ⵡⵉⴽⵉⴱⵉⴷⵢⴰ:ⴰⵎⵏⵏⵉ ⵓⴼⵔⵉⵏ/20
ⴰⵃⵡⴰⵛ ⵉⴳⴰ ⵢⴰⵜ ⵜⵥⵓⵕⵉ, ⴷ ⵢⴰⵏ ⵡⴰⵏⴰⵡ ⵏ ⵓⵎⴰⵔⴳ ⵏⵏⴰ ⵉⵜⵜⵉⵍⵉⵏ ⵙ ⵜⵔⵓⴱⴱⴰ, ⵉⵍⵍⴰ ⴷⴰⵔ ⵉⵎⴰⵣⵉⵖⵏ ⵏ ⵓⵏⵥⵓⵍ ⵏ ⵍⵎⵖⵔⵉⴱ ⵏⵜⵜⵉⵏⵉ ⵉⵛⵍⵃⵉⵢⵏ. ⵉⴳⴳⵓⵜ ⵖ ⵜⵎⵉⵣⴰⵔ ⵏ ⵙⵓⵙ ⴷ ⵡⴰⵟⵍⴰⵙ ⵉⵎⵥⵥⵉⵢⵏ ⴷ ⵡⴰⴷ ⵉⵎⵇⵇⵓⵔⵏ. ⴽⵔⴰⵢⴳⴰⵜ ⵜⴰⵎⴰⵣⵉⵔⵜ ⵏⵖ ⴰⴷⵖⴰⵔ ⵉⵜⵜⵓⵢⵙⵙⴰⵏ ⵙ ⵡⴰⵏⴰⵡ ⵏ ⵓⵃⵡⴰⵛ ⵏⵏⴰ ⵙⵉⵙ ⵉⵥⵍⵉⵏ. ⵜⵎⵓⵏ ⵜⵥⵓⵕⵉ ⴰⴷ ⴷ ⵉⵎⴰⵙⵙⵏ ⵏ ⵓⵎⴰⵔⴳ ⴷ ⵉⵡⴰⵍⵉⵡⵏ, ⵉⵍⵉⵏ ⴳⵉⵙⵏ ⵉⵏⴰⵡⵏ ⴳⴳⵓⵜⵏⵉⵏ.
ⴰⵃⵡⴰⵛ ⵏⵏⴰ ⵉⴳⴰⵏ ⵜⴰⵎⵓⵏⵜ ⵉⴳ ⵜⴰⵔⴰⴱⴱⵓⵜ ⵉⴳ ⴰⵡⴷ ⵓⴷⵎ ⵏ ⵜⵡⵉⵣⵉ ⵢⴰⴹⵏⵉⵏ. ⵉⵙⵎⴰⵏ ⵓⵃⵡⴰⵛ ⵜⴰⵔⴰⴱⴱⵓⵜ ⵏ ⵓⴼⴳⴰⵏ ⴷ ⵓⵎⴰⵔⴳ ⴷ ⵓⵥⴰⵡⴰⵏ, ⵉⵙⵎⴰⵏ ⵙ ⵖⵉⴽⴰⵏ ⵉⵙⵢⴰⴼⴰⵜⵏ ⵏ ⵎⵉⴷⴷⵏ. ⵓⵔ ⵉⵥⵍⵉ ⵓⵃⵡⴰⵛ ⵙ ⵓⵔⴳⴰⵣ ⵓⵍⴰ ⵜⴰⵡⵜⵎⵜ, ⵓⵔ ⵉⴳⵉ ⵡⵉⵏ ⵡⵉⴷ ⵎⵥⵥⵉⵢⵏ ⵓⵍⴰ ⵡⵉⴷ ⵎⵇⵇⵓⵕⵏ ⵉⵙⵎⴰⵏ ⵎⵉⴷⴷⵏ ⴰⴽⴽⵯ, ⴷ ⵓⵔ ⵉⴳⵍⵉ ⵎⵉⴷⴷⵏ ⵙ ⴽⵔⴰ ⵏ ⵓⵟⵟⵓⵏ, ⴰⵃⵡⴰⵛ ⵉⵙⵎⵓⵏ ⵎⵉⴷⴷⵏ ⵣⵖ ⵙⵉⵏ ⴰⵔ ⵢⵉⴼⴹ ⵏ ⵓⴼⴳⴰⵏ ⴷ ⵓⴳⴳⴰⵔ.
ⵜⴰⵡⴰⵍⵜ ⵏ ⵓⵃⵡⴰⵛ ⵜⴳⴰ ⴰⴽⴽⵯ ⵉⵙⵎ ⵜⵉⵔⴰⴱⴱⵓⵜⵉⵏ ⵏ ⵓⵥⴰⵡⴰⵏ ⴷ ⵓⵎⴰⵔⴳ ⵏⵏⴰ ⵖⵯⵎⴰⵏⵉⵏ ⵙ ⵜⵎⴰⴳⵉⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵣⵓⵏⴷ ⴰⴽⴽⵯ ⵉⵃⵡⴰⵛⵏ ⵏ ⵙⵓⵙ (ⴰⵎⵚⵎⵓⴷⵉ), ⴷ ⵉⵃⵡⴰⵛⵏ ⵏ ⴰⵢⵜ ⵓⵣⴰⵖⴰⵔ ⴷ ⴰⵢⵜ ⵓⴷⵔⴰⵔ, ⵎⴰⵛⵛ ⵓⵔ ⵏⵥⴹⴰⵕ ⴰ ⵏⴳⵍⵉ (ⵍⵓⵏⴰⵙⵜ, ⵜⵉⵎⴷⵢⴰⵣⵉⵏ ⵏ ⵃⵎⴰⴷⴰ, ⵍⵄⵉⵟⴰ, ⵃⵓⵔⴰⵏ, ⵜⴰⵀⵔⴰⵎⵜ, ⵍⵀⵉⵜ, ⵍⵎⵍⵃⵓⵏ, ⵜⴰⴽⵔⵉⵃⵜ, ⵜⴰⴼⵔⵔⴰⵃⵜ ⵏ ⵜⵔⵓⴷⴰⵏⵜ…) ⴳ ⵡⴰⵙⵙⴰⵖ ⵏ ⵓⵃⵡⴰⵛ ⵍⵍⵉⵖ ⴼⵍⵍⴰⵙ ⴷⵡⵔⵏ ⵡⴰⵏⴰⵡⵏ ⴰⴷ ⵏ ⵓⵥⴰⵡⴰⵏ, ⴷ ⵓⵔⵜ ⵙⵓⵍ ⵔⵡⴰⵙⵏ ⵙ ⴽⵉⴳⴰⵏ, ⴳⴰⵏ ⵉⵃⵡⴰⵛⵏ ⵜⵜⵄⵕⵕⴱⵏⵉⵏ ⵍⵍⵉ ⵙⵓⵏ ⵓⵔ ⵉⴳⵉⵏ ⴰⵎⴰⵣⵉⵖ, ⴰⵛⴽⵓ ⵉⵖ ⵏⵏⴰ ⴰⵃⵡⴰⵛ ⵏⵓⴽⵣ ⵏⵏ ⴽⵉⴳⴰⵏ ⵏ ⵉⵃⵡⴰⵛⵏ ⵍⵍⵉ ⵍⵍⴰⵏ ⵉⵏⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵍⵍⵉ ⵉⵍⵙⴰⵏ ⵜⴰⵎⴰⴳⵉⵜ ⵜⴰⵎⴰⵣⵉⵖⵜ, ⴳ ⵙⵓⵙ ⴷ ⵍⵃⵓⵣ ⴷ ⵡⴰⵙⵉⴼ ⵏ ⴷⵔⴰ. ⵡⴰⵅⵅⴰ ⵉⵍⵍⴰ ⵓⵃⵡⴰⵛ ⵙ ⴽⵉⴳⴰⵏ ⵡⴰⵏⴰⵡⵏ ⴷ ⴽⵉⴳⴰⵏ ⵏ ⵉⴽⵯⵍⴰⵏ ⴷ ⵓⵥⴰⵡⴰⵏ ⵎⴰⵛⵛ ⵉⴳⴰ ⵢⴰⵏ ⵙ ⵜⵖⴰⵔⴰⵙⵜ ⵏⵏⵙ ⵉⵥⵍⵉⵏ ⵖ ⵜⵓⵙⵙⵏⴰ ⵜⴰⵎⴰⵣⵉⵖⵜ.
ⴰⵏⴰⵡⵏ ⴰⴷ ⵏ ⵉⵃⵡⴰⵛⵏ ⵎⵎⵔⴽⵙⵏⵉⵏ ⵍⵍⴰⵏ ⴳ ⵙⵓⵙ, ⴰⵃⵡⴰⵛ ⵏ ⵉⴷⴰ ⵓⵙⵎⵍⴰⵍ ⵓⵔ ⵉⴳⵉ ⴰⵃⵡⴰⵛ ⵏ ⵓⵡⵍⵓⵣ, ⵉⵍⵍⴰ ⴽⵔⴰ ⵏ ⵓⵣⵉⵍⴰⵍ ⴳⵔⴰⵙⵏ ⵖ ⵓⵥⴰⵡⴰⵏ ⴷ ⵓⴽⵍⵓ ⴷ ⵜⵖⴰⵔⴰⵙⵜ ⵍⵍⵉ ⵙⴰ ⴳⵉⵙ ⵜⵜ ⵃⵓⵛⵏ. ⵉⵍⵉⵏ ⵜⵎⵏⴰⴹⵉⵏ ⵎⵇⵇⴰⵔ ⵉⴳⴰ ⵉⵙⵎ ⵢⴰⵏ, ⵎⴰⵛⵛ ⴰⵃⵡⴰⵛ ⵓⵔ ⵉⴳⵉ ⵢⴰⵏ, ⴰⵏⴰⵡⵏ ⵏ ⵉⵃⵡⴰⵛⵏ ⵉⵍⵍⴰⵏ ⵖ ⵓⴷⵔⴰⵔ ⵏ ⴷⵔⵏ ⵓⵔ ⵉⴳⵉ ⵣⵓⵏ ⴷ ⵉⵃⵡⴰⵛⵏ ⵉⵍⵍⴰⵏ ⴳ ⵓⴷⵔⴰⵔ ⵏ ⵍⴰⵟⵍⴰⵚ ⴰⵎⵕⵡⴰⵚⵓ, ⵓⵔ ⵎⵎⵔⵡⴰⵙⵏ ⵖ ⵉⵣⵍⵉ ⵓⵍⴰ ⵉⵎⴰⵙⵙⵏ ⵓⵍⴰ ⵓⵔ ⴳⵉⵏ ⵢⴰⵏ ⵖ ⵓⴽⵍⵓ ⵏ ⵜⵔⴰⴱⴱⵓⵜ ⴷ ⵜⵖⴰⵔⴰⵙⵜ ⵏ ⵓⵃⵡⴰⵛ. ⴰⴱⵟⵟⵓ ⴰⴷ ⵉⵍⵍⴰⵏ ⵏⴳⵔ ⴰⵃⵡⴰⵛ ⵏ ⵓⴷⵔⴰⵔ ⵏ ⴷⵔⵏ ⵎⵇⵇⵓⵕⵏ ⴷ ⵓⴷⵔⴰⵔ ⴰⵎⵕⵡⴰⵚⵓ ⴷ ⵙⵓⵙ ⴰⴽⴽⵯ ⴷ ⵍⵃⵓⵣ, ⵉⵔⵡⴰⵙ ⵉⵙ ⴷ ⵉⴽⴽⴰ ⴰⵏⴰⵡ ⵏ ⵜⵣⴷⴳⵉ ⴷ ⵉⴳⴰⵎⵉⵡⵏ ⵍⵍⵉⵖ ⵣⴷⵖⵏ ⵉⵎⴰⵣⵉⵖⵏ, ⵉⴳ ⵓⵎⵣⵔⵓⵢ ⴰⵡⴷ ⵏⵜⵜⴰⵏ ⵣⵖ ⴰ ⵉⵍⵍⵉ ⵉⴼⴼⴰⵍⵏ ⵜⵉⴼⵉⵔⴰⵙ ⵏⵏⵙ ⴳ ⵜⵥⵓⵕⵉ ⴷ ⵜⵓⵙⵙⵏⴰ ⴰⴽⴽⵯ.