ ⴳⵉⵙⵏ ⴰ ⵔⴰⴷ ⵢⴰⵎⵥ ⵜⵏⴱⴰⴹⵜ, ⵖ ⵎⴰⵢⴳⴳⵯⵔⴰⵏ ⵎⵙⴰⵙⴰⵏ ⴼⵍⵍⴰⵙ ⴱⴰⵛ ⴰⵜⵜ ⴱⴰⵢⵄⵏ, ⴷ ⵜⵎⴰⵣⵉⵔⵜ ⵍⵍⵉ ⴰⴽⴽ ⵉⵣⵡⴰⵔⵏ ⴰⵜⵜ ⴱⴰⵢⵄⵏ ⴳⴰⵏ ⴰⵢⵜ ⵉⴼⵔⴰⵏ ⵏ ⵡⴰⵟⵍⴰⵙ ⵎⵥⵥⵉⵢⵏ, ⴰⵢⵍⵍⵉⵖ ⴷ ⵎⵓⵏⵏ ⵉⵎⵖⴰⵔⵏ ⴷ ⵛⵛⵓⵢⵓⵅ ⵏ ⵜⵇⴱⵉⵍⵉⵏ ⴷ ⵉⴷ ⴱⵓⵜⵓⵙⵙⵏⴰ ⴷ ⵉⵅⴰⵜⴰⵔⵏ ⴷⴰⵔ ⵜⵉⵎⴹⵍⵜ ⵏ ⵊⴷⴷⵉⵙ ⵙⵉⴷⵉ ⵃⵎⴰⴷ ⵓ ⵎⵓⵙⴰ ⵖ ⴰⵎⵎⴰⵙ ⵏ ⵣⵣⴰⵡⵉⵜ ⵏ ⵜⴰⵥⵔⵡⴰⵍⵜ ⴷ ⵙⴽⵔⵏ ⴰⵙ ⵍⵎⵓⴱⴰⵢⴰⵄⴰ ⵔⴰⵙⵎⵢⴰⵏ. ⵖⵉⴽⴽⴰⴷ ⴰⵙ ⵔⴰⴷ ⵜⴱⴷⵓ ⵢⴰⵜ ⵜⴳⵣⵣⵓⵎⵜ ⵜⴰⵎⴰⵢⵏⵓⵜ ⵖ ⴰⵡⴰⵏⴰⴽ ⵏ ⵉⵍⵉⵖ ⴱⴰⵛ ⴰⴷ ⵜⴳ ⵜⴰⴳⵍⴷⵉⵜ ⵉⵎⵇⵇⵓⵔⵏ.
ⴰⴱⵓ ⵃⴰⵙⵙⵓⵏ ⴰⵙⵎⵍⴰⵍ, ⵅⴽⵍⵍⵉ ⵙⴰ ⵜⵜⵉⵏⵉⵏ ⴰⵢⵜ ⵓⵎⵣⵔⵓⵢ, ⵉⴽⴽⴰ ⵜⵜ ⵉⵏⵏ ⵉⴳⴰ ⵢⴰⵏ ⵓⴼⵔⵓⵅ ⴷ ⴰⵄⵔⵔⵉⵏ ⵉⵚⵃⴰⵏ ⵉⵟⵟⴰⴼ ⵍⵄⴰⴹⴰⵍⴰⵜ ⴷ ⴷⴰⵔⵙ ⵍⵀⵉⴱⴰ ⴷ ⵍⴽⴰⵔⵉⵣⵎⴰ, ⵖⴰⵢⴰⴷ ⵔⴰⴷ ⵉⴱⴰⵢⵏ ⵖ ⵜⴰⴱⵔⴰⵜ ⵜⴰⵎⵣⵡⴰⵔⵓⵜ ⵍⵍⵉ ⵔⴰⴷ ⵢⴰⵣⵏ ⵉ ⵢⴰⵃⵢⴰ ⴱⵏ ⵄⴱⴷⴰⵍⵍⴰⵀ ⴱⵏ ⵙⵄⵉⴷ ⵍⵃⴰⵃⵉ ⵍⵍⵉ ⵜⵏ ⵉⴽⴽⴰⵏ ⵖ ⴰⵡⴰⵏⴰⴽ ⵏ ⵉⵃⴰⵃⴰⵏ ⵖ ⵜⵔⵓⴷⴰⵏⵜ, ⵜⴰⴱⵔⴰⵜ ⴰⵏⵏ ⵉⴽⴽⴰ ⵜⵜ ⵏⵏ ⴳⵉⵙ ⵜⴰⵀⴷⵉⴷ ⵉⴱⴰⵢⵏ ⴱⵣⵣⴰⴼ " ⵢⴰ ⴰ ⵙⵙⵉ ⵍⵃⴰⵃⵉ ⴰⴷ ⵢⵉ ⵜⴹⴼⵔⵜ ⴷ ⴰⴷ ⵢⵉ ⵜⴱⴰⵢⵄⵜ, ⵏⵖ ⵔⴰⴷ ⴰⵛⴽⵖ ⴰⴷ ⵓⵜⵖ ⵉⵏⵏⴰⴽ " ⴷ ⵔⴰⴷ ⴰⵙ ⵉⵔⴰⵔ ⵍⵃⴰⵃⵉ ⵎⴰⵛⵛ ⵍⵊⴰⵡⴰⴱ ⵏⵏⵙ ⵢⵓⵔⴰⵜⵜ ⵙ ⵜⵎⴷⵢⴰⵣⵜ ⵉⵏⵏⴰ ⵢ'ⴰⵙ " ⵉⵔⴰⵢⵉ ⴰⴷ ⴰⵙ ⴳⵖ ⵉⵙⵎⴳ ... ⵉⵙ ⵓⵔ ⵉⴷⵔ ⵉⵙ ⵉⵔⵡⴰⵙ ⴼⵉⵇⵜⵓⵀⵓ ⵎⴰⵊⴷⴰⵏ? , ⵉⵔⴰ ⵢⵓⵙ ⵏ ⵎⵓⵙ ⴰⴷ ⵉⴳ ⴰⴳⵍⵍⵉⴷ ⵙ ⴷⴷⵓⵄⴰ ... ⵡⴰ ⵍⴰⵎ ⵢⴰⵙⵓⵎ ⴼⵉ ⵙⴰⵢⴼⵉⵀⵉ ⴼⵉ ⵜⵜⴰⵍⴰ ⵀⴰⴷⴰ? ". ⵉⵔⴰ ⵙ ⵍⵊⴰⵡⴰⴱ ⴰⴷ ⴰⵙ ⵢⵉⵏⵉ ⵎⴰⵙ ⵉⵔⴰ ⴰⴷ ⵢⵉⵍⵉ ⵉⵎⵏⵖⵉ ⴳⵔ ⴰⵡⴰⵏⴰⴽ ⵏ ⵉⵍⵉⵖ ⵉⵍⵍⴰⵏ ⴷⴷⵓ ⵜⵏⴱⴰⴹⵜ ⵏ ⴰⴱⵓ ⵃⴰⵙⵙⵓⵏ ⴰⵙⵎⵍⴰⵍ, ⴷ ⴰⵡⴰⵏⴰⴽ ⵏ ⵉⵃⴰⵃⴰⵏ ⴷⴷⵓ ⵜⵏⴱⴰⴹⵜ ⵏ ⵢⴰⵃⵢⴰ ⴱⵏ ⵄⴱⴷⴰⵍⵍⴰⵀ ⴱⵏ ⵙⵄⵉⴷ ⵍⵃⴰⵃⵉ. ⵎⵏ ⴱⵄⴷ ⵉⵎⵏⵖⵉ ⵙ ⵡⴰⵡⴰⵍ, ⵎⵎⴰⵖⵏ ⵉⵡⵓⵏⴰⴽ ⴰⴷ ⵙ ⵙⵉⵏ ⵖ ⵙⵙⴰⵃⵜ, ⴷ ⴽⵓ ⵜⵡⴰⵍ ⵢⴰⵏ ⴳⵉⵙⵏ ⴰⵔ ⵉⵜⵔⴱⴰⵃ. ⵢⵉⵡⵉⴷ ⵢⴰⵃⵢⴰ ⴱⵏ ⵄⴱⴷⴰⵍⵍⴰⵀ ⴱⵏ ⵙⵄⵉⴷ ⵍⵃⴰⵃⵉ ⵉⴷⵖⴰⵔⵏ ⵏ ⵉⴷⴰ ⵓⴽⵏⵙⵓⵙ ⴷ ⵡⵍⴰⴷ ⵊⵔⵔⴰⵔ ⵖ ⵏⵏⴰⵡⴰⵃⵉ ⵏ ⵜⵉⵣⵏⵉⵜ, ⵎⴰⵛⵛ ⴷⵖⵢⴰ ⵙⵍⵉⵖⵜⵏ ⵉⵙⵓⵔⵔⵉ ⴰⴱⵓ ⵃⴰⵙⵙⵓⵏ ⴰⵙⵎⵍⴰⵍ, ⵉⵎⵉⴽⴽ ⵙ ⵉⵎⵉⴽⴽ ⵢⵉⵡⵉⴷ ⴰⴱⵓ ⵃⴰⵙⵙⵓⵏ ⴰⵙⵎⵍⴰⵍ ⵉⴷⵖⴰⵔⵏ ⵏ ⵢⴰⵃⵢⴰ ⴱⵏ ⵄⴱⴷⴰⵍⵍⴰⵀ ⴱⵏ ⵙⵄⵉⴷ ⵍⵃⴰⵃⵉ ⴰⴷⵜ ⵉⴳⴰⵏ ⴷ ⵜⴰⵔⵓⴷⴰⵏⵜ ⴷ ⴰⴳⴰⴷⵉⵔ ⵓⵍⴰ ⵏⵜⵜⴰⵜ ⴰⵔ ⵉⵡⵜⵜⴰ ⵏ ⵉⵎⵉ ⵏ ⵜⴰⵏⵓⵜ ⵍⵍⵉ ⵜⵏ ⵉⴽⴽⴰⵏ ⴷⴷⵓ ⵜⵏⴱⴰⴹⵜ ⵏ ⵓⵚⵓⵍⵟⴰⵏ ⵣⵉⴷⴰⵏ ⵎⴰⵛⵛ ⵖⵉⵏⵏ ⴰ ⵖ ⵉⴱⵉⴷⴷ ⵓⵙⵎⵖⵓⵔ ⵏⵏⵙ, ⴰⵔ ⵜⵜⵉⵏⵉⵏ ⵉⴷ ⴱⵓ ⵓⵎⵣⵔⵓⵢ ⵎⴰⵙ ⵎⵍⴰⴷ ⵉⵙ ⵉⵣⵓⵢⴷ ⵉⵎⵉⴽⴽ ⵙ ⵍⴳⴷⴷⴰⵎ ⵔⴰⴷ ⵢⴰⵡⵉ ⵓⵍⴰ ⵜⵙⴳⴰ ⵏ ⵉⵃⴰⵃⴰⵏ ⴷ ⵍⵃⵓⵣ ⵃⵜⵜⴰ ⵏⵜⵜⴰⵜ ⴰⵛⴽⵓ ⴰⵚⵓⵍⵟⴰⵏ ⵣⵉⴷⴰⵏ ⵉⴱⴷⴰ ⴰⵔ ⵉⵜⵔⵡⴰⵍ ⵙ ⵜⵙⴳⴰ ⵏ ⵓⴳⴰⴼⴰ ⵜⵊⵔⴰ ⵢ'ⴰⵙ ⵢⴰⵜ ⵜⵎⵊⵔⵉⵜ ⵖ ⵓⴼⵜⴰⵙ ⵏ ⴰⴳⴰⴷⵉⵔ ⵏⵜⵜⴰⵜ ⴰⵜⵉⴷ ⵉⵙⵔⵎⵉⵏ, ⵉⴽⵔⴰ ⵢⴰⵏ ⵍⴱⴰⵟⵓ ⴰⴼⵔⴰⵏⵙⴰⵡⵉ ⴷⴰⵔ ⵢⴰⵏ ⵓⵇⵓⴱⵟⴰⵏ ⵉⴳⴰ ⵙ ⵢⵉⵙⵎ ⵊⵓⵏ ⴼⵉⵍⵉⴱ ⴷⵓ ⴽⴰⵙⵜⵢⴰⵏ, ⴷ ⵉⴽⴽⴰ ⵜⵜ ⵉⵏⵏ ⵍⴱⴰⵟⵓ ⵢ'ⴰⵏⵏ ⵉⴱⵉⴷⴷ ⵅ ⵓⴼⵜⵜⴰⵙ ⵏ ⵓⴳⴰⴷⵉⵔ ⵍⵍⵉ ⵜⵏ ⵉⴽⴽⴰⵏ ⴷⴰⵔⵙ ⵢⵉⵙⵎ ⵏ ⵙⴰⵏⵜⴰ ⴽⵔⵓⵣ ⴼⴰⴷ ⴰⴷ ⵙⵉⵙ ⵉⵔⵓⵔ ⵙ ⴼⵕⴰⵏⵚⴰ ⴷⴰⵔ ⵍⵡⵉⵙ ⵡⵉⵙ ⴽⵕⴰⴹ ⴷ ⵎⵔⴰⵡ ⵍⵍⵉ ⵢ'ⴰⵙ ⵉⵏⵏⴰ ⵖⴰⵔ ⴰⵛⴽⴷ ⴷⴰⵔⵉ, ⵎⴰⵛⵛ ⵓⵇⵓⴱⵟⴰⵏ ⵏ ⵍⴱⴰⵟⵓ ⵢ'ⴰⵏⵏ ⵍⵍⵉⵖ ⴷ ⵉⵥⵔⴰ ⵓⵚⵓⵍⵟⴰⵏ ⵣⵉⴷⴰⵏ ⴰⵙⴰⵄⴷⵉⵢ ⵉⵛⴰⵔⵊⵉ ⵓⵔⵖ ⴷ ⵍⵎⵓⵊⴰⵡⵀⴰⵔⴰⵜ ⴷ ⵉⴷⵍⵉⵙⵏ ⵖ ⵍⴱⴰⵟⵓ ⵉⵟⵎⵄⴰ ⵉⵔⵓⵔ ⵉⴼⵍⵜ ⴱⵍⴰ ⵏ ⵜⴰⵔⵢⴰⵍⵜ.[3]
ⵍⵍⵉⵖ ⴷ ⵢⵓⵎⵥ ⴰⴱⵓ ⵃⴰⵙⵙⵓⵏ ⴰⵙⵎⵍⴰⵍ ⵜⴰⵏⴱⴰⴹⵜ ⵏ ⵜⵎⴰⵣⵉⵔⵜ ⵏ ⵙⵓⵙ ⴽⵓⵍⵍⵓⵜ, ⵔⴰⴷ ⵉⵣⵔⵉ ⵙ ⵜⵙⴳⴰ ⵏ ⴷⵔⵄⴰ ⵜⴰⴼⵉⵍⴰⵍⵜ ⵓⵙⴳⴳⵡⴰⵙ ⵏ 1638 ⵙ ⵍⵊⵉⵛ ⵏⵏⵙ ⴷ ⵔⴰ ⵙⵜ ⵉⵖⵯⵉ ⵎⵏ ⴱⵄⴷ 3 ⵉⵙⴳⴳⵡⴰⵙⵏ ⵏ ⵉⵎⵏⵖⵉ, ⴷ ⵔⴰⴷ ⵢⴰⵎⵥ ⵎⵓⵃⴰⵎⵎⴰⴷ ⴱⵏ ⵛⵛⵔⵉⴼ ⵍⵄⴰⵍⴰⵡⵉ ⵖ ⵍⵃⴱⵙ ⴷ ⵖⵉⴷ ⴰ'ⵖ ⵔⴰⴷ ⵜⴳ ⴰⵡⴰⵏⴰⴽ ⵏ ⵉⵍⵉⵖ ⵜⴰⴳⵍⴷⵉⵜ ⵏ ⵜⵉⴷⵜ ⴰⵛⴽⵓ ⵔⴰⴷ ⵉⵏⴱⴹ ⴰⴱⵓ ⵃⴰⵙⵙⵓⵏ ⴰⵙⵎⵍⴰⵍ ⵉⴼⴼⵓⵙ ⵏ ⵍⵎⵖⵔⵉⴱ ⴽⵓⵍⵍⵓⵜ ⴰⵔ ⵜⵉⵎⴱⵓⴽⵜⵓ ⵉⴼⴼⵓⵙ ⵏ ⵜⵉⵏⵉⵔⵉ ⴷ ⵔⴰⴷ ⵉⵙⴰⵢⵟⵔ ⴼ ⵉⵖⴰⵔⴰⵙⵏ ⵏ ⵜⵙⴱⴱⴰⴱⵜ ⴷ ⵔⴰⴷ ⵜⴳ ⵜⴰⴳⵍⴷⵉⵜ ⵏ ⵜⴰⵥⵔⵡⴰⵍⵜ ⴰⵎⵎⴰⵙ ⵏ ⵜⵙⴱⴱⴰⴱⵜ ⵉⵎⵇⵇⵓⵔⵏ ⴰⵛⴽⵓ ⴽⵉⴳⴰⵏ ⵏ ⵓⴷⴰⵢⵏ ⵉⵎⵖⵔⴰⴱⵉⵢⵏ ⵔⴰⴷ ⴳⵉⵙ ⵙⵜⴰⵇⵔⵔⵏ ⴷ ⵔⴰⴷ ⴰⵙⵏ ⵜⵜⵓⵢⴱⵏⴰ ⵢⴰⵜ ⵍⴽⵏⵉⵙⵜ ⵏⵏⵙⵏ ⵖ ⵜⵙⴳⴰ ⵍⵍⵉ ⵔⴰⴷ ⵜⴹⵔ ⵎⵏ ⴱⵄⴷ.
ⵜⴰⴳⵍⴷⵉⵜ ⵏ ⵜⴰⵥⵔⵡⴰⵍⵜ ⵓⵛⴽⴰⵏ ⴰⵙ ⵍⵉⵄⵜⵉⵔⴰⴼⴰⵜ ⴷⴰⵔ ⵜⵎⵉⵣⴰⵔ ⵎⵇⵇⵓⵔⵏⵉⵏ ⵖ-ⴰⴽⵓⴷ-ⴰⵏⵏ ⴰⵛⴽⵓ ⵜⴽⴽⴰ ⵜⵜ ⵉⵏⵏ ⵜⵚⵃⴰ ⵜⴰⴷⴰⵎⵙⴰ ⵏⵏⵙ ⵓⵍⴰ ⵜⴰⵙⴱⴱⴰⴱⵜ ⵏⵏⵙ ⵙⵓⵍ ⵜⴽⴽⴰ ⵜⵜ ⵉⵏⵏ ⴷⴰⵔⵙ ⵢⴰⵜ ⵜⴰⵥⴹⵓⵔⵜ ⵜⴰⵄⵙⴽⵔⵉⵜ.
ⵥⵕ ⵓⴳⴳⴰⵔ
ⵙⵏⴼⵍⵉⵙⴰⵖⵓⵍⵏ
ⵙⵏⴼⵍ- ↑ Colonel Léopold-Victor Justinard, Un petit Royaume Berbère: « le Tazeroualt, un saint berbère Sidi Ahmed Ou Moussa », Librairie orientale et américaine, 1954.
- ↑ H. de Castries, Notice sur la région de l'oued Draa, in Bulletin de la société de géographie, 1880, tome XX, p. 500.
- ↑ ⵙⵓⵙ ⴰⵍⵄⴰⵍⵉⵎⴰ - ⵜⴰⴳⵍⴷⵉⵜ ⵏ ⵜⴰⵥⵔⵡⴰⵍⵜ ( ⵎⴰⵎⵍⴰⴽⴰⵜ ⵜⴰⵥⵔⵡⴰⵍⵜ ) - Ep 2, ⵢⵓⵜⵢⵓⴱ