ⵡⵉⴽⵉⴱⵉⴷⵢⴰ:ⴰⵎⵏⵏⵉ ⵓⴼⵔⵉⵏ/29
ⵍⵃⴰⵊⵊ ⴱⵍⵄⵉⴷ (ⵙ ⵡⴰⵙⵙⴰⵖ ⵏⵙ ⵉⵖⵣⵣⵉⴼⵏ: ⴱⵍⵄⵉⴷ ⵓ ⴱⵕⵉⴽ ⴷⴰ ⴱⵉⵀⵉ) ⵉⴳⴰ ⵕⵕⴰⵢⵚ ⴰⵎⴰⵣⵉⵖ ⵓ ⵙⵓⵙ. ⵓⵔ ⵉⵜⵜⵢⴰⵡⵙⵙⴰⵏ ⵓⵙⴰⴽⵓⴷ ⵏ ⵜⵍⴰⵍⵉⵜ ⵏⵏⵙ. ⵉⵜⵜⵓⵢⵙⵙⴰⵏ ⵎⴰⵙ ⵉⵍⵓⵍ ⵏⴳⵔ ⵉⵙⴳⴳⵯⴰⵙⵏ 1870 ⴷ 1875 ⴷⴰⵜ ⵏ ⵜⵍⴰⵍⵉⵜ, ⴳ ⵡⴰⵏⵓ ⵏ ⵄⴷⴷⵓ, ⵉⴷⴰ ⵓⴱⴰⵄⵇⵉⵍ, ⵉⵎⵎⵜ ⴳ 1945. ⵉⴳⴰ ⵢⴰⵏ ⴳ ⵜⵎⴰⵜⴰⵔⵉⵏ ⵎⵇⵇⵓⵔⵏⵉⵏ ⵏ ⵓⵙⵏⴼⵍⵓⵍ ⴰⵎⴰⵣⵉⵖ ⴳ ⵢⵉⴳⵔ ⵏ ⵜⵥⵓⵕⵉ. ⵉⵜⵜⵢⴰⵡⵙⵙⴰⵏ ⵙ ⴱⴰⴱⴰⵙ ⵏ ⵜⴰⵕⵕⵡⴰⵢⵚⵉⵜ ⴳ ⵜⵙⴳⴰ ⵏ ⵙⵓⵙ. ⵓⵔ ⵏⵙⵙⵏ ⴽⵉⴳⴰⵏ ⵅⴼ ⵓⵎⵣⵔⵓⵢ ⴷ ⵜⵓⴷⵔⵜ ⵏ ⵍⵃⴰⵊⵊ ⴱⵍⵄⵉⴷ ⵎⵇⵇⴰⵔ ⵉⴳⴰ ⵢⴰⵏ ⵙⴳ ⵉⵏⵎⵖⵓⵔⵏ ⵉⵎⵇⵔⴰⵏⵏ ⵏ ⵜⵥⵓⵕⵉ ⵏⵏⴰ ⵉⵙⵙⵏ ⵉⴼⴼⵓⵙ ⵏ ⵍⵎⵖⵔⵉⴱ ⴳ ⵜⴰⵙⵓⵜⵉⵏ ⴰⴷ ⵜⵉⵎⴳⴳⵓⵔⴰ.
ⴱⵓⵍⵉⵜⵜ ⴳⴰⵍⵓⵏⴷ-ⴱⵉⵖⵏⵉⵜⵜ(Paulette Galand-Pernet) ⵜⴰⵎⴰⵔⴰⵜ ⵜⴰⴼⵕⴰⵏⵚⵉⵚⵜ ⵏⵏⴰ ⵢⵓⵔⴰⵏ ⴽⵉⴳⴰⵏ ⵏ ⵜⵣⵔⴰⵡⵉⵏ ⵅⴼ ⵓⵎⴰⵔⴳ ⴷ ⵉⵏⵙⴰⵢⵏ ⵉⵎⴰⵣⵉⵖⵏ, ⵜⵏⵏⴰ ⴳ ⵡⴰⵔⵔⴰⵜⵏ ⵏⵏⵙ ⵏⵏⴰ ⴷ ⵜⵙⵙⵓⴼⵖ ⴳ ⵓⵙⴳⴳⵯⴰⵙ ⵏ 1972, ⵎⴰⵙ ⵉⴳⴰ ⵓⵎⴰⵔⴳ ⵏ ⵚⵚⵡⴰⵢⵚ ⵜⵉⵎⴷⵢⴰⵣⵉⵏ ⵏ ⵉⵎⴰⵔⵉⵔⵏ ⵉⵙⵡⵡⵔⴰⵢⵏ ⵖⴰⵙ ⴳ ⵓⵎⴰⵔⴳ. ⴰⵔ ⵙⵏⵓⵍⴼⴰⵡⵏ ⵉⵎⴰⵔⵉⵔⵏ ⵜⵉⵎⴷⵢⴰⵣⵉⵏ ⴳⵉⵏⴰⵙⵏⵜ ⵜⵉⵢⵢⵜ ⵏⵏⵙⵏⵜ, ⴰⵔ ⵣⵣⵔⵉⴳⵏ ⵜⵉⵎⵉⵣⴰⵔ ⵙ ⵜⵉⵢⵢⴰⴹ, ⵉⵍⵉⵏ ⴳ ⴽⵔⴰ ⵏ ⵜⵔⴰⴱⴱⵓⵜ ⴳ ⵍⵍⴰⵏ ⵉⵄⵣⵔⴰⵢ ⵉⵜⵜⵍⵎⴰⴷⵏ ⴰⵏⴰⵡ ⴰⴷ ⵏ ⵓⵎⴰⵔⴳ, ⴰⵎⵣⵡⴰⵔ ⵏ ⵜⵔⴰⴱⴱⵓⵜ ⴰⴷ ⴰⵔ ⵜ ⵉⵜⵜⴳⴳⴰ ⵕⵕⴰⵢⵚ, ⵉⵜⵜⵢⴰⵡⵙⵙⵏ ⵓⵍⴰ ⵙ ⵉⵙⵎ ⵏ ⵛⵛⵉⵅ ⵏ ⵜⵔⴰⴱⴱⵓⵜ.
ⵉⴳ ⵏⵙⴰⵡⵍ ⵅⴼ ⵕⵕⵡⴰⵢⵚ, ⵉⴷⵔⵓⵙ ⵎⴰ ⴳ ⵏⵜⵜⴻⵜⵜⵓ ⵍⵃⴰⵊⵊ ⴱⵍⵄⵉⴷ, ⴰⵛⴽⵓ ⵏⵜⵜⴰⵏ ⴰⴷ ⵉⴼⵍⵏ ⵜⵉⵜⴳⴳⴰⵔⵉⵏ ⵉⵜⵜⵓⵙⵍⵍⴰⵏ. ⵍⵃⴰⵊⵊ ⴱⵍⵄⵉⴷ, ⵕⵕⴰⵢⵚ ⴷ ⵓⵎⴷⵢⴰⵣ ⵏⵏⵖ ⴰⵜⵔⵓⴱⴰⴷⵓⵔ, ⵉⴼⵍⴷ ⵜⵉⵎⵉⵜⴰⵔ ⵏⵏⵙ ⴳ ⵓⵎⴰⵔⴳ ⴰⵎⴰⵣⵉⵖ ⴳ ⵜⵙⴳⴰ ⵏ ⵙⵓⵙ. ⵉⵍⵓⵍ ⴳ ⵜⵙⴳⴳⵉⵡⵉⵏ ⵏ ⵜⵣⵏⵉⵜ. ⵍⵍⴰⵏⵜ ⴽⵔⴰ ⵏ ⵜⵎⵙⵉⴳⴳⵉⵍⵉⵏ ⵏ ⴰⵍⵉⴽⵙⵉⵙ ⵛⵓⵜⴰⵏ (Alexis chotin) ⴷ ⴱⵓⵍⵉⵜⵜ ⴳⴰⵍⵓⵏⴷ-ⴱⵉⵖⵏⵉⵜⵜ (baulette galand-bernet) ⵉⵜⵜⵉⵏⵉⵏ ⵎⴰⵙ ⵔⴰⴷ ⴷⴰⵔⵙ ⵉⵍⵉⵏ 60 ⵏ ⵓⵙⴳⴳⵯⴰⵙ ⴳ ⵓⵙⴳⴳⵯⴰⵙ ⵏ 1933. ⵜⴰⵡⵊⴰ ⵏⵏⵙ ⵓⵔ ⵜⵟⵟⴼ ⵢⴰⵜ, ⵙⵓⵍ ⵎⵎⵜⵏ ⴰⵢⵜ ⴷⴰⵔⵙ ⴰⴽⵓⴷ ⵏⵏⴰ ⵙⵓⵍ ⵉⵎⵥⵥⵉ. ⵉⴼⴼⵖ ⵜⵉⵎⵣⴳⵉⴷⴰ ⵉⴽⵛⵎ ⵉ ⴽⵔⴰⵢⴳⴰⵜ ⴰⵏⴰⵡ ⵏ ⵜⵡⵡⵓⵔⵉ ⴰⴼⴰⴷ ⴰⴷ ⴷ ⵉⵔⴰⵔ ⵎⴰⵙ ⵉⵛⵜⵜⴰ ⵜⵉⵔⴰⵎ ⵣⵓⵏ ⴷ ⵜⴰⵢⵙⵙⴰ, ⵜⴰⵛⵛⵎⵓⵜⵉⵜⵜ ⴷ ⵓⵀⵢⵢⴰⴹ ⴰⵍⵍⵉⴳ ⵉⵍⴽⵎ ⵜⴰⵥⵕⵡⴰⵍⵜ, ⵏⵏⴰ ⴳ ⵉⵜⵜⵢⵓⵎⴹⴰⵍ ⵢⴰⵏ ⵙⴳ ⵉⴳⵯⵔⵔⴰⵎⵏ ⵉⵎⵇⵔⴰⵏⵏ ⵏ ⵙⵓⵙ ⵙⵉⴷⵉ ⵃⵎⴰⴷ ⵓ ⵎⵓⵙⴰ.