ⵡⵉⴽⵉⴱⵉⴷⵢⴰ:ⴰⵎⵏⵏⵉ ⵓⴼⵔⵉⵏ/25
ⵉⵍⴰ ⵡⴰⵟⵍⴰⵙ ⴰⵎⵥⵢⴰⵏ ⵢⴰⵜ ⵜⵎⵍⵉⵍⵜ ⵉⵙⵓⴳⵔⵏ ⵙ ⵓⵙⵔⴰⴳ ⵏ ⵡⴰⵏⵙⴰ ⵏⵏⵙ ⴰⵙⵜⵔⴰⵜⵉⵊⵉ ⵍⵍⵉ ⵖ ⵉⵍⵍⴰ ⴳ ⵟⵓⵥⵓⵎⵜ ⵏ ⵜⵎⴰⵣⵉⵔⵜ ⵏ ⵍⵎⵖⵔⵉⴱ, ⴳⵏ ⵉⴷⵔⴰⵔⵏ ⵏⵏⵙ ⵓⵍⴰ ⵏⵜⵜⵏⵉ ⵢⴰⵏ ⵖ ⵉⵇⴱⵓⵔⵏ ⵍⵍⵉ ⵍⵍⴰⵏⵉⵏ ⵖ ⵉⵙⴳⴳʷⴰⵙⵏ ⵣⵔⵉⵏⵉⵏ ⵍⵍⵉⵖ ⵜⴰ ⵓⵔ ⵉⵍⵍⵉ ⵓⴼⴳⴰⵏ ⵖ ⵜⵓⴷⵔⵜ ⴰⴷ, ⵉⵜⵜⴰⵡⵙⵙⴰⵏ ⵡⴰⵟⵍⴰⵚ ⴰⵎⵥⵢⴰⵏ ⵙ ⵓⴱⵓⵖⵍⵓ ⵏ ⵉⵙⵓⴳⴰⵎ ⵏⵏⵙ ⵉⴳⴰⵎⴰⵏⵏ, ⴰⵢⵍⵍⵉ ⵉⵜⵜⴰⵊⵊⴰⵏ ⴰⵟⵍⴰⵚ ⴰⵎⵥⵢⴰⵏ ⴰⴷ ⵢⵉⵍⵉ ⴼ ⵉⵙⵓⴳⴰⵔ ⵉⴽⵎⴰⵎⵏ ⴷ ⴼⵍⵏⵜ ⵜⴳⵔⴰⵡⵉⵏ ⵜⵉⵏⴼⴳⴰⵏⵉⵏ ⵉⵙⵢⴰⴼⵓⵏ ⴳ ⵉⴳⵔⴰⵏ ⵏⵏⵙ, ⵉⴳ ⵡⴰⵙⵉⴼ ⵏ ⴷⵔⵄⴰ ⴷ ⵡⴰⵙⵉⴼ ⵏ ⵙⵓⵙ ⵢⴰⵏ ⵖ ⵉⵙⴰⴼⴼⵏ ⵖⵣⵉⴼⵏⵉⵏ ⵖ ⵓⴷⵖⴰⵔ ⴰⴷ ⴳⵏ ⵎⴰ ⵢⵓⵙⵉⵏ ⵜⵓⴷⵔⵜ ⵏ ⵉⵎⵣⴷⴰⵖⵏ ⵉⵙⴳⴰⴷⴷⴰ ⴰⵙⵏ ⵜⴰⵖⴰⵔⴰⵙⵜ ⵏ ⵜⵉⵔⵎⵜ ⵏⵏⵙⵏ ⴷ ⵓⵙⵔⵜⵓ ⵏ ⵜⵓⴷⵔⵜ ⵍⵍⵉ ⵖ ⴰⴷ ⵉⵍⵉⵏ, ⵉⵍⵉⵏⵜ ⴳⵉⵙ ⵜⵓⴳⵜ ⵏ ⵜⵔⴳⵉⵡⵉⵏ ⵍⵍⴰⵏⵉⵏ ⵖ ⵉⴳⴳⵉ ⵏ ⵉⵙⴰⴼⴼⵏ ⵍⵍⵉ ⵉⵙⵓⵜⵍⵏ ⵉ ⵡⴰⵟⵍⴰⵚ ⴰⴷ ⴰⵎⵥⵢⴰⵏ ⴰⵔ ⴷ ⴳⵉⵙ ⵜⵜⴰⵎⵥⵏ ⴰⵎⴰⵏ ⵏ ⵜⵉⵙⵙⵉ ⴷ ⵡⴰⵎⴰⵏ ⵏ ⵜⴼⵍⵍⴰⵃⵜ, ⴳⵏ ⵉⵙⴰⴼⴼⵏ ⴰⴷ ⴷ ⵡⵉⵢⵢⴰⴹ ⵢⴰⵜ ⵖ ⵜⵎⵏⵜⴰⵍ ⵍⵍⵉ ⵢⵓⵊⵊⴰⵏ ⴰⴼⴳⴰⵏ ⴰⴷ ⵢⵓⵜ ⵙ ⵉⵥⵓⵕⴰⵏ ⵏⵏⵙ ⵉⵙⵜⵉ ⴰⴷ ⵉⵙⴽⴽⵓⵙ ⵖ ⵓⴷⵔⴰⵔ ⴰⴷ ⵉⵙⵙⵏⵜⵉ ⴳⵉⵙ ⵜⵓⴷⵔⵜ ⵏⵏⵙ ⴷ ⵉⴽⵍⵓ ⴳⵉⵙ ⵜⴰⵖⵔⵎⴰ ⵏⵏⵙ ⴷ ⵜⵎⵢⵓⵔⵉⵏ ⵏⵏⵙ.
ⴳ ⵓⵎⵣⵡⴰⵔⵓ ⵏ ⵓⵙⵓⴳⴰⵔ ⴰⴷ ⵉⴽⵎⴰⵎⵏ ⴰⵔ ⵏⵜⵜⴰⴼⴰ ⴰⵏⵙⵉⵡⵏ ⵏ ⵜⵥⵓⵕⵉ ⴼ ⵓⵥⵕⵓ ⵙ ⵡⴰⵏⴰⵡⵏ ⵏⵏⵙ ⵖ ⵡⴰⵟⵍⴰⵚ ⴰⵎⵥⵢⴰⵏ ⵙ ⵉⵙⵏⵜⴰⵍ ⴷ ⵉⵎⴰⵎⴽⵏ ⴳⵉⵙ ⵉⵍⵍⴰⵏ, ⵉⵙⵎⵎⵥⵍⵉⵏ ⵉⴷⵔⴰⵔⵏ ⵏ ⵓⴷⵖⴰⵔ ⴰⴷ ⴼ ⵡⴰⵏⵙⵉⵡⵏ ⵢⴰⴹⵏⵉⵏ ⵏ ⵜⵥⵓⵔⵉ ⴳ ⵜⵎⴰⵣⵉⵔⵜ ⵏⵏⵖ, ⵢⵉⵍⵉ ⴳ ⵡⴰⵟⵍⴰⵚ ⴰⵎⵥⵢⴰⵏ ⵜⵓⴳⵜ ⵏ ⵡⴰⵢⴷⴰ ⵍⵍⵉ ⴷ ⴼⵍⵏⵜ ⵜⵓⴳⵜ ⵏ ⵜⵖⵔⵎⵉⵡⵉⵏ ⵍⵍⵉ ⵣⵔⵉⵏⵉⵏ ⴳ ⵓⵎⵣⵔⵓⵢ ⵏ ⵓⴷⵖⴰⵔ ⴰⴷ ⵍⵍⵉ ⵖ ⴷ ⴼⵍⵏⵜ ⵜⵓⴳⵜ ⵏ ⵜⵎⵢⵓⵔⵉⵏ ⴷ ⵜⵓⵙⵏⴰ ⵖ ⵜⵓⴳⵜ ⵏ ⵉⴳⵔⴰⵏ, ⴷ ⴰⵢⵍⵍⵉ ⴷ ⵉⴼⵍ ⵡⴰⵎⵓⵏ ⵏ ⵓⴼⴳⴰⵏ ⵏ ⵉⵙⵏⴼⵍⵓⵍⵏ ⴷ ⵜⵡⵙⵙⵏⵉⵡⵉⵏ ⴷ ⵜⵉⵏⵏⴰⵡⵉⵏ ⴷ ⵡⴰⴹⴰⴷⵏ ⴷ ⵜⵎⵢⴰⵔ ⴷ ⵉⵙⴽⴽⵉⵔⵏ ⴷ ⵡⴰⵏⴰⵡⵏ ⵏ ⵜⵓⴷⵔⵜ ⴷ ⵉⵎⴰⵙⵙⵏ ⵏ ⵓⵏⵢⵉⵍⴽⵎ, ⵙ ⵡⴰⵏⵍⵉ ⴷ ⵡⵓⵍ ⵏⵏⵙ ⴷ ⵡⵉⵏ ⵉⴳⵔⴰⵡⵏ ⵏⵏⵙ ⵅ ⴷⴷⴰⵡⴰ ⵏ ⵓⴷⵔⵉⵣ ⵏ ⵓⵎⵔⴰⵙ ⵍⵍⵉ ⴳ ⵉⵍⵍⴰ ⵓⴼⴳⴰⵏ ⴰⴷ.
ⵜⴳⴰ ⴰⵢⵜ ⴱⴰⵀⴰ ⵓⴷⵔⴰⵔ ⵢⴰⵜ ⵜⵖⵔⵎⵜ ⵍⵍⵉ ⵉⵍⵍⴰⵏ ⵖ ⵡⴰⵟⵍⴰⵚ ⴰⵎⵥⵢⴰⵏ ⵖ ⵜⵙⴳⴰ ⵜⴰⵥⵍⵎⴰⴹⵜ ⵏⵏⵙ, ⵍⵍⵉⵖ ⵉⵜⵜⴰⵡⵙⵙⴰⵏ ⵙ ⵉⴷⵔⴰⵔⵏ ⵍⵍⵉ ⵢⵓⵙⵉⵏ ⵜⵓⴳⵜ ⵏ ⵜⵎⵢⵓⵔⵉⵏ ⴷ ⵜⴰⵢⵙⵉ ⵜⴰⵎⴰⵣⵉⵖⵜ ⵉⵙⴳⴳʷⴰⵙⵏ ⴼ ⵡⵉⵢⵢⴰⴹ ⵣⵓⵏ ⴷ ⵜⵉⵎⵍⵙⴰ ⵍⵍⵉ ⵙⵉⵙ ⵉⵥⵍⵉⵏ ⴷ ⵓⵊⵎⴰⴽ ⴷ ⵜⵎⴷⵢⴰⵣⵉⵏ ⴷ ⵜⵓⵍⵍⵉⵙⵉⵏ ⵍⵍⵉ ⵜⵜⴰⵍⵙⵏ ⵉⵎⵇⵔⴰⵏⵏ ⵉ ⵢⵉⵎⵥⵢⴰⵏⵏ ⵖ ⴽⵔⴰⵢⴳⴰⵜ ⵉⴹ, ⴰⵢⵜ ⴱⴰⵀⴰ ⵏ ⵓⴷⵔⴰⵔ ⵜⵜⴰⵡⵙⵙⴰⵏ ⵙ ⵉⵎⴷⵢⴰⵣⵏ ⵏⵏⵙ ⴷ ⵓⵔⴰⵔⵏ ⵍⵍⵉ ⵉⵜⵜⵎⵓⵏⴰⵏ ⴷ ⵜⵡⵓⵔⵉ ⵏⵏⵙⵏ ⵖ ⵜⵢⵔⵣⴰ ⵏⵖ ⵉⵖ ⴰⵔ ⵎⵎⴳⵔⵏ …, ⵓⵔⴰⵔⵏ ⵉⵙ ⴰⴽⴽʷ ⴳⵉⵙⵏ ⵉⵏⴳⴹ ⵓⴼⴳⴰⵏ ⵖ ⵜⴰⵙⴳⴰ ⴰⴷ ⴰⵛⴽⵓ ⵖⵉⵏⵏ ⴰⵖ ⴰⵔ ⵉⵙⵙⴰ ⵉⵎⴰⵏ ⵏⵏⵙ ⵢⴰⵍⵍ ⴳⵉⵙ ⵜⵓⴷⵔⵜ ⵏⵏⵙ, ⵉⴳ ⵓⵔⴰⵔ ⵢⴰⵜ ⵖ ⵜⵎⵢⵓⵔⵉⵏ ⵍⵍⵉ ⴷ ⵉⴼⵍ ⴰⴼⴳⴰⵏ ⴰⵇⴱⵓⵔ ⵉ ⵜⴰⵔⵡⴰ ⵏⵏⵙ.